كەشە رەسپۋبليكالىق دياگنوستيكالىق ورتالىقتىڭ زەرتحانالىق مەديتسينا ورتالىعىندا «مەديتسينالىق زەرتحانالار. ساپا مەن قۇزىرەتكە قويىلاتىن تالاپتار» ISO 15189:2012 حالىقارالىق ستاندارتىنا سايكەستىگىن اككرەديتتەۋدىڭ قورىتىندى كەزەڭى ءوتتى.
ESYD حالىقارالىق اككرەديتتەۋشى ورگانى وتكىزگەن شاراعا «TÜV» (گەرمانيا) حالىقارالىق اككرەديتتەۋ جونىندەگى ەۋروپالىق ۇيىمىنىڭ جانە قازاقستان رەسپۋبليكاسىنىڭ اككرەديتتەۋ جونىندەگى ۇلتتىق ورتالىعىنىڭ وكىلدەرى قاتىستى. وسى ورايدا ايتا كەتەتىن ءبىر جايت, زەرتحانالىق زەرتتەۋلەر ناتيجەلەرى دارىگەرلەر ءۇشىن پاتسيەنتتەرگە دياگنوز قويۋدا جانە ەم تاعايىنداۋدا ماڭىزدى. ولاردىڭ تولىقتاي اۆتوماتتاندىرىلۋى جوعارى ساپانى قامتاماسىز ەتىپ, ساراپتامالاردىڭ ناتيجەلەرىن تەز ارادا الۋعا مۇمكىندىك بەرەدى.
زەرتحانالىق مەديتسينا ورتالىعى – جوعارى تەحنولوگيالىق زەرتحانالىق قىزمەتتەر ۇسىناتىن قازاقستانداعى ەڭ ءىرى ورتالىق. ول 2013 جىلى Joint Commission International (JCI) حالىقارالىق ستاندارتى بويىنشا اككرەديتتەۋدەن وتكەن رەسپۋبليكالىق دياگنوستيكالىق ورتالىعىنىڭ قۇرىلىمدىق بولىمشەسى. مۇندا ەلىمىزدىڭ بارلىق وڭىرلەرىنەن كەلەتىن بالالار مەن ەرەسەكتەر ءۇشىن 600-دەن استام زەرتحانالىق قىزمەت ءتۇرى كورسەتىلەدى. اتالعان ورتالىقتىڭ ەرەكشەلىگى سوندا, ول پوستكەڭەستىك كەڭىستىكتەگى JCI جانە ISO 15189:2012 اككرەديتتەۋىنەن وتكەن جالعىز ەمحانالىق-امبۋلاتوريالىق مەكەمە بولىپ تابىلادى.
جيىن بارىسىندا CDC/CLSI (اقش) ساراپشىلارى زەرتحانالىق مەديتسينا ورتالىعىن قازاقستان بويىنشا ەڭ ۇزدىك زەرتحانا دەپ تانىدى. مۇندا كۇن سايىن 3 مىڭنان استام, ال جىلىنا 1 ملن.-نان اسا زەرتحانالىق زەرتتەۋلەر وتكىزىلەتىن بولادى.
– «مەديتسينالىق زەرتحانالاردىڭ, ولاردىڭ ساپاسىنىڭ حالىقارالىق ستاندارتتارعا سايكەس بولۋى تۇرعىندارعا ۇسىنىلاتىن زەرتحانالىق قىزمەتتەردىڭ سەنىمدىلىگىنە جانە قاۋىپسىزدىگىنە بەرىلگەن كەپىلدىك بولىپ تابىلادى. جاڭا يننوۆاتسيالىق تەحنولوگيالاردى ەنگىزۋ, بارلىق ۇردىستەردى ستاندارتتاۋ مەديتسينالىق كومەكتىڭ ساپاسىن كوتەرۋگە مۇمكىندىك جاسادى», – دەدى رەسپۋبليكالىق دياگنوستيكالىق ورتالىقتىڭ باسشىسى قامالجان نادىروۆ.
راۋان قايدار,
«ەگەمەن قازاقستان».