كەشە ورتالىق سايلاۋ كوميسسياسى توراعاسىنىڭ ورىنباسارى ۆلاديمير فووس شەتەلدەگى سايلاۋ ۋچاسكەلەرىنىڭ جۇمىسىن ۇيىمداستىرۋ ماسەلەلەرى جونىندە بريفينگ وتكىزدى.
توراعا ورىنباسارىنىڭ سوزىنە قاراعاندا, 2016 جىلعى 20 ناۋرىزدا پارتيالىق تىزىمدەر بويىنشا سايلاناتىن پارلامەنت ءماجىلىسىنىڭ دەپۋتاتتارى سايلاۋىندا, سونداي-اق, قازاقستان رەسپۋبليكاسى ءماسليحاتتارىنىڭ دەپۋتاتتارى سايلاۋىندا داۋىس بەرۋ, جالپى العاندا, 9 840 سايلاۋ ۋچاسكەسىندە وتەدى. داۋىس بەرۋ كۇنى قازاقستاننان تىس جەردە بولاتىن ازاماتتار دا وزدەرىنىڭ سايلاۋعا قاتىسۋ قۇقىعىن ىسكە اسىرا الادى.
«ول ءۇشىن شەت مەملەكەتتەردەگى قازاقستان رەسپۋبليكاسى وكىلدىكتەرىنىڭ جانىندا سىرتقى ىستەر مينيسترلىگىنىڭ اۋماعىنداعى سايلاۋ وكرۋگىنە قاتىستى سايلاۋ ۋچاسكەلەرى قۇرىلادى, – دەدى ۆ.فووس وسى ماسەلەگە بايلانىستى. – سايلاۋ زاڭناماسىنا سايكەس شەت مەملەكەتتەردەگى قازاقستان رەسپۋبليكاسى وكىلدىكتەرىنىڭ جانىنداعى سايلاۋ ۋچاسكەلەرى بويىنشا سايلاۋشىلار تىزىمدەرىنە ءتيىستى شەت مەملەكەتتە تۇراتىن نەمەسە ۇزاق مەرزىمدى ءىسساپاردا جۇرگەن جانە قازاقستان ازاماتىنىڭ تولقۇجاتى بار بارلىق ازاماتتار ەنگىزىلەدى. سونىمەن قاتار, ەلىمىزدىڭ شەت مەملەكەتتەردە جەكە شاقىرۋ بويىنشا, قىزمەتتىك, ىسكەرلىك جانە تۋريستىك ساپارلاردا جۇرگەن ازاماتتارى, ولار ۋچاسكەلىك سايلاۋ كوميسسياسىنا جۇگىنگەن جانە قازاقستان رەسپۋبليكاسى ازاماتىنىڭ تولقۇجاتى بولعان جاعدايدا, سايلاۋشىلار تىزىمدەرىنە ەنگىزىلەدى».
توراعا ورىنباسارى بريفينگتە 2016 جىلعى 4 ناۋرىزداعى جاعداي بويىنشا ءتۇرلى شەت مەملەكەتتەردەگى كونسۋلدىق ەسەپكە قازاقستان رەسپۋبليكاسىنىڭ 14 مىڭنان استام ازاماتى قويىلعانىن دا اتاپ ءوتتى. «51 شەت مەملەكەتتەگى قازاقستان رەسپۋبليكاسى وكىلدىكتەرىنىڭ جانىندا 65 سايلاۋ ۋچاسكەسى قۇرىلدى, 25 ۋچاسكە ازيا ەلدەرىندە, 4-ەۋى وڭتۇستىك جانە سولتۇستىك امەريكادا, 1-ەۋى افريكادا, 20-سى ەۋروپادا, 15-ءى تمد-دا. ال شەتەلدىك ۋچاسكەلەردە قازاقستان رەسپۋبليكاسىنىڭ ازاماتتارى پارتيالىق تىزىمدەر بويىنشا سايلاناتىن پارلامەنت ءماجىلىسىنىڭ دەپۋتاتتارىن سايلاۋدا عانا داۋىس بەرە الادى», – دەدى توراعا ورىنباسارى ۆ.فووس.
ءاليسۇلتان قۇلانباي,
«ەگەمەن قازاقستان».