استانالىق ارمان شەكىموۆ كومەككە اسىعادى
پەندەلىكتىڭ پەردەسىن ءتۇرىپ تاستاپ, ءبىر ءسات ادامگەرشىلىكتىڭ تۇسىنا ايالدايىقشى. ابايدىڭ سۇراعىن وزىڭىزگە قويىپ كورىڭىزشى؟ وسى جاسقا دەيىنگى عۇمىرىڭىزدى قالاي وتكىزدىڭىز؟ ارنايى ۋاقىتىڭىزدى ءبولىپ مۇقتاجدىڭ مۇڭىنا, جارلىنىڭ جاعدايىنا ءۇڭىلىپ كوردىڭىز بە؟ «ءيا» دەسەڭىز, نۇر ءۇستىنە نۇر, «جوق» دەسەڭىز, ءسىزدىڭ ءالى دە ۋاقىتىڭىز بار. سەبەبى, قازىر ەلىمىزدە «جاقسىلىق جاسا» اتاۋىمەن اۋقىمدى اكتسيا وتۋدە. حالىقتىڭ كوبى قولدارىنان كەلگەن كومەكتەرىن كورسەتىپ, اتسالىسىپ جاتقانىن الەۋمەتتىك جەلىدەگى جازبالاردان بايقاۋعا بولادى. جوبانى ۇيىمداستىرۋشى, بلوگەر ماقسات تولەگەنوۆ ەكى اپتانىڭ ىشىندە ەلىمىزدىڭ تۇكپىر-تۇكپىرىنەن 100-دەن استام جازبا مەن بەينە روليكتەر كەلىپ تۇسكەنىن جەتكىزدى. سونداي-اق, «قازكونتەنت» اق باسقارما توراعاسىنىڭ ورىنباسارى زارينا نۇرلانوۆا, «ءۇي» قوعامدىق قورىنىڭ باسشىسى ارۋجان سايىن, «7-ارنانىڭ» اتقارۋشى ديرەكتورى باقىت ءالپەيىسوۆ, «تەنگرينيۋس» سايتىنىڭ باس رەداكتورى ايبەك الدابەرگەنوۆ, انشىلەر ديماش قۇدايبەرگەن مەن ءمولدىر اۋەلبەكوۆا دا باۋىرمالدىققا باۋليتىن وسىناۋ ىزگىلىكتى باستامانى قولدايتىندىقتارىن ءبىلدىردى.
مىسالى, سولتۇستىكقازاقستاندىق پوليتسەيلەردىڭ باسپاناسىز جاندارعا جىلى كيىم-كەشەكتەر تاراتقانى, پاۆلودار قالاسىنىڭ كاسىپكەرلەرى تۇرمىسى تومەن ازاماتتارعا ازىق-ت ۇلىكتى تەگىن ۇسىنىپ جاتقانى, پاۆلودار اۋدانىنا قاراستى ەفرەموۆكا اۋىلىندا مۇقتاج جاندار ءۇشىن تەگىن نان ۇلەستىرىلگەنى, تالدىقورعاندىق كاسىپكەردىڭ جەتىم بالالارعا كوڭىلدى دە كورىكتى دەمالىس سىيلاعانى اتالمىش اكتسيا اياسىندا اتقارىلعان ىستەر ەكەنىن ەستەرىڭىزگە سالامىز. سونداي يگى ىسكە بەيجاي قاراماي, بەلسەنە ارالاسقان ازاماتتاردىڭ قاتارىندا استانا قالاسىنىڭ تۇرعىنى ارمان شەكىموۆ تە بار. ول ءوزىنىڭ بوس ۋاقىتىندا جەكە كولىگىمەن مۇقتاج جانداردى كەرەك جەرىنە تەگىن جەتكىزىپ سالىپ, الىپ قايتىپ, ءارتۇرلى قيىنداۋ ماسەلەلەرىن قينالماي شەشۋگە كومەكتەسۋدە.
– مەن ساۋدا پسيحولوگياسىنىڭ ترەنينگ-مەنەدجەرىمىن, جۇمىس كۇندە بولا بەرمەيدى. ديۆاندا شالقادان ءتۇسىپ جاتا بەرگەنشە, بوس ۋاقىتىمدى وسىنداي جۇرتقا پايدا كەلتىرەتىن جۇمىسقا جۇمساعانىم دۇرىس بولار دەپ شەشتىم. بىردە, ءبىر تانىسىممەن سويلەسىپ وتىرعانىمدا, ول ءوزىنىڭ اياعىنان جۇرە المايتىن قۇربىسى بار ەكەنىن, وعان كومەك كەرەكتىگىن ايتتى. ول قىز جالدامالى ەسەپشى بولىپ جۇمىس ىستەيدى ەكەن. كەرەك جەرىنە جەتكىزىپ ءجۇردىم. العاشقى جۇمىسىم وسىلاي باستالدى. كەيىن مەنىڭ تەلەفون ءنومىرىم جان-جاققا تارالىپ, كومەككە مۇقتاجدار كوبەيدى. سوسىن باسقالار دا ءبىلسىن دەپ, فەيسبۋك الەۋمەتتىك جەلىسىنە جازىپ ەدىم, كوپ پىكىرلەر قالدىرىپ, كومەك كەرەك قانشاما جاندار حابارلاستى. بۇگىندە ولارمەن دوس بولىپ تا كەتتىك, – دەيدى ول.
مۇگەدەك جانداردى كەرەك جەرىنە جەتكىزىپ تاستاپ, مۇمكىندىگى جەتەتىن شارۋالارىن شەشىپ بەرۋدەن بولەك, ارماننىڭ جاساپ جۇرگەن تاعى ءبىر جاقسىلىعىن جاسىرىپ قالعىمىز كەلمەدى. ول كەز كەلگەن دۇكەننەن بىرنەشە ءبولكە نان ساتىپ الىپ, سول ساتىپ الىنعان نانداردى ساتۋشىعا تابىستاپ, ونى تۇرمىسى تومەن جاندارعا تەگىن بەرۋىن تاپسىرادى ەكەن.
ارماننىڭ اتقارىپ جۇرگەن وسى ىزگىلىكتى ىسىنە ستۋدەنتتەر مەن مەكتەپ جاسىنداعى وقۋشىلار دا قىزىعۋشىلىق بىلدىرۋدە. ءتىپتى, سىزبەن بىرگە ءجۇرىپ مۇقتاج جاندارعا كومەكتەسكىم كەلەدى دەگەندەر دە تابىلىپ جاتقان كورىنەدى. ال بۇنىڭ ءوزى «بۇگىنگى ءبۇلدىرشىننىڭ ساناسى ينتەرنەتكە بايلاۋلى» دەپ بايبالام سالىپ جۇرگەندەردىڭ اۋزىنا قاقپاق بولارى داۋسىز.
– مەنىڭ ماقساتىم ماقتاۋ ءسوز ەستىپ, ماراپات الۋ ەمەس, دەيدى ءبىزدىڭ كەيىپكەر. – جاساعان كىشكەنتاي جاقسىلىعىمىز كەيدە قوعامعا ۇلكەن وزگەرىس اكەلۋى ابدەن مۇمكىن. كومەككە مۇقتاج جاندارعا قولىمنان كەلگەنشە پايدامدى تيگىزە السام, مەن ءۇشىن ودان اسقان جەتىستىك جوق, – دەپ اعىنان جارىلدى ارمان.
جارتى الەمدى جاۋلاعان ءامىر تەمىر جالعان دۇنيەدەن وتەر الدىندا جانىنداعىلارعا امانات ايتىپتى:
– مەن ولگەن سوڭ جىلاپ-سىقتاپ, داۋىس كوتەرمەڭدەر. ونىڭ تۇككە قاجەتى جوق. اجالدى ايقايلاپ, قورقىتىپ قۋا ما ەكەن؟ كيىمدەرىڭدى جىرتىپ, جىندى ادامشا جۇگىرگەننەن گورى, اللادان «اللاھۋ اكبار» دەپ ماعان مەيىرىم تىلەڭدەر. جۇرەگىمدى جىلىتۋ ءۇشىن «فاتيحانى» وقىڭدار.
جارتى الەمدى جاۋلاعان ءامىر تەمىر دە مەيىرىمگە مۇقتاج.
«ءبىر كەم دۇنيە», دەيدى شەرحان مۇرتازا. ءبىزدىڭ قوعام كەيدە ولگەن ادام تۇگىلى, كوز الدىندا جۇرگەن كورشىسىنە دە مەيىرىم سىيلاي الماي جاتادى. وسىنداي تۇستا ارماننىڭ ءىسى كوپكە ۇلگى بولىپ, جاستاردى جاقسىلىق جاساۋعا تالپىندىرارى ءسوزسىز.
ونىڭ الەۋمەتتىك جەلىدەگى پاراقشاسىن پاراقتاپ وتىرىپ جۇزدەگەن ادامداردىڭ مىڭداعان پىكىرىنە كوزىمىز ءتۇستى. بىرەۋلەر «جارايسىڭ, جالعاستىرا بەر, سەندەي ادامداردىڭ بارىنا ءشۇكىر» دەپ رياسىز جۇرەگىنەن ريزاشىلىقتارىن ءبىلدىرىپ جاتسا, ەندى بىرەۋلەرى «بۇل ءجاي عانا اۋرەشىلىك, نەمەسە وزىنە جارناما جاساۋشىلىق» دەپ كەرتارتپا پىكىردىڭ كەرۋەنىنە ىلەسىڭكىرەپ كەتىپتى.
بەس ساۋساقتىڭ بىردەي ەمەستىگى بەلگىلى عوي. سوندىقتان, ونداي قىڭىر تارتقان ادامداردىڭ كوزقاراسىنا بولا مۇراتىمىزدى مۇقالتپاۋ كەرەك.
ارمان سياقتى ارمانى بولەك ازاماتتاردىڭ كولىگىمەن دە, كوڭىلىمەن دە اتقارىپ جاتقان ساۋاپتى ىستەرىن كورىپ, كوكىرەك قۋانىشقا كەنەلىپ, جاقسى جانداردىڭ بارىنا جان جۇبانادى. «ساداقانى ساۋىڭدا بەر» دەيتىن قازاق ماقالىنىڭ ماعىناسى تەرەڭ. بىراق, بۇگىنگى ادامداردىڭ ساناسى ساداقانى تەك ساۋدىراعان باقىرمەن شەكتەپ قوياتىنى قىنجىلدىرادى-اق. ولاي ەمەس, بىرەۋگە ك ۇلىپ قاراعاننىڭ ءوزى ساداقاعا جاتپاي ما؟ ەندەشە ءبىز اڭگىمە قىلىپ وتىرعان كەيىپكەردىڭ ارەكەتى كەيىنگى ۇرپاققا ۇلگى بولىپ, سانسىز ساۋاپ جازىلادى دەپ ۇمىتتەنەمىز.
ءبىر قاراعاندا, بۇنداي اقپاراتتاردىڭ تارالۋى «وڭ قولىڭ بەرگەن ساداقانى, سول قولىڭ بىلمەسىن» دەگەن قاعيداعا قاراما-قارسى كەلۋى مۇمكىن. ادام بالاسى ءالسىز جاراتىلىس يەسى بولعاندىقتان ءاردايىم ەسكەرتۋگە مۇقتاج. سوندىقتان, وسىنداي عيبراتتى دۇنيەلەردى كورگەن ادامنىڭ كوڭىلىنە مەيىرىم ۇيالاسا, ءجۇزى جىلى, جۇرەگى جۇمساق جاندار كوبەيمەي مە؟ ونىڭ ۇستىنە, كۇندەلىكتى كۇيبەڭ تىرشىلىك قايىرىمدىلىق جاساۋعا موينىمىزدى بۇرعىزباي تاستاعانىن دا مويىنداۋىمىز كەرەك. ەكى دۇنيەنىڭ مىرزاسى پايعامبارىمىز مۇحاممەد (س.ا.ۋ.) حاديسىندە حابارلاپ, «جاقسىلىق جاساۋدا جارىسىڭدار» دەپ ەسكەرتكەن.
ءسىز ءۇشىن تۇككە تۇرعىسىز نارسە بىرەۋلەرگە باعالى بايلىق, قول جەتپەس ارمان بولىپ كورىنۋى ابدەن مۇمكىن. سوندىقتان دا قولىڭىزدان كەلەتىن كومەكتىڭ كولەمىنە قاراماي, شىن جۇرەكتەن شىعۋىنا ءمان بەرىڭىز. مۇقتاجدارعا كومەك جاساۋعا اسىعىڭىز.استانالىق ارمان شەكىموۆتىڭ ىزگىلىكتى ۇلگىسى وسىعان شاقىرادى.
راۋان قايدار,
«ەگەمەن قازاقستان».
استانا.