وسكەمەن قالاسىنداعى نازارباەۆ زياتكەرلىك مەكتەبىنىڭ تۇلەگى وڭتۇستىك كورەيانىڭ بەدەلدى وقۋ ورىندارىنىڭ ءبىرىنىڭ گرانتىن جەڭىپ الدى. سەۋل ۇلتتىق ۋنيۆەرسيتەتىندە ءبىلىم الۋعا رەسمي تۇردە شاقىرتۋ العان اياۋجان احماديەۆا كورەي ەلىندە «بيزنەستى باسقارۋ» ماماندىعىن مەڭگەرمەك.
– بۇل مەن ءۇشىن قۋانىشتى جاڭالىق بولدى. ويتكەنى, كورەيادا وقۋدى مەكتەپ قابىرعاسىندا-اق ارمانداعان ەدىم. بۇل دا ەل ەگەمەندىگىنىڭ ارقاسى, – دەيدى ول.
كورەيا رەسپۋبليكاسى ۇكىمەتىنىڭ ارنايى گرانت بايقاۋىنا قاتىسقان اياۋجان ءبىر ورىنعا 25 ادامنان كەلەتىن العاشقى تۋردا ءوزىن تانىستىرىپ, مىنەزدەمە حات پەن ماراپاتتامالارىن ۇسىنسا, كەلەسى كەزەڭدە كوميسسيا مۇشەلەرىنىڭ ۇمىتكەرمەن سۇحبات جۇرگىزگەنىن ايتادى. ال شەشۋشى كەزەڭدە كورەيالىق جوعارى وقۋ ورنى تاراپىنان تالاپكەردىڭ بارلىق قۇجاتتارى قاراستىرىلدى. وسكەمەندىك بويجەتكەن وتكەن جىلى حيميا-بيولوگيا باعىتىنداعى نازارباەۆ زياتكەرلىك مەكتەبىن «التىن بەلگىمەن» تامامداعان بولاتىن. شەتەلدە ءبىلىم الۋعا ۇسىنىس تۇسكەنگە دەيىن استاناداعى نازارباەۆ ۋنيۆەرسيتەتتە ءبىلىم الدى. سەۋل قالاسىنداعى وقۋىنا 1 ناۋرىزدان باستاپ كىرىسەتىن اياۋجاننىڭ ايتۋىنشا, شاقىرۋشى تاراپ قازاقستاندىق ستۋدەنتتى تەگىن وقۋمەن قاتار, باسپانا جانە شاكىرتاقىمەن قامتاماسىز ەتپەك. سونداي-اق, قازاقستان مەن وڭتۇستىك كورەيا اراسىنداعى ۇشاقتىڭ جولاقى قۇنىن دا وتەيدى.
اتالعان ءبىلىم ورداسى اعىلشىن تىلىندە وقىتادى. ال اياۋجاننىڭ شەت ءتىلىن مەڭگەرۋ دەڭگەيىن حالىقارالىق IELTS ەمتيحانىن 6,5 بالعا تاپسىرعانىنان كورۋگە بولادى. وقۋ ەرەجەسى بويىنشا ستۋدەنت العاشقى جىلدى كورەي ءتىلىن مەڭگەرۋگە ارنايدى. الماتى قالاسىنداعى جۇمىس ساپارى اياسىندا ەلباسى نۇرسۇلتان نازارباەۆ الەمدەگى ۇيرەنۋگە تۇرارلىق تىلدەردىڭ ءبىرى كورەي ءتىلى ەكەنىن اتاپ ايتقان ەدى. سەۋل ۇلتتىق ۋنيۆەرسيتەتى كورەيانىڭ ەڭ ءىرى جوعارى وقۋ ورنى جانە الەمنىڭ 50 ىرگەلى جوعارى وقۋ ورىندارىنىڭ ساناتىنا ەنگەن.
دۋمان اناش,
«ەگەمەن قازاقستان».
وسكەمەن.