كەيدە كەسكىن-كەلبەتى مەن ءجۇرىس-تۇرىسى, مىنەزى مەن ادامي قاسيەتىنىڭ جانىڭا جاقىن بولعانى سونداي, وزىڭە كوپتەن ەتەنە تانىستاي كورىنىپ جۇرەتىن ادامدار بولادى. ادەتتە, مۇنداي كىسىلەر قانشالىقتى جوعارى لاۋازىمدى قىزمەت اتقارعانىمەن, قاراپايىم دا جايدارى جۇزىنەن تانباي, جان-جاعىنا جىلى شۋاعىن شاشىپ, توڭىرەگىن شاپاعاتىنا كومىلدىرىپ جۇرەدى. مەن بىلەتىن سونداي تولىمدى تۇلعانىڭ ءبىرى – ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ وقۋ جانە وقۋ-ادىستەمەلىك جۇمىس جونىندەگى پرورەكتورى, قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى, پەداگوگيكا عىلىمدارىنىڭ دوكتورى, پروفەسسور گاۋھار الدامبەرگەنوۆا.
ول سىردىڭ بويىنداعى جالاعاش دەگەن اۋدان ورتالىعىندا ءبىر قاۋىم ەلگە سىيلى بولعان تورەمۇرات دەگەن قاريانىڭ وتباسىندا بويجەتىپتى. وسى شاڭىراقتا اقبوپە اتتى اياۋلى انادان ومىرلىك ونەگە الىپتى. اتا مەن انانىڭ بەرگەن ءتالىمدى تاربيەسىنىڭ ارقاسى شىعار, ءبىر ۇيدەگى ۇيەلمەندى-سۇيەلمەندى 4 ۇل مەن 4 قىزدىڭ ءبارى جوعارى ءبىلىم الىپ, ومىردەن ءوز ورىندارىن تاۋىپتى. جانە ءبىر تاڭعالارلىعى, اعايىندىلاردىڭ كوپشىلىگى ءبىلىم-عىلىم سالاسىنا بەت بۇرىپ, سالادا ايتارلىقتاي جەتىستىكتەرگە جەتىپ ءجۇر ەكەن.
مەنىڭ بۇلاردىڭ ەڭ كەنجەسى – ءبىزدىڭ كەيىپكەرىمىز گاۋھار تورەمۇراتقىزىن جاقىننان تاني باستاعانىما 5-6 جىلداي ۋاقىت بولىپتى. راس, ءبىر قاراعاندا, قاتالداۋ بولىپ كورىنەتىنى دە بار ەكەن. بىراق مۇنىسى وزىنە قاپىسىز جاراساتىن. سەبەبى, ءبىلىم-بىلىگىنىڭ جوعارىلىعى كوپ ۇزاماي اڭعارىلىپ قالاتىن, پاراسات-پايىمى بيىك ەكەنى دە ءبىلىنىپ تۇراتىن. وسىعان قاراپ-اق ءبىز ءسوز ەتىپ وتىرعان قايراتكەردىڭ ادىلدىكتىڭ ادامى ەكەنىن ۇعىنۋعا بولار ەدى. ال وسى وقۋ ورنىنا كەلىپ, قىزمەت ەتە باستاعان جىلدارىمنان بەرى وقۋ جانە وقۋ-ادىستەمەلىك جۇمىس جونىندەگى پرورەكتوردىڭ ءوزىنىڭ لايىقتى ورنىنداعى تۇلعا, ۇيىمداستىرۋشىلىق قابىلەتىنىڭ وتە جوعارى, ۇجىمنىڭ جاناشىر باسشىلارىنىڭ ءبىرى ەكەنىن بىلە ءتۇستىم.
– مەن گاۋھاردى ادام رەتىندە دە, ۇستاز رەتىندە وتە جوعارى باعالايمىن. ول وقۋ ورنىنداعى وقۋ ۇدەرىسىن ۇيىمداستىرىپ وتىرۋدا وراسان زور جۇمىستار اتقارادى. كىسىمەن ءتىل تابىسا الاتىن دا قاسيەتى بار. ول الدىنا كەلگەن بارلىق ادامنىڭ ماسەلەسىن شەشىپ بەرە الماۋى مۇمكىن, بىراق كىمدى دە بولسا جىلى سوزىمەن قارسى الىپ, شىعارىپ سالىپ تۇراتىن قاسيەتى ونى قاشاندا جاقسى ادام, جاقسى باسشىلار قاتارىنان كورسەتىپ كەلەدى, – دەيدى ول تۋرالى اكادەميا پروفەسسورى, بەلگىلى جازۋشى-دراماتۋرگ دۋلات يسابەكوۆ.
– گاۋھاردى بۇرىننان تانيمىن. سوندا بايقاعانىم, ول قاشاننان ستۋدەنتتەردىڭ ءۇلكەن جەتەكشىسى سياقتى. ۇنەمى سولاردىڭ جاعدايىن جاساپ جۇرەدى. ءوز اينالاسىنداعىلارعا ەشقانداي قىسىم جاسامايدى, ءبارىن اقىل-پاراساتپەن شەشەدى. ۇيىمداستىرۋشىلىق قابىلەتى وتە زور. ءبىلىمدى. ول سونىمەن بىرگە, بارىنشا تازا, ادال ادام بولۋىمەن دە كوپتىڭ قۇرمەتىنە بولەنىپ ءجۇر, – دەيدى اكادەميانىڭ كەلەسى ءبىر پروفەسسورى, بەلگىلى رەجيسسەر ەسمۇحان وباەۆ.
ەڭبەگىن ءساتتى قورعاعاننان كەيىن 2000 جىلدىڭ قاراشاسىندا وعان پەداگوگيكا عىلىمدارىنىڭ كانديداتى عىلىمي دارەجەسى بەرىلدى. 2008 جىلى اباي اتىنداعى قازۇپۋ-عا «جالپى پەداگوگيكا» ماماندىعى بويىنشا دوكتورانتۋراعا ءتۇستى. 2010 جىلى ارنايى ديسسەرتاتسيالىق كەڭەستە «قازاق حالىق پەداگوگيكاسىندا قىزدارعا مورالدىق-ەتيكالىق تاربيە بەرۋ» تاقىرىبى بويىنشا دوكتورلىق ديسسەرتاتسيا قورعادى. 2011 جىلدىڭ جەلتوقسان ايىندا عالىمعا پەداگوگيكا ماماندىعى بويىنشا پروفەسسور اتاعى بەرىلدى.
گاۋھار الدامبەرگەنوۆا ءبۇگىندە 80-نەن استام عىلىمي ەڭبەكتىڭ اۆتورى. ولاردىڭ اراسىندا نولدىك ەمەس يمپاكت-فاكتورى بار, شەتەلدىك باسپالاردا جارىق كورگەن جاريالانىمدار دا جەتەرلىك. ءبىز بىلەتىن گاۋھار الدامبەرگەنوۆا ءوزىن الدىنا ءاردايىم بيىك ماقساتتار قويىپ, سوعان جەتۋ جولىندا ىزدەنۋ مەن ەڭبەكتەنۋدەن تالمايتىن بيىك مۇراتتاردىڭ ادامى رەتىندە كورسەتىپ كەلەدى. ونىڭ مۇنداي ونەگە تۇتارلىق قاستەرلى قاسيەتتەرىنەن ءوزى قىزمەت ەتىپ كەلە جاتقان ۇجىم ۇتپاسا, استە ۇتىلعان ەمەس.
جاڭاگۇل سۇلتانوۆا.