«جۇمىسپەن قامتۋدىڭ جول كارتاسى-2020» مەملەكەتتىك باعدارلاماسىنىڭ تۇرعىندار ءۇشىن الەۋمەتتىك ءمانى زور. ويتكەنى, اتالعان باعدارلاما جۇمىسسىزدارعا جۇمىس بەرۋگە, ەڭبەك نارىعىنداعى سۇرانىستى قامتاماسىز ەتۋگە, مامانداردى قايتا دايارلاۋعا كەڭىنەن جول اشىپ وتىر. ءار جىلى اتالعان قۇجاتتا بەلگىلەنگەن مىندەتتەردى ورىنداۋ ءۇشىن ارنايى جۇمىس جوسپارى قۇرىلادى. جاڭا جانە بوسايتىن جۇمىس ورىندارىنا بولجام جاسالادى. سونىڭ ارقاسىندا جۇرتشىلىقتى جۇمىسپەن قامتۋعا مۇمكىندىك تۋادى.
وبلىس اكىمى كارىم كوكىرەكباەۆتىڭ جىل قورىتىندىسى بويىنشا ازىرلەگەن وبلىستىڭ 2015 جىلعى الەۋمەتتىك-ەكونوميكالىق دامۋىنىڭ نەگىزگى كورسەتكىشتەرىندە ءوڭىر بويىنشا جۇمىسسىزدار سانى 1255 ادامعا قىسقارعانى كورسەتىلگەن. سونىڭ ارقاسىندا جۇمىسسىزدىق دەڭگەيى 4,9 پايىزدى قۇراپ وتىر.
بىلتىر اۋداندا «ەڭبەك نارىعى» جانە «جۇمىسپەن قامتۋدىڭ جول كارتاسى-2020» اقپاراتتىق جۇيەلەر بازاسىنىڭ بىرىگۋىنە بايلانىستى 1577 ادامدى جۇمىسپەن قامتۋ تۋرالى كەشەندى جوسپار ءساۋىر ايىندا بەكىتىلدى. دەگەنمەن, ءبىز وعان دەيىن قول قۋسىرىپ قاراپ وتىرمادىق. جۇمىسسىزدىقپەن كۇرەس شارالارىنا قىزۋ كىرىسىپ, جىل ىشىندە 1680 ادامدى جۇمىسقا ورنالاستىرىپ, تاپسىرمانى 106,5 پايىزعا ورىندادىق.
«ينفراقۇرىلىمدى جانە تۇرعىن ءۇي-كوممۋنالدىق شارۋاشىلىقتى دامىتۋ ەسەبىنەن جۇمىسپەن قامتۋدى قامتاماسىز ەتۋ» باعىتى بويىنشا 10 نىسانعا 65,3 ميلليون تەڭگەگە 28 جۇمىس ورنىنىڭ تەڭ جارتىسىنا «جۇمىسپەن قامتۋدىڭ جول كارتاسى-2020» باعدارلاماسى اياسىندا 14 ادامدى جۇمىسقا ورنالاستىرۋ كوزدەلگەن بولاتىن. اۋدان تۇرعىندارى 14 جۇمىس ورنىنا قۇرىلىس جۇمىستارىنا تارتىلدى. بارلىق 10 نىساننىڭ جوندەۋ جۇمىستارى اياقتالعان.
ۇنەمدەلگەن قاراجات ەسەبىنەن قوسىمشا 2 جوباعا 17,3 ميلليون تەڭگە ءبولىنىپ, قوسىمشا 4 ادام جۇمىسقا ءجىبەرىلدى. 10 پايىزدىق زەينەتاقى جارنالارى الەۋمەتتىك تولەمدەرى ۋاقتىلى اۋدارىلدى. نەگىزى جول كارتاسىنىڭ ءبىرىنشى باعىتى بويىنشا 18 ادام جۇمىسپەن قامتىلۋى ءتيىس ەدى. ءبىز بۇل جوسپاردى تولىق ورىندادىق.
باعدارلامانىڭ ەكىنشى باعىتى – «كاسىپكەرلىك باستامانى ىنتالاندىرۋ جانە تىرەك اۋىلداردى كەشەندى دامىتۋ». جوسپارعا سايكەس 39 ازاماتتىڭ كاسىپكەرلىك باستاماسى ىنتالاندىرىلۋى كەرەك. ال اۋداندا بۇگىنگى كۇنى 46 ادامنىڭ ءوتىنىشى قاناعاتتاندىرىلىپ, ولار جالپى سوماسى 107 ميلليون 7 مىڭ تەڭگە نەسيە الدى. سونىڭ ىشىندە الدىڭعى نەسيەلەردىڭ قايتارىمى ەسەبىنەن 8 تۇرعىن 14,1 ميلليون تەڭگە نەسيەگە قول جەتكىزىپ وتىر. نەسيە الىپ, ءوز ءىسىن دامىتۋشى 46 كاسىپكەر 71 جاڭا جۇمىس ورىندارىن اشتى.
باعدارلامادا جۇمىس بەرۋشىنىڭ قاجەتتىلىگى شەڭبەرىندە وقىتۋ جانە قونىس اۋدارۋ ارقىلى جۇمىسقا ورنالاسۋعا جاردەمدەسۋ جولدارى دا قاراستىرىلعان. وڭىرلەردى دامىتۋ باعدارلاماسى بويىنشا اقىلى قوعامدىق جۇمىس ورىندارىنا جوسپارداعى 243 ادامنىڭ ورنىنا 249 تۇرعىن تارتىلدى. الەۋمەتتىك جۇمىس ورىندارىنا 80 جۇمىسسىز جولدانۋى كەرەك بولسا, 93 ادام قامتىلدى. «جاستار تاجىريبەسىنەن» 123 جاس مامان ءوتۋى ءتيىس ەدى. ال اۋدان بويىنشا 131 جاسقا وسىنداي مۇمكىندىك بەرىلدى. 1143 ازامات تۇراقتى جۇمىسقا ورنالاستى. ونىڭ ىشىندە 98 جۇمىسسىز جاڭا جۇمىس ورىندارىنا جولداما الدى.
وڭىرلەردى دامىتۋ سالالىق باعدارلاماسى شەڭبەرىندە, ناقتى ايتقاندا, «نۇرلى جول» باعدارلاماسىنىڭ اياسىندا 22 ادام تۇيمەكەنت ورتا مەكتەبىنىڭ جوندەۋ جۇمىستارىنا, 3 تۇرعىن كوكتال ورتا مەكتەبىنىڭ قازاندىعىن جانە ءمادىمار بالاباقشاسىنىڭ جوندەۋ جۇمىستارىنا, 7 ادام تۋبەركۋلەز اۋرۋحاناسى قۇرىلىسىنا جۇمىسقا جىبەرىلدى. بيىل اۋداندا ۇدەمەلى يندۋستريالىق-يننوۆاتسيالىق دامىتۋ باعدارلاماسى بويىنشا «اۋليە اتا فەنيكس» جشس قۇس فابريكاسىندا تاعى دا كوپتەگەن جۇمىس ورىندارى اشىلادى دەپ كۇتىلۋدە.
ارعىنباي ىسقاق,
بايزاق اۋدانى اكىمدىگى
حالىقتى جۇمىسپەن قامتۋ ورتالىعىنىڭ ديرەكتورى.
جامبىل وبلىسى,
بايزاق اۋدانى.