قوستاناي. 10 ناۋرىز. يران ينۆەستورلارى قوستاناي وڭىرىنەن 100 مىڭ گەكتار قۇنارلى جەردى جالعا الاتىن بولدى. ولار بۇل القاپقا ءداندى جانە مايلى داقىلدار ەگەدى. بۇل تۋرالى alau.kz سايتىنا سىلتەمە جاساعان egemen.kz ءتىلشىسى حابارلادى.
يراننىڭ «دجاحار-ە-سابز» فيرماسى قازاقستاندا بىرنەشە جىلدان بەرى جۇمىس ىستەپ كەلەدى. ول ەلىمىز ەكونوميكاسىنا وسى ۋاقىتقا دەيىن 20 ميلليون دوللار ينۆەستيتسيا سالدى. يراندىق فيرما ەلدىڭ باتىس وبلىستارىندا قۇس شارۋاشىلىعىمەن, وڭتۇستىك وبلىستاردا كوگالداندىرۋ ءىسى مەن اينالىسقان بولاتىن. ەندى قوستاناي وبلىسىندا ەگىن شارۋاشىلىعىن اينالدىرماق. ول ءۇشىن قوستاناي وڭىرىنەن اۋىل شارۋاشىلىعى ماقساتىنا 100 مىڭ گەكتار جەردى جالعا الۋعا ءۇش جىلدىق جوبا ۇسىندى.
«دجاحار-ە-سابز» فيرماسىنىڭ جەتەكشىسى سەيد ءال اكبار حوسەيني: «يراندا استىق پەن مايلىق داقىلدار وتە تاپشى. بۇل پروبلەمانى ءبىز گەرمانيا مەن ارگەنتينادان بيداي, زىعىر, راپس ساتىپ الۋ ەسەبىنەن شەشەمىز. ءبىزدىڭ ەلدىڭ اۋىلشارۋاشىلىعى ءمينيسترى وسى داقىلداردى ءوزىمىزدىڭ ەگۋىمىزدى مىندەتتەدى», – دەدى.
ينۆەستورلاردىڭ ايتۋىنشا, ولاردىڭ بۇل داقىلداردى وسىرۋدە تاجىريبەسى بار. ال وبلىس اكىمى ارحيمەد مۇحامەدوۆ جەرگىلىكتى ديقاندار يرانعا بيدايدى بۇرىنعىدان ءۇش ەسە كوپ ەكسپورتتاۋعا دايىن ەكەنىن ايتتى. اۋىل شارۋاشىلىعى داقىلدارىن ساتۋدى 3 ميلليون تونناعا دەيىن جەتكىزۋگە بولادى. بىراق بۇل ءۇشىن اكىم ينفراقۇرىلىم كەرەكتىگىن ەسكەرتتى.
قوستاناي وبلىسىنىڭ اكىمى ارحيمەد مۇحامبەتوۆ: «استىقتى ارتاتىن, تاسيتىن تەرمينالداردى سولتۇستىك وبلىستاردان دا سالۋعا بولادى. ءبىز وعان كومەك بەرەمىز. ءبىز جەرگىلىكتى اۋىل شارۋاشىلىعىن وندىرۋشىلەر, ءتىپتى شاعىن قوجالىقتار ءوز استىعىن ەكسپورتقا تىكەلەي شىعارا الاتىن مۇمكىندىككە جەتۋىن ماقسات تۇتىپ وتىرمىز», – دەدى.
يراندىق ينۆەسترورلارعا بەرەتىن ەگىس القابىنىڭ ورنى ءالى انىقتالعان جوق. تەك ونىڭ وبلىستىڭ توپىراعى قۇنارلى جانە تەمىر جول مەن تاس جول جاقىن, ينفراقۇرىلىمى جاقسى سولتۇستىك اۋداندارىنىڭ بىرىنەن بولىنەتىنى بەلگىلى.
ءنازيرا جارىمبەتوۆا.
دەرەك, سۋرەت: alau.kz.