نۇرگۇل ماقانوۆا تىگىنشىلىكتى وسىلاي ماقتان تۇتادى
تۇرمىسقا شىققالى جۇرگەن بويجەتكەن نۇرگۇل ماقانوۆاداي شەبەر تىگىنشىنى قۇربىلارىنان ەستىپتى. بويجەتكەننىڭ قالاعان جىگىتى ءدىن جولىنداعى ازامات ەكەن, قالىڭدىعىنىڭ دۇكەندەگى يىعى, ارقاسى اشىق تۇراتىن اق كويلەك كيگەنىن ۇناتا قويماپتى. سوندىقتان قالىڭدىق تا – ساندىلىگى تۇرمىسقا شىققان قۇربىلارى كيگەن سول اق كويلەكتەردەن كەم تۇسپەيتىن ءارى ديزاينى سول كويلەكتەردەن الىس تا كەتپەيتىن, ءبىراق, بولاشاق كۇيەۋى ەسكەرتكەندەي, اشىق-شاشىق بولمايتىن كويلەك ىزدەپتى. كوڭىلىندەگى ونداي كويلەكتى دۇكەندەردەن تابا الماعان. سوندىقتان, سوڭعى ءۇمىتىن ۇزبەي نۇرگۇلگە كەلەدى. ەكەۋى توي كويلەگىنىڭ نوبايىن ۇزاق وتىرىپ جاسادى. جيىرما جىلدان اسا تىگىنشىلىك تاجىريبەسىندە وعان مۇنداي سۇرانىس تۇسپەگەن ەكەن. ايتپەسە, تالاي قىزعا توي كويلەگىن تىگىپ ءجۇر. نۇرگۇل قالىڭدىقتىڭ كويلەگىن ۇلتتىق ناقىشتى, ەۋروپالىق ستيلدەگى ەلەمەنتتەردى ارالاستىرا وتىرىپ, كويلەك نوبايىنىڭ بىرنەشە ۇلگىلەرىنىڭ سۋرەتىن سالدى. ناتيجەسىندە مويىنى دا, ءتوسى دە, ارقاسى دا جابىق, بىراق قالىڭدىققا قۇيىلىپ جاراسقان, ونى اققۋداي نازىك, تال-شىبىقتاي سىمباتتى ەتىپ كورسەتكەن كويلەك دايىن بولدى. بويجەتكەن مەن بولاشاق كۇيەۋ بالا نۇرگۇلگە اقىسىن تولەپ تۇرىپ, العىسىن ايتتى.
– ءدىندى – يماندىلىقتىڭ, ادامگەرشىلىكتىڭ قاينار بۇلاعى دەپ بىلەمىز. بىراق قىزداردىڭ, ءتىپتى, تۇمشالانىپ كيىنىپ الاتىنى دۇرىس ەمەس. جاستىققا ءتان سۇلۋلىقتى نەگە جاسىرۋىمىز كەرەك؟ قازاق قىزدارىنىڭ سۇلۋلىعىن ۇلتتىق كيىمىمىز ودان سايىن ايشىقتاپ تۇرعان عوي. مەن قالىڭدىققا كيىم تىككەندە قازاقتىڭ ۇلتتىق كيىمىنىڭ جەكە ۇلگىلەرىن الامىن, ونى بۇگىنگى كيىم ستيلىمەن ۇيلەستىرەمىن. بۇل مەنىڭ تاپسىرىس بەرۋشىلەرىمە ۇنايدى, – دەيدى نۇرگۇل. ول ديزاينەر ەمەس, ءوزىنىڭ ناپاقاسىن ايىرىپ جۇرگەن قاراپايىم كاسىبي تىگىنشى عانا. دەگەنمەن, نۇرگۇلدىڭ ويىنشا, ءار تىگىنشى وزىنشە ديزاينەر. سۇرانىس جاساپ كەلگەن ءار ادامنىڭ تالعامى, دەنە ءبىتىمى, اكەلگەن ماتاسى دا ءتۇرلى-ءتۇرلى. سوندىقتان, تىگىنشىنىڭ ءار كۇنگى ەڭبەگى كىشىگىرىم شىعارماشىلىق ءتارىزدى.
اناسى ساۋلە قالاداعى قۇرىلىس-جوبالاۋ ينستيتۋتىندا ءىستەيتىن جوعارى ءبىلىمدى مامان بولاتىن. نارىق قىسپاعى قىسقان جىلدارى جوبالاۋ ينستيتۋتتارىندا ماماندار شەتىنەن قىسقارتىلدى, كوپتەگەن بولىمدەرى جابىلىپ, ساۋلە جۇمىسسىز قالدى. بىراق نە نارسەگە دە كونتەرلى, ءتوزىممەن قارايتىن اناسى ساسقان جوق, ۇيدە تىگىنىن تىگىپ وتىرا بەردى. ول كەزدە نۇرگۇل مەكتەپتە وقيتىن. ەڭبەك ساباعىندا اس ءپىسىرۋ, ءۇيدى كۇتۋ, تىگىن تىگۋ سەكىلدى قىزداردىڭ بولاشاعىنا قاجەت ءىس ۇيرەتىلەتىن. ۇستازى ۇيرەتكەن ءىستى نۇرگۇل ءۇيگە كەلىپ, اناسىنىڭ قاسىندا وتىرىپ جالعاستىرىپ جاسايتىن.
– مەكتەپ قابىرعاسىندا ءجۇرگەندە-اق مەن وزىمە كويلەك تىگە باستادىم. ودان انام ەشقانداي قاتە تاپپايتىن. مەكتەپ بىتىرگەن سوڭ قوستاناي قالاسىنداعى №10 تەحنيكالىق ۋچيليششەگە بارىپ, ەكى جىل وقىدىم. سوندا ۇستازدار مەنىڭ شەبەر تىگەتىنىمە ريزا بولىپ, ماعان ساباققا ەركىن قاتىسۋىما رۇقسات بەردى. ەمتيحاندى دا كوڭىلدەگىدەي تاپسىردىم, – دەيدى نۇرگۇل. ول مەكتەپتى بىتىرىسىمەن-اق اناسىمەن بىرگە كاسىبي تىگىنشى رەتىندە تانىلدى. دۇكەننەن كوڭىلىندەگىسىن كورە الماعان قىز-كەلىنشەكتەردىڭ, اجەلەردىڭ بارلىعى دا نۇرگۇلگە كەلەتىن. بۇل ءۇردىس ءالى كۇنگە دەيىن ۇزىلگەن جوق.
قازىر نۇرگۇل ماقانوۆا قوستاناي قالاسىنداعى پەردە, جاپقىشتار تىگەتىن اتەلەدە تىگىنشى بولىپ ىستەيدى. مۇندا دا تۇرعىنداردان ءتۇرلى سۇرانىستار ءتۇسىپ جاتادى. ادامداردىڭ تالعامىنان شىعۋ ءۇشىن جانە ولاردىڭ سۇرانىسىنا وراي پەردەلەردىڭ نەشە ءتۇرىن تىگەدى. ولاردىڭ ءبولمەگە جاراسىمىن ىزدەۋ دە ءبىر تىلسىم دۇنيە. نۇرگۇلدىڭ ويىنشا, پەردە دە قىزداردىڭ ءساندى كويلەگى سەكىلدى, ولار ۇيدەگى جيھازدارمەن, دۇنيە-م ۇلىكپەن ۇيلەسىم تابۋى ءتيىس. بۇل تۇرعىدا كەلگەن كىسىلەردىڭ قاتەلەسپەۋى, تالعامىنان شىعۋى ءۇشىن وزدەرىمەن وتىرىپ, اسىقپاي كەڭەسەدى.
– تىگىنشىلىك كاسىپ دەگەنىڭىز جارتىلاي ونەر عوي. ادامنىڭ بويىندا اتالعان كاسىپكە دەگەن ىنتىزارلىق بولماسا, بۇل ماماندىق ەكىنىڭ ءبىرىن اساۋ اتتاي اۋدارىپ تاتايدى. وسى ماماندىعىم ارقىلى ادامدارعا كومەگىم ءتيىپ جۇرەدى, ءوزىمنىڭ نانىمدى دا تاۋىپ كەلەمىن. بۇل ايەل زاتىنا اللانىڭ بەرگەن ءبىر كاسىبى دەپ بىلەمىن, – دەدى قوشتاساردا نۇرگۇل. ءيا, ونىڭ قولىنان شىققان كويلەگىن توزدىرعان قوستانايلىقتاردىڭ بارلىعى دا وعان سىي-قۇرمەتپەن قارايدى.
ءنازيرا جارىمبەتوۆا,
«ەگەمەن قازاقستان».
قوستاناي.