بۇگىن استانادا قازاقستان فۋتبول فەدەراتسياسىنىڭ كەڭسەسىندە ايەلدەر كوماندالارى اراسىنداعى ەل چەمپيوناتىنىڭ جاڭا ماۋسىمىنا ارنالعان رەسمي تانىستىرىلىم ءوتتى, دەپ حابارلايدى Egemen.kz.
ءىس-شاراعا قفف باس حاتشىسىنىڭ مىندەتىن اتقارۋشى الەكساندر كەپلين, ليتسەنزيالاۋ دەپارتامەنتىنىڭ ديرەكتورى ەرجان مۇسابەكوۆ, كاسىبي كلۋبتار جارىستارىن ۇيىمداستىرۋ ديرەكتسياسىنىڭ سپورت مەنەدجەرى ايجان كەنجينا, ايەلدەر فۋتبولى ءبولىمىنىڭ مەنەدجەرى ناتاليا گورەنكو جانە قازاقستان WU-17 قىزدار قۇراماسىنىڭ اعا باپكەرى يۋليا مامونوۆا قاتىستى.
جيىن بارىسىندا الەكساندر كەپلين وتكەن ماۋسىمداعى وزگەرىستەر مەن ايەلدەر فۋتبولىنداعى ءوسىمدى اتاپ ءوتتى.
«بىلتىر قازاقستان فۋتبول فەدەراتسياسى ايەلدەر اراسىنداعى ەل چەمپيوناتىن جاڭارتىپ, 14 كوماندادان تۇراتىن تولىققاندى ليگانى ىسكە قوستى. بيىل قاتىسۋشىلار سانى 19 كلۋبقا دەيىن ارتتى. بۇل – ەلدەگى ايەلدەر فۋتبولىنىڭ دامىپ كەلە جاتقانىن جانە چەمپيوناتقا دەگەن قىزىعۋشىلىقتىڭ ارتقانىن كورسەتەدى», دەدى ول.
ونىڭ ايتۋىنشا, وتكەن ماۋسىمدا كورەرمەندەر رەكوردى دا تىركەلگەن.
«وتكەن ماۋسىمدا «اقتوبە» مەن «بيىك-شىمكەنت» اراسىنداعى ماتچ قازاقستان ايەلدەر فۋتبولى تاريحىنداعى كورەرمەن سانى بويىنشا رەكورد ورناتتى. «قوبىلاندى باتىر» اتىنداعى ستاديونعا شامامەن 8,5 مىڭ جانكۇيەر جينالدى. جاڭا ماۋسىمدا ءبىز بۇل كورسەتكىشتى كەم دەگەندە قايتالاپ, ءتىپتى جاڭارتۋدى جوسپارلاپ وتىرمىز», دەدى الەكساندر كەپلين.
«توتتەنحەمنىڭ» بۇرىنعى ديرەكتورى قازاقستان فۋتبول فەدەراتسياسىنىڭ باس حاتشىسى بولىپ تاعايىندالدى
سونداي-اق ول ۋەفا-نىڭ قازاقستانداعى ايەلدەر فۋتبولىنا دەگەن قولداۋىن ەرەكشە اتاپ ءوتتى.
«سونداي-اق قازاقستان ايەلدەر فۋتبولىنا ۋەفا تاراپىنان كورسەتىلىپ وتىرعان نازاردى ەرەكشە اتاپ وتكىم كەلەدى. ەۋروپالىق فۋتبول ۇيىمى قازاقستانعا ايەلدەر اراسىنداعى حالىقارالىق تۋرنيرلەردى تۇراقتى تۇردە وتكىزۋدى سەنىپ تاپسىرىپ كەلەدى. ولاردىڭ قاتارىندا جاسوسپىرىمدەر اراسىنداعى ەۋروپا چەمپيوناتىنىڭ ىرىكتەۋ كەزەڭدەرى مەن ۋەفا دامۋ ءتۋرنيرى سياقتى جولداستىق جارىستار بار. وسىنداي كەزەكتى تۋرنير 2026 جىلعى 3-8 مامىر ارالىعىندا تالعاردا وتەدى. وندا WU-16 قۇراماسى ەستونيا, وزبەكستان جانە يزرايل قۇرامالارىنا قارسى وينايدى», دەدى فەدەراتسيا وكىلى.
جيىندا وتكەن ماۋسىم قورىتىندىلارى تالدانىپ, الداعى دامۋ باعىتتارى قارالدى. سونىمەن بىرگە كلۋبتاردى ليتسەنزيالاۋ تالاپتارى مەن ايەلدەر جانە جاسوسپىرىمدەر فۋتبولىن جۇيەلى دامىتۋ ماسەلەلەرىنە نازار اۋدارىلدى.
«قازاقستان فۋتبول فەدەراتسياسى اتىنان بۇگىن ايەلدەر ليگاسىندا ماۋسىمدى باستايتىن بارلىق كومانداعا ساتتىلىك تىلەيمىز», دەپ تۇيىندەدى الەكساندر كەپلين.
جاڭا ماۋسىمعا 19 كلۋب قاتىسادى. كوماندالار ەكى كونفەرەنتسياعا ءبولىنىپ, تۇراقتى كەزەڭنەن كەيىن ءار كونفەرەنتسيانىڭ ۇزدىك ەكى ۇجىمى پلەي-وفف كەزەڭىنە شىعىپ, چەمپيون انىقتالادى.
قازىرگى ەل چەمپيونى – «اقتوبە» كلۋبى. ول 2026-2027 جىلعى ۋەفا ايەلدەر چەمپيوندار ليگاسىندا قازاقستان اتىنان ونەر كورسەتەدى.
ايتا كەتەيىك, ايەلدەر ليگاسىنىڭ 2026 جىلعى العاشقى تۋرى 27 ساۋىردە باستالادى. بارلىق ماتچتار KFF League YouTube ارناسىندا تىكەلەي ەفيردە كورسەتىلەدى.