«بىرلىكتىڭ» كوزدەگەنى بەرەكەلى تىرلىك

قاراعاندى قالاسىندا «بىرلىك» ساياسي پارتياسىنىڭ مۇشەلەرى كەن-شاحتا جابدىقتارىن جوندەۋمەن جانە قىزمەت كورسەتۋمەن اينالىساتىن «قۇرىلىس مەت» كومپانياسىنىڭ ۇجىمىمەن كەزدەستى. پارتيا وكىلدەرى وندىرىستىك تسەحتاردى ارالاپ, كاسىپورىننىڭ بۇگىنگى تىنىس-تىرلىگىمەن تانىستى. كەزدەسۋ بارىسىندا پارتيا توراعا­سىنىڭ ورىنباسارلارى بولات بايقاداموۆ پەن باۋىرجان بورىبەك «بىرلىك» پارتياسىنىڭ سايلاۋالدى باعدارلاماسى تۋرالى بايانداپ بەردى. جالپى, اتالعان پارتيانىڭ باستى ماقساتتارىنىڭ ءبىرى – شاعىن جانە ورتا بيزنەستىڭ دامۋى مەن كەڭ ءورىس الۋىنا جاعداي جاساپ, ەلىمىزدە الەۋمەتتىك مۇقتاجدىقتاردان ادا ورتا تاپتىڭ قالىپتاسۋىنا يگى ىقپال ەتۋ. پارتيا وكىلدەرى ءوز سوزدەرىندە كوبىنە وسى مىندەتتەردى اڭگىمە ارقاۋىنا اينالدىرىپ, مۇنداي يگى ىستەردى قالايشا جانە قانداي جولدارمەن جۇزەگە اسىرۋعا بولاتىنىن ەگجەي-تەگجەيلى ءتۇسىندىردى. «بىرلىك» ساياسي پارتياسى «تازا قا­زاقستان ءۇشىن» بولاشاق ەكولوگيالىق قوز­عا­لىستىڭ باستاماشىسى رەتىندە ءوزىنىڭ تابيعاتتى قورعاۋ قىزمەتىن قارا­عاندى سياقتى ءىرى ونەركاسىپتى ءوڭىر­دەن باستاپ وتىر. زاماناۋي, ەكولو­گيا­لىق تازا تەحنولوگيالاردى ەنگىزۋ رەسۋرس­تاردى ساقتاپ قانا قويماي, ونەركاسىپ­شى­لەردىڭ جۇمىسىن قاۋىپسىز ەتەدى, بۇكىل تۇرعىنداردىڭ ءومىرى ءۇشىن بۇدان دا قو­لايلى جاعدايلار جاسايدى», – دەدى پارتيا توراعاسىنىڭ ورىنباسارى باۋىرجان بورىبەك. راس, قاراعاندى وبلىسى – ەلى­مىز­دىڭ يندۋستريالىق تىرەگى. بۇل وڭىردە «ارسەلورميتتال تەمىرتاۋ», «قازاقمىس» كورپوراتسياسى» سىندى اسا ءىرى ءوندىرىس وشاقتارى, شاعىن جانە ورتا بيزنەستىڭ ءوندىرۋشى كاسىپورىندارى شوعىرلانعان. سول سەبەپتى دە, «بىرلىك» پارتياسى ءوزىنىڭ ءوڭىر­لەردەگى سايلاۋالدى كەزدەسۋلەرىنىڭ ءبىرىن كەنشىلەر استاناسىندا وتكىزىپ وتىر. «بىرلىك» پارتياسىنىڭ قاراعاندى وبلىستىق فيليالىنىڭ توراعاسى سەرىك­بول ءابجانوۆ كسرو كەزىندە سالىنعان كوپتەگەن ونەركاسىپ ورىندارىنىڭ حالىقارالىق ەكولوگيالىق نورمالار تالاپتارىنا ساي كەلمەيتىنىن تىلگە تيەك ەتتى. «مەملەكەت باسشىسىنىڭ ەكونوميكا سالاسىن كەڭ كولەمدە يندۋستريالىق-يننوۆاتسيالىق رەفورمالاۋ بويىنشا بەرگەن تاپسىرمالارى اياسىندا ەلىمىزدىڭ بارلىق ءىرى ونەركاسىپ كاسىپورىندارىنىڭ جۇمىسى تابيعاتتى قورعاۋ جۇيەسىنە اۋىستىرىلادى. مىنە, وسى تۇرعىدان العاندا «بىرلىك» پارتياسى ەكونوميكانى جۇيەلى جانە جان-جاقتى ەكولوگيالاندىرۋ, كاسىپورىنداردا قالدىق قالدىرماۋ جانە باسقا دا «جاسىل» تەحنولوگيالاردى ەنگىزۋ ماقساتىن قويىپ وتىر», – دەپ اتاپ ءوتتى ول. كەزدەسۋ بارىسىندا «بىرلىك» پارتياسى وكىلدەرى مەن كومپانيا قىزمەتكەرلەرى اراسىندا سۇراق-جاۋاپ نەگىزىندە ءوزارا تۇسىنىستىك تۇرعىسىنداعى اڭگىمە ءوربىدى. قايرات ءابىلدينوۆ, «ەگەمەن قازاقستان». قاراعاندى.