الماتى قالاسىندا زاڭسىز تسەح اشكەرەلەندى

الماتى. 11 ناۋرىز. الماتى قالالىق مەملەكەتتىك كىرىستەر دەپارتامەنتى ەكونوميكالىق قىلمىستاردى تەرگەۋ قىزمەتى قىزمەتكەرلەرىنىڭ  جۇرگىزگەن رەيد شارالارى بارىسىندا زاڭسىز كاسىپكەرلىكپەن اينالىسقان قۇپيا تسەحتىڭ جۇمىسى اشكەرە بولدى. بۇل تۋرالى الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى. قازىرگى ۋاقىتتا سالىق زاڭناماسىنا ءتيىستى وزگەرىستەر ەنگىزىلىپ, سالىق تولەۋشىلەردىڭ جۇمىسىن جەڭىلدەتۋ ماقساتىندا كوپتەگەن جەڭىلدىكتەر جاسالىپ جاتقانى بەلگىلى. سوعان قاراماستان, سالىق تولەۋدەن جالتارىپ, كولەڭكەلى ەكونوميكانىڭ ىقپالىنان شىعا الماي جۇرگەن سۋبەكتىلەر سانى ءالى دە ازايار ەمەس. اتالعان تسەح بىرنەشە جىل بويى جاسىرىن تۇردە ەسەپتىك باقىلاۋ ماركاسىن شىعارۋمەن اينالىسقان. بۇعان قوسا شەتەلدەردەن كونتراباندالىق جولمەن قىمبات ماركالى ۆيسكيدىڭ «ماكاللان», «چيۆاس», «دجەيمەسون», «دجەك دەنيەلس», «ابسوليۋت», «شۆەدكا», «موەت», «ۆدوۆا كليكو», «دون پەرەنيون»,«ەلتسين» تۇرلەرىن جانە «مالبورو», «پارلامەنت», «مەۆيۋس» سياقتى تەمەكى ونىمدەرىن اكتسيزدىك ماركاسىز اكەلىپ وتىرعان. وسىدان كەيىن جالعان جولمەن اكەلگەن تاۋارلارعا وزدەرى شىعارعان اكتسيزدىك ماركالاردى جاپسىرۋ ارقىلى ساتۋمەن اينالىسقان. تاۋارلار الماتى قالاسى مەن الماتى وبلىسىنىڭ جانە ەلىمىزدىڭ باسقا دا وبلىس ورتالىقتارىنىڭ كوڭىل كوتەرەتىن تۇنگى كلۋبتارىندا, كازينولاردا, كاراوكە-بارلاردا جانە مەيرامحانالاردا تاراتىلعان. قۇپيا تسەحتى اشكەرەلەۋ بارىسىندا الىنعان وپەراتيۆتى اقپاراتتار بويىنشا كۇدىكتى دەپ تانىلعان 4 فيگۋرانتتىڭ ءۇيىن ءتىنتۋ بارىسىندا 70 مىڭ دوللاردان اساتىن ءسپيرتتى ىشىمدىكتەر مەن 2000 دانادان اساتىن ەسەپتىك باقىلاۋ ماركاسى جانە جالعان ەسەپتىك باقىلاۋ ماركاسىن شىعاراتىن اپپارات تابىلدى. اتالعان وقيعا بويىنشا ءسپيرتتى ىشىمدىكتەردىڭ ساپاسى مەن ەسەپتىك باقىلاۋ ماركاسىنىڭ جالعاندىعىن انىقتاۋ ماقساتىندا سوت-تاۋارلىق جانە تەحنيكالىق ساراپتاما تاعايىندالدى. سونىمەن قاتار قىلمىستىق كودەكستىڭ 233, 214 بابتارى بويىنشا №157500121001940 قىلمىستىق ءىس قوزعالدى. تەرگەۋ بارىسىندا تاعىلعان ايعاقتار بۇلتارتپاستاي بولعاندىقتان, ۇستالعاندار ءوز كىنالارىن تولىقتاي مويىندادى جانە تەرگەۋ امالدارىنىڭ دۇرىس جانە ۋاقىتىندا جۇرگىزىلۋى ءۇشىن اتسالىسۋعا كەلىسىمدەرىن بەردى. ايناش ەسالي. دەرەك: الماتى قالالىق مەملەكەتتىك كىرىستەر دەپارتامەنتىنىڭ ءباسپاسوز قىزمەتى. سۋرەت: tengrinews.kz.