ورتالىق سايلاۋ كوميسسياسى 2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋعا حالىقارالىق ۇيىمدار مەن شەت مەملەكەتتەن تاعى 37 بايقاۋشىنى اككرەديتتەدى.
ورتالىق سايلاۋ كوميسسياسىنىڭ مۇشەسى مارات سارسەمباەۆتىڭ مالىمدەۋىنشە, 9 ناۋرىزدا ورتالىق سايلاۋ كوميسسياسى «2016 جىلعى 20 ناۋرىزعا تاعايىندالعان قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ كەزەكتەن تىس سايلاۋىنا جانە ءماسليحاتتارى دەپۋتاتتارىنىڭ كەزەكتى سايلاۋىنا حالىقارالىق ۇيىمدار مەن شەت مەملەكەتتىڭ بايقاۋشىلارىن اككرەديتتەۋ تۋرالى» قاۋلى قابىلدادى. وسى قۇجاتقا سايكەس ورتسايلاۋكوم قازاقستان رەسپۋبليكاسى سىرتقى ىستەر مينيسترلىگىنىڭ ۇسىنۋى بويىنشا سايلاۋدى بايقاۋ جونىندەگى ەكى ميسسيادان, ءبىر حالىقارالىق ۇيىمنان جانە ءبىر شەت مەملەكەتتەن تاعى 37 بايقاۋشىنى اككرەديتتەدى.
«ولاردىڭ ىشىندە: تمد-دان بايقاۋشىلار ميسسياسىنان 19 بايقاۋشى, شىۇ ميسسياسىنان 8 بايقاۋشى, تۇركىتىلدەس ەلدەردىڭ پارلامەنتتىك اسسامبلەياسىنان 7 جانە ۋكراينادان 3 بايقاۋشى بار, – دەدى م.سارسەمباەۆ. – وسىلايشا, 2016 جىلعى 9 ناۋرىزداعى جاعداي بويىنشا ورتسايلاۋكوم ءۇش حالىقارالىق ۇيىمنىڭ ميسسيالارىنان (ەقىۇ/دياقب, تمد جانە شىۇ), ەكى حالىقارالىق ۇيىمنان (يسلام ىنتىماقتاستىعى ۇيىمى جانە تۇركىتىلدەس ەلدەردىڭ پارلامەنتتىك اسسامبلەياسى) جانە ون شەت مەملەكەتتەن 345 بايقاۋشىنى اككرەديتتەدى. سونداي-اق, قازاقستان رەسپۋبليكاسى سىرتقى ىستەر مينيسترلىگى 2016 جىلعى 3 ناۋرىزداعى جاعداي بويىنشا 28 مەملەكەتتەن شەتەلدىك بۇقارالىق اقپارات قۇرالدارىنىڭ 116 وكىلىن اككرەديتتەدى».
ورتسايلاۋكوم شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋدى 2016 جىلعى 14 ناۋرىزعا دەيىن جۇزەگە اسىرادى. سونىمەن قاتار, «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 12 جانە 37-باپتارىنا سايكەس ورتالىق سايلاۋ كوميسسياسى قازاقستان حالقى اسسامبلەياسى سايلايتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋعا 451 سايلاۋ بيۋللەتەنى دايىندالاتىنىن بەلگىلەدى.
سونداي-اق, وسك قازاقستان حالقى اسسامبلەياسى سايلايتىن قازاقستان رەسپۋبليكاسى پارلامەنتى ءماجىلىسىنىڭ دەپۋتاتتارىن سايلاۋ جونىندەگى سايلاۋ بيۋللەتەنىنىڭ ءماتىنىن بەكىتتى. بيۋللەتەندەر استانا قالاسىنىڭ سايلاۋ كوميسسياسىنا 2016 جىلعى 19 ناۋرىزدان كەشىكتىرمەي جەتكىزىلۋى ءتيىس.
ءاليسۇلتان قۇلانباي,
«ەگەمەن قازاقستان».