ەلىمىز يننوۆاتسيالىق جولمەن دامۋدى مىقتاپ قولعا العان. ونىڭ العاشقى ناتيجەلەرى كوڭىل قۋانتادى. بۇل جونىندە ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا «تەحنولوگيالىق دامۋ جونىندەگى ۇلتتىق اگەنتتىك» اق باسقارما توراعاسىنىڭ ورىنباسارى جۇماتاي ءسالىموۆ ايتتى.
ۇلتتىق اگەنتتىك يننوۆاتسيالىق دامۋ ساياساتىن جۇزەگە اسىرۋشى ەكەنىن جەتكىزگەن سپيكەر, وسى باعىتتا مەملەكەت باسشىسى العا قويعان ماقساتتاردى ورىنداۋ ءناتيجەلى بولىپ جاتقانىنا توقتالدى. «قازىرگى تاڭدا يننوۆاتسيالىق جوباسىن ۇسىنىپ, كورسەتۋگە جانە ونى جۇزەگە اسىرۋعا بارلىق جاعداي جاسالىپ جاتىر دەۋگە بولادى. ول ءۇشىن ءبىزدىڭ تاراپىمىزدان بارىنشا قولداۋ مەن كومەك كورسەتىلەدى. ەلىمىزدىڭ عالىمدارى مەن ونەرتاپقىشتارى كەز كەلگەن جاڭالىعىن كورسەتىپ, ونىڭ پايدالى ەكەنىن دالەلدەي السا ونى جەكەشەلەندىرىپ, پاتەنتتەپ الۋىنا ءبىز كومەكتەسەمىز», دەدى ج.ءسالىموۆ.
باسقارما توراعاسىنىڭ كەلتىرگەن مالىمەتتەرىنە سۇيەنسەك, ءوتكەن جىلى 462 ءوتىنىم كەلىپ ءتۇسىپتى. بۇل رەكوردتىق كورسەتكىش كورىنەدى. ولاردىڭ ىشىندە ساراپشىلاردىڭ ىرىكتەۋىنەن ءوتىپ, ءىس قورىتىندىسى بويىنشا جالپى سوماسى 1 ملرد. 623 ملن. تەڭگەنى قۇرايتىن 51 جوبا ناقتى قولداۋعا يە بولىپتى. «2013 جىلى 188 ءوتىنىم كەلىپ ءتۇسىپ, 822,8 ملن. تەڭگەگە 44 كەلىسىمگە قول قويىلدى. ال بۇرناعى جىلى ءبىز 280 ءوتىنىمدى قابىلدادىق. ونىڭ ىشىندە جالپى سوماسى 641,1 ملن. تەڭگەنى قۇرايتىن 38 جوبا گرانتقا يە بولدى. ەندى بىلتىرعى جىلعا كەلسەك, ءدال قازىرگى ۋاقىتتا 185 ءوتىنىم ساراپشىلاردىڭ قاراۋىندا ىرىكتەلىپ جاتىر. بۇل جۇمىس وسى ءبىرىنشى توقساننىڭ اياعىنا دەيىن مارەسىنە جەتەدى دەپ وتىرمىز. وتىنىمدەر سانىنىڭ مۇنشالىقتى كوبەيۋىنە جوبالاردى قارجىلاندىرۋ ماسەلەسىنىڭ جاقسارۋى مەن ەلىمىزدىڭ 8 وڭىرىندە ورنالاسقان جۇزدەن استام وتاندىق كاسىپورىندارمەن جۇرگىزىلگەن ناسيحات جۇمىستارى اسەر ەتتى دەپ ويلايمىز», دەدى توراعا ورىنباسارى.
«تەحنولوگيالىق دامۋ ءجونىندەگى ۇلتتىق اگەنتتىك» اق-تىڭ ءمالىمەتىنە قاراعاندا, گرانت الۋشىلاردىڭ اراسىندا «عالام», «ەلەكتروۆوز قۇراستىرۋ زاۋىتى» جانە «Swissgrow» سەكىلدى كومپانيالار بار. بەلگىلى بولعانداي, «عالام» جشس عارىشتىق اپپاراتتار ءۇشىن قاجەتتى كۇن ساۋلەسىنىڭ قۋاتىن انىقتايتىن قۇرىلعىنى وندىرەتىن جاڭا تەحنولوگيانى ەنگىزۋدە. «گرانتتىق باعدارلامانىڭ ناقتى تيىمدىلىگى تۋرالى ايتاتىن بولساق, 2015 جىلى يننوۆاتسيالىق جوبالاردى جۇزەگە اسىرۋ بارىسىندا 800-گە جۋىق جۇمىس ورنى, ونىڭ ىشىندە 403-ءى كاسىپورىنداردا,
343-ءى ستارتاپ جوبالاردىڭ نەگىزىندە قۇرىلدى. گرانت الۋشىلار وتكەن جىلى 1,25 ملرد. تەڭگە كولەمىندە سالىق تولەدى, 22 ملرد. تەڭگەنىڭ ءونىمىن شىعاردى. بۇلارمەن بىرگە, سىرتقى نارىققا شىعارىلعان ەكسپورت كولەمى 8 ملرد. تەڭگەگە جۋىقتادى», دەدى ج.ءسالىموۆ.
ەلىمىزدەگى يننوۆاتسيا جانە وزگە دە ءتۇرلى عىلىممەن شۇعىلداناتىن جاندارعا ناقتى قولداۋلار كورسەتىلىپ وتىرعانىن ايتقان سپيكەر, الەمگە ايگىلى اعىلشىن عالىم-استروفيزيگى ستيۆەن حوكينگ قازاقستاندىق جاس عالىم يسااك مۋستوپۋلومەن كەزدەسۋگە كەلىسىمىن بەرگەنىن ايتتى. بىلتىر تاراز قالاسىنىڭ 14 جاستاعى تۇرعىنى يسااك مۋستوپۋلو «ۇيلەسىمدىلىك تەورياسى» عىلىمي جۇمىسىن ازىرلەپ, وقۋشىلار اراسىندا وتەتىن ۇلتتىق يننوۆاتسيالىق جوبالار كونكۋرسىنىڭ ارنايى سىيلىعىنا يە بولعان ەدى. سول كەزدە بايقاۋ ۇيىمداستىرۋشىلارى جاس عالىمنىڭ ارمانىن ورىنداۋعا كومەكتەسەتىندەرىن ايتقان. سونداعى يسااكتىڭ ارمانى, ايگىلى عالىم-استروفيزيك, مۇگەدەك ارباسىنا تاڭىلىپ وتىرسا دا, عىلىمدا اسا ماڭىزدى جاڭالىقتار اشقان ستيۆەن حوكينگپەن كەزدەسۋ ەدى. «ستيۆەن حوكينگتىڭ حاتشىلىعىنان جاۋاپ كۇتىپ وتىرمىز. ول كىسىدە ۋاقىت تاپشى ەكەنى ءمالىم. دەسە دە, ولار قازاقستاندىق جاس عالىممەن كەزدەسۋگە قىزىعۋشىلىق تانىتىپ وتىر. ءتىپتى يسااكپەن كەزدەسىپ, ونىڭ عىلىمي جۇمىسىن تالقىلاۋعا دا دايىن. بۇعان قوسا, وقۋشىعا بريتاندىق عىلىم مۇراجايىن كورسەتىپ, كەمبريدجگە اپارۋدى دا جوسپارلاعانبىز», دەدى باسقارما توراعاسىنىڭ ورىنباسارى.
نۇرباي ەلمۇراتوۆ,
«ەگەمەن قازاقستان».