جالپىۇلتتىق سوتسيال-دەموكراتيالىق پارتيانىڭ مۇشەلەرى شىعىسقازاقستاندىق تۇرعىندارمەن كەزدەستى. وسكەمەن قالاسىنداعى №7 ورتا مەكتەپتە وتكەن كەزدەسۋگە پارلامەنت ءماجىلىسى دەپۋتاتتىعىنان ۇمىتكەر ءۋاليحان قايساروۆ پەن راحىم ايىپ ۇلى قاتىستى.
– ءار ادامنىڭ ازاماتتىق پارىزى بولادى. كەز كەلگەن قازاقستاندىق «ەلىمنىڭ تاعدىرى مەنىڭ قولىمدا تۇر» دەپ ويلاۋى ءتيىس. ەگەر ادام ءوزىنىڭ ساياسي قۇقىقتارىنا بايىپتى تۇردە قاراماسا, وندا ونىڭ بيلىكتەن باسقا دا قۇقىعىن تالاپ ەتۋى ورىنسىز بولار ەدى. ياعني, ازامات رەتىندە مەملەكەت ءىسىنىڭ دامۋىنا, دەموكراتيانىڭ العا جىلجۋىنا ۇلەس قوسپاسا, ول مەملەكەتتىڭ تاعدىرىنا عانا ەمەس, ءوز ومىرىنە دە بەيقام قارايدى دەپ ۇققانىمىز ءجون. سوندىقتان, سايلاۋ – كەز كەلگەن دەموكراتيانىڭ نەگىزگى قاعيداسى سانالادى, – دەپ باستادى ءوزىنىڭ ءسوزىن پارتيا مۇشەسى ءۋاليحان قايساروۆ.
جسدپ وكىلدەرى پارتيانىڭ سايلاۋالدى باعدارلاماسىنىڭ ەرەكشەلىكتەرى كوپ ەكەنىن ايتا كەلىپ, ونىڭ نەگىزگى ەكى باعىتىنا توقتالدى.
– حالىقتىڭ الەۋمەتتىك جاعدايىن جاقسارتۋ ءۇشىن ەڭ الدىمەن سىبايلاس جەمقورلىقپەن كۇرەس جۇرگىزۋىمىز كەرەك. جەڭ ۇشىنان جالعاسۋعا توزبەي, وعان ءتۇبەگەيلى توقتام قويعاندا عانا ەكونوميكامىز العا جىلجيدى. جەمقورلىق – ادامنىڭ رۋحاني جان دۇنيەسىن بىلعايدى, ىشكى ۇستانىمدارىن جويادى. جەمقورلىقتى جەڭبەسەك, بيۋدجەت قارجىسى ماقساتتى تۇردە جۇمسالمايدى. ەكىنشىدەن, پارتيامىز سىبايلاس جەمقورلىقتى جويۋعا ۇلكەن ماڭىز بەرەدى. جەمقورلىقپەن كۇرەسە وتىرىپ, مەملەكەتتىڭ اۋقىمدى قارجىسىن ەل يگىلىگىنە جۇمساۋعا جول اشۋ قاجەت. بيۋدجەت ءتيىمدى يگەرىلگەندە قارجى تەككە ءراسۋا بولمايدى, – دەدى ءۋاليحان قايساروۆ.
سونداي-اق, جالپىۇلتتىق سوتسيال-دەموكراتيالىق پارتيا بەلسەندىلەرى شاعىن جانە ورتا كاسىپكەرلىكتى دامىتۋدىڭ وزەكتىلىگىنە توقتالدى. كەڭەس وداعىنىڭ تۇسىندا كووپەراتيۆتەردى سالىقتان ءۇش جىلعا دەيىن بوساتۋ ءتاجىريبەسى بولعانى بەلگىلى. قارجىنى ەسەلەۋ ءۇشىن كاسىپكەرلىككە كوپتەگەن مۇمكىندىكتەر بەرىلۋى ءتيىس, دەيدى ولار. سونىڭ ءبىرى – ەكىنشى دەڭگەيلى بانكتەر ۇسىناتىن نەسيە قارجىسىنىڭ پايىزدىق ءمولشەرلەمەسىن تومەندەتۋ.
– شەتەلدەردەن 1,5 پايىزدىق ءمولشەرلەمەمەن كەلگەن نەسيەنى وتاندىق ەكىنشى دەڭگەيلى بانكتەر نەسيە الۋشىلارعا ون ەسە قىمباتتاتىپ ۇسىنادى. بۇل قولدا بار قارجىمىزدى وسىرۋگە ءمۇمكىندىك بەرمەي وتىر. ەگەر پايىزدىق ۇستەمەنى تومەندەتۋگە قول جەتكىزسەك, جاستارىمىزدىڭ ارزان نەسيەمەن باسپانالى بولۋىنا جانە جەكە كاسىبىن قۇرۋعا جول اشىلار ەدى. سونداي-اق, باسقالار دا بانكتەردەن نەسيە الىپ, اسا قاجەت دەگەن دۇنيەلەرىنە قول جەتكىزەر ەدى. تولەگەن كەزدە دە كوپ قينالماس ەدى, – دەدى پارتيا مۇشەلەرى.
دۋمان اناش,
«ەگەمەن قازاقستان».
وسكەمەن.
سۋرەتتى تۇسىرگەن
ەسىمحان ورىنباەۆ.