«نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ باستاعان ۇگىت-ناسيحات توبى وڭتۇستىك قازاقستان وبلىسىنا ساپارى بارىسىندا «اۋىل تۇرعىندارىن جۇمىسپەن قامتۋ» پارتيالىق جوباسى بويىنشا مال شارۋاشىلىعىمەن اينالىساتىن تۇرعىندارمەن جانە «حيمفارم» اق ۇجىمىمەن كەزدەسىپ, «وڭتۇستىك» يندۋستريالىق ايماعىندا ىسكە اسىرىلىپ جاتقان جوبالارمەن تانىستى. تۇركىستان قالاسىندا شتاب مۇشەلەرى زيالى قاۋىم وكىلدەرىمەن جانە ايماق اقساقالدارىمەن جۇزدەسىپ, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىندە بولدى.
رەسپۋبليكالىق سايلاۋالدى شتاب مۇشەلەرىنىڭ قۇرامىندا ءماجىلىستىڭ V شاقىرىلىمىنىڭ دەپۋتاتتارى مايرا ايسينا, ساياسي كەڭەس بيۋروسىنىڭ مۇشەسى نۇرلان ءابدىروۆ, حالىق قاhارمانى باقىتجان ەرتاەۆ, «اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى نۇرجان التاەۆ, تەاتر جانە كينو اكتەرى نۇرلان ءالىمجانوۆ, ۇلتتىق مۇراجاي ديرەكتورى دارحان مىڭباي جانە وزگە دە تانىمال ادامدار بولدى. ۇگىت-ناسيحات توبىنىڭ مۇشەلەرى ءوڭىر شارۋالارىمەن كەزدەسىپ, ايماقتىڭ اۋىلشارۋاشىلىق سالاسىنداعى جەتىستىكتەرى مەن مۇمكىندىكتەرىن تالقىلادى.
وڭتۇستىك ءوڭىرى اۋىلشارۋاشىلىق ونىمدەرىن ءوندىرۋ بويىنشا رەسپۋبليكادا ەكىنشى ورىندا. بەس جىل ىشىندە ءوندىرىس كولەمى 2,1 ەسەگە, وسىمدىك شارۋاشىلىعى 2,2 ەسەگە, ال مال شارۋاشىلىعى 2 ەسەگە ارتقان. «ەلباسى اۋىل تۇرعىندارىن جۇمىسپەن قامتاماسىز ەتۋ ماسەلەسىن قاتاڭ تاپسىرىپ وتىر. وسى تاپسىرماعا سايكەس, بيىلعى جىلى ۇكىمەتپەن بىرگە ەلىمىزدىڭ بەس وبلىسىندا قاناتقاقتى جوبا باستالدى. وعان 11 ميلليارد تەڭگەگە جۋىق قارجى قارالعان», – دەدى اسقار يسابەك ۇلى.
سونداي-اق, كەزدەسۋ «حيمفارم» اق-تا جالعاستى. كاسىپورىن SANTO اتاۋىمەن 200-دەن استام ءونىم ءتۇرىن شىعارادى. زاۋىتتىڭ قۋاتتىلىعى جىلىنا 1,2 ملرد. تابلەتكا جانە كاپسۋلا, 294 ملن. امپۋلا, 6 ملن. ينفۋزيا, 40 ملن. انتيبيوتيك فلاكوندارىن جانە 26 ملن. سيروپ شىعارۋعا جەتەدى. شىمكەنت قالاسىنداعى «وڭتۇستىك» يندۋستريالىق ايماعىندا شتاب دەلەگاتسياسى شاعىن جانە ورتا بيزنەس وكىلدەرىمەن كەزدەستى. بۇل ايماق 2010 جىلى قۇرىلعان. مۇنداعى جوبالار مەتاللۋرگيا, حيميا جانە جەڭىل ونەركاسىپ, قۇرىلىس يندۋسترياسى, ماشينا جاساۋ سالالارىنا باعىتتالعان.
ال تۇركىستانداعى تاريحي-مادەني ەتنوگرافيالىق ورتالىقتا پارتيانىڭ رسقش وكىلدەرى اقساقالدارمەن جانە زيالى قاۋىم وكىلدەرىمەن كەزدەسۋ وتكىزىپ, ەلىمىزدىڭ ءارى قارايعى دامۋ ءماسەلەلەرىن تالقىلادى. كەزدەسۋدە تۋريزم سالاسىن دامىتۋ ماسەلەسى دە ءسوز بولدى.
اسقار تۇراپباي ۇلى,
«ەگەمەن قازاقستان».
وڭتۇستىك قازاقستان وبلىسى.