قازاقستاندا تاۋىق جۇمىرتقاسىن شەتەلدەن اكەلۋگە التى ايعا ۋاقىتشا تىيىم سالىندى. بۇل شەشىم وتاندىق قۇس فابريكالارىن قولداۋ ماقساتىندا قابىلدانىپ, 21 ساۋىردەن باستاپ كۇشىنە ەندى. ءتيىستى بۇيرىق اشىق نورماتيۆتىك-قۇقىقتىق اكتىلەر پورتالىندا جاريالانعان. شەكتەۋ ەۋرازيالىق ەكونوميكالىق وداق ەلدەرىمەن قاتار, باسقا مەملەكەتتەردەن كەلەتىن يمپورتقا دا قاتىستى, دەپ حابارلايدى Egemen.kz.
بۇعان دەيىن دە وسىنداي شارالار ەنگىزىلگەن بولاتىن, الايدا ول كەزدە تىيىم مەرزىمى قىسقا بولعان. قازىرگى قادام ىشكى نارىقتاعى ءوندىرىستى كۇشەيتىپ, جەرگىلىكتى ءونىمنىڭ باسەكەگە قابىلەتىن ارتتىرۋعا باعىتتالعان.
2025 جىلدىڭ قورىتىندىسى بويىنشا قازاقستاندا 4,5 ملرد دانا جۇمىرتقا ءوندىرىلىپ, بۇل كورسەتكىش ءبىر جىلدا 2,4%-عا ارتقان. ال يمپورت كولەمى ءىس جۇزىندە وزگەرىسسىز قالىپ, 89,7 ملن دانا شاماسىندا بولدى. نەگىزگى جەتكىزۋشىلەر – رەسەي, قىرعىزستان جانە بەلارۋس.
ەلىمىزدە يمپورتتىق تاۋارلاردىڭ باعاسى بىرنەشە پايىزعا ارزانداۋى مۇمكىن
سونىمەن قاتار, ينكۋباتسيالىق جۇمىرتقا يمپورتى ايتارلىقتاي ءوسىپ, 29,7%-عا كوبەيىپ, 104,6 ملن داناعا جەتكەن. بۇل ءونىم كوبىنە تۇركيا, رەسەي جانە وزبەكستاننان جەتكىزىلگەن.
ال ەكسپورت كولەمى كەرىسىنشە تومەندەپ, 10,3 ملن داناعا دەيىن قىسقارعان. جۇمىرتقا نەگىزىنەن اۋعانستان مەن قىرعىزستانعا جونەلتىلگەن.
2026 جىلدىڭ العاشقى ەكى ايىندا سالاداعى ءوسىم جالعاسىن تاپتى. ءوندىرىس 716,1 ملن داناعا جەتىپ, وتكەن جىلمەن سالىستىرعاندا 8,3%-عا ارتقان. يمپورت ءۇش ەسەگە جۋىق قىسقارىپ, 10,4 ملن دانا بولدى. بۇل كەزەڭدە بارلىق جەتكىزىلىم رەسەيدەن كەلگەن.
ينكۋباتسيالىق جۇمىرتقا يمپورتى دا 7,5%-عا تومەندەدى. ال ەكسپورت, كەرىسىنشە, 39,3%-عا ءوسىپ, 2,7 ملن داناعا جەتتى. نەگىزگى باعىت – قىرعىزستان.
يمپورتقا تاۋەلدىلىك ءالى جوعارى: ەلىمىز قانداي كاسىبي جانە تەحنيكالىق قىزمەتتەردى ساتىپ الىپ وتىر؟
جالپى العاندا, ەلدەگى جۇمىرتقا نارىعىندا ىشكى ءوندىرىس قارقىندى دامىپ, يمپورتقا تاۋەلدىلىك ازايىپ كەلەدى. ساراپشىلاردىڭ پىكىرىنشە, ەنگىزىلگەن ۋاقىتشا شەكتەۋ وتاندىق وندىرۋشىلەردىڭ نارىقتاعى ۇلەسىن ودان ءارى ارتتىرۋعا مۇمكىندىك بەرەدى.