كەشە «اۋىل» حالىقتىق-دەموكراتيالىق پاتريوتتىق پارتياسى رەسپۋبليكالىق قوعامدىق شتابىنىڭ ورتالىق كەڭسەسىندە «دەنساۋلىق جولى» تاقىرىبىندا حالىقتى سالاماتتى ءومىر سالتىنا باۋلۋ ىسىنە ارنالعان عىلىمي-تاجىريبەلىك كونفەرەنتسيا ءوتتى.
عالىمدار, سالاماتتى ءومىر سالتىن قالىپتاستىرۋ باعىتىندا قىزمەت كورسەتەتىن ورتالىقتاردىڭ وكىلدەرى, دەنساۋلىق ساقتاۋ سالاسى مەكەمەلەرىنىڭ ماماندارى, ساراپشىلار جانە پارتيا مۇشەلەرى قاتىسقان كونفەرەنتسيانى «اۋىل» حدپپ توراعاسىنىڭ ءبىرىنشى ورىنباسارى, پارلامەنت ءماجىلىسىنىڭ دەپۋتاتتىعىنان ۇمىتكەر, مەديتسينا عىلىمدارىنىڭ دوكتورى تولىمبەك عابدىلاشىموۆ اشىپ, كىرىسپە ءسوز سويلەدى.
– بۇگىنگى جيىنىمىز قوعامىمىزدا سالاماتتى ءومىر سالتىن قالىپتاستىرۋ ءماسەلەسىنە ارنالىپ وتىر. باسقوسۋعا جينالعانداردىڭ كوپشىلىگى مەديتسينا سالاسىنىڭ بىلىكتى, تاجىريبەلى ماماندارى. سوندىقتان, وسى كونفەرەنتسيادا تاقىرىپقا قاتىستى تۇششىمدى ويلار, ۇسىنىستار ايتىلادى دەپ كۇتەمىز.
جالپى, قازاقتا «اۋىرىپ ەم ىزدەگەنشە, اۋىرمايتىن جول ىزدە» دەگەن ءسوز بار. اۋىرعىمىز كەلمەيدى, بىراق دەنساۋلىقتى ساقتاۋعا ءجوندى ءمان بەرە قويمايمىز. از قوزعالۋ, دۇرىس تاماقتانباي, جاعىمسىز ادەتتەرگە بوي الدىرۋ ءبىزدىڭ دەنساۋلىعىمىزدى بىرتىندەپ تومەندەتىپ جاتقانى جاسىرىن ەمەس. اسىرەسە, اۋىلداعى اعايىننىڭ اۋرۋىن اسقىندىرىپ الىپ, قالاعا سابىلاتىنى بۇگىنگى كۇننىڭ شىندىعى, – دەدى ت.عابدىلاشىموۆ. ونىڭ ايتۋىنشا, قازىرگى تاڭدا حالىقتىڭ دەنساۋلىعى مەملەكەتتىڭ باستى نازارىندا تۇر.
بۇدان كەيىن سپيكەر «اۋىل» پارتياسىنىڭ سايلاۋالدى باعدارلاماسىنىڭ باسىم باعىتتارىمەن تانىستىرا كەلىپ, دەنساۋلىق ساقتاۋ سالاسىنداعى مەملەكەتتىك ساياسات ناقتى ماقساتتار مەن ينديكاتورلارعا يە بولۋى ءتيىس ەكەنىنە ەكپىن بەردى. سونداي-اق, ول دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سۇيەنە وتىرىپ, ادام دەنساۋلىعىنىڭ تەك 10 پايىزى مەديتسينا جۇيەسىنە بايلانىستى ەكەنىن, 50 پايىزى ادامنىڭ ءومىر ءسۇرۋ سالتىنا سايكەس قالىپتاساتىنىن جەتكىزدى.
جيىندا ل.ن.گۋميلەۆ اتىنداعى ەۇۋ پروفەسسورى, ەكولوگ مۇرات نۇرىشەۆ, سالاماتتى ءومىر سالتىن قالىپتاستىرۋ ۇلتتىق ورتالىعى باس ديرەكتورىنىڭ كەڭەسشىسى كلارا مەدەۋباەۆا, دارىگەر-ەندوكرينولوگ جانار انارباەۆا, استانا قالاسىنداعى №7 ەمحانا باس دارىگەرىنىڭ ورىنباسارى باقىت ىدىرىسوۆا, قاراعاندى وبلىسى نۇرا اۋداندىق ورتالىق اۋرۋحاناسىنىڭ ديرەكتورى باقتىگۇل مۇقىشەۆا جانە استاناداعى «دارىگەرلىك-الەۋمەتتىك وڭالتۋ ورتالىعى» مەملەكەتتىك مەكەمەسىنىڭ ناركولوگى توقتار قويشىبەكوۆ بايانداما جاساپ, كوپشىلىكتى تولعاندىرىپ ءجۇرگەن بىرقاتار وزەكتى ماسەلەلەردى ءسوز ەتتى.
جولدىباي بازار,
«ەگەمەن قازاقستان».
استانا.