كەشە «اۋىل» حالىقتىق-دەموكراتيالىق پاتريوتتىق پارتياسىنىڭ ورتالىق اپپاراتىندا جاڭا رەداكتسياداعى ەڭبەك كودەكسىنىڭ نەگىزگى ەرەجەلەرىن ءتۇسىندىرۋ بويىنشا ونلاين-سەمينار ءوتتى.
اتالعان سەمينارعا بارلىق دەڭگەيدەگى اگروقۇرىلىم قىزمەتكەرلەرى, پارتيا ءمۇشەلەرى, رەسپۋبليكالىق قوعامدىق شتاب وكىلدەرى, سونىمەن قاتار, سكايپ بايلانىس ارقىلى ۇيىمنىڭ بارلىق ايماقتىق قوعامدىق شتاب مۇشەلەرى قاتىستى.
جيىندا قازاقستان كاسىپوداقتارى فەدەراتسياسى توراعاسىنىڭ ورىنباسارى گۇلنار جۇماگەلديەۆا كاسىپورىننىڭ ەكونوميكالىق جاعدايى ناشارلاعان جاعدايدا قىزمەتكەردى جۇمىستان شىعارۋ, تولىق ەمەس جۇمىس رەجىمى, سونداي-اق, ەڭبەك قۇقىعىن قورعاۋ جانە ونەركاسىپتىك قاۋىپسىزدىك ماسەلەلەرى بويىنشا اڭگىمەلەپ بەردى. بۇلاردان بولەك, گ.جۇماگەلديەۆا ەڭبەك داۋلارىن شەشۋ ماسەلەسىنە كەڭىنەن توقتالدى. ونىڭ ايتۋىنشا, كودەكسكە ۇجىمدىق نەمەسە جەكە ەڭبەك داۋلارىن شەشۋ, مەدياتسيا ءتارتىبىن پايدالانۋ سەكىلدى جاڭاشىلدىقتار ەنگىزىلگەن.
جالپى, «اۋىل» پارتياسى ادامي رەسۋرستاردى دامىتۋ, جۇمىسشىلاردىڭ ەڭبەك قۇقىقتارىن قورعاۋ جانە وعان كەپىلدىك بەرۋدى ءوزىنىڭ باستى مىندەتتەرىنىڭ ءبىرى دەپ سانايدى. وسى مىندەتتەردى جۇزەگە اسىرۋ ءۇشىن پارتيا وتكەن جىلى قازاقستان كاسىپوداقتارى فەدەراتسياسىمەن ىنتىماقتاستىق جانە تۇسىنىستىك تۋرالى مەموراندۋمعا قول قويعان بولاتىن.
سونىمەن بىرگە, «اۋىل» پارتياسى «لايىقتى ەڭبەك» پارتيالىق جوباسىن جۇزەگە اسىرعان-دى. بۇل جوبا ەڭبەك كەلىسىمشارتىنىڭ تۇراقتى ءارى مىندەتتى تۇردە جاسالۋىنا, ەڭبەك داۋلارىن شەشۋدىڭ ءتيىمدى تاسىلدەرىن تابۋعا, جۇمىس ورىندارىن كوپتەپ اشۋعا باعىتتالعان.
ونلاين-سەمينار بارىسىندا گ.جۇماگەلديەۆا قاتىسۋشىلار تاراپىنان قويىلعان كوپتەگەن سۇراقتارعا جاۋاپ بەردى. شارادا ەڭبەك قارىم-قاتىناسى سالاسىندا قوعامدىق باقىلاۋ جۇيەسىن ورناتۋ باعىتىندا حالىقتىڭ ساۋاتتىلىعىن كوتەرۋ ءىسىنىڭ ماڭىزدىلىعى اتاپ ءوتىلدى.
ايتا كەتەيىك, وتكەن جەكسەنبىدە «اۋىل» پارتياسىنىڭ رەسپۋبليكالىق قوعامدىق شتابى اۋىلداعى ۇزدىك بيزنەس-جوبالاردى ناسيحاتتايتىن «گۇلدەنگەن اۋىل» اكتسياسىنىڭ باستالعانىن رەسمي جاريا ەتتى. اكتسيا ماقساتى – بارلىق ايماقتاردان اۋىلدا جۇزەگە اسىرۋعا ىڭعايلى, كەلەشەگى بار, ءتيىمدى بيزنەس-جوبالاردى جيناقتاۋ. پارتيالىق بۇل جوبانىڭ تاعى ءبىر ماقساتى – اۋىلدىق جەرلەردە ءوزىن ءوزى جۇمىسپەن قامتىعان حالىق سانىن كوبەيتۋ. وسى ورايدا, «اۋىل» پارتياسىنىڭ حاتشىسى ءبورىباي جەكسەمبين: «اۋىلدا ماتەريالدىق جانە ادامي رەسۋرس وتە جوعارى. ول بۇگىندە تولىق دەڭگەيدە قولدانىلماي وتىر. بۇل جوبانىڭ نەگىزگى ماقساتى – اۋىل حالقىنا ءوز كاسىبىن باستاۋعا كومەكتەسۋ, ىنتالاندىرۋ, بيزنەس-يدەيامەن ءبولىسۋ», – دەدى.
اكتسيانىڭ تۇساۋكەسەرىنە «اۋىل» پارتياسىنىڭ مۇشەلەرى, دەپۋتاتتىقتان ۇمىتكەرلەر, بيزنەس وكىلدەرى قاتىستى.
جولدىباي بازار,
«ەگەمەن قازاقستان».
استانا.