استانا. 6 ناۋرىز. ۆتب بىرىڭعاي ليگاسىندا ەل نامىسىن قورعايتىن «استانا» باسكەتبول كومانداسى بەلارۋس استاناسى – مينسك قالاسىندا جەرگىلىكتى «تسموكي-مينسكپەن» كەزدەسىپ, 83:87 ەسەبىمەن جەڭىلدى. بۇل تۋرالى egemen.kz ءتىلشىسى حابارلادى.
ويىندى قوس كوماندا دا وتە بەلسەندى باستادى. الاڭ يەلەرى نەگىزىنەن الىستان لاقتىرۋ ءادىسىن قولدانسا, استانالىقتار كوبىنە ەكى ۇپايلىق لاقتىرىستارعا يەك ارتتى. ناتيجەسىندە ءبىرىنشى كەزەڭدە ءبىزدىڭ جىگىتتەر 19:17 ەسەبىمەن باسىم ءتۇستى.
ەسەسىنە, ەكىنشى كەزەڭدە بەلورۋستار باسىمدىقتى ءوز قولدارىنا الىپ, بىرنەشە ناتيجەلى شابۋىل ۇيىمداستىردى. سونىڭ ارقاسىندا ۇلكەن ۇزىلىسكە «تسموكي-مينسك» جالپى ەسەپ بويىنشا جەڭىمپاز رەتىندە اتتاندى (41:34).
ءۇشىنشى كەزەڭدە ويىن ورنەگى تەڭ جاعدايدا ءوربىپ, قوس كوماندا 26 ۇپايدان جينالدى. ال سوڭعى كەزەڭ «استانانىڭ» پايداسىنا 23:20 ەسەبىمەن اياقتالدى. الايدا, ەكىنشى كەزەڭدەگى باسىمدىق ءوز جەمىسىن بەرىپ, مينسكىلىكتەر جالپى ەسەپتە جەڭىسكە جەتتى.
ماتچ بارىسىندا «استانا» ساپىنان كەننەت حەيس ەڭ ناتيجەلى ويىنشى اتاندى. ول 40 مينۋتتا 24 ۇپاي جيناعان بولاتىن. ەندى رامۋناس بۋتاۋتاستىڭ شاكىرتتەرى كەلەسى كەزدەسۋلەرىن 13 ناۋرىزدا ءوز الاڭىندا چەحيانىڭ «نيمبۋرك» كومانداسىمەن وتكىزەدى. اتالعان ويىن قاراعاندى قالاسىنداعى «جاستار» سپورت كەشەنىندە وينالاتىنىن اتاپ وتكەن ءجون.
بۇگىندە ۆتب بىرىڭعاي ليگاسىنىڭ تۋرنير كەستەسىندە «استانا» 16 كوماندانىڭ ىشىندە 15-ورىندا تۇر. سونداي-اق, ەلوردالىقتار وسىمەن قاتارىنان التىنشى رەت جەڭىلىپ وتىرعانىن ايتا كەتەيىك.
ەلامان قوڭىر.
دەرەك: egemen.kz.
سۋرەت: bcastana.kz.