تاراز. 26 اقپان. تارازدا جوعالىپ كەتكەن التى جاسار بالانى ۇلتتىق ۇلان ساربازدارى تاۋىپ بەردى. بۇل تۋرالى «وڭتۇستىك» وڭىرلىك قولباسشىلىعىنىڭ ءباسپاسوز قىزمەتىنە سىلتەمە جاساعان egemen.kz ءتىلشىسى حابارلادى.
اتالعان قىزمەتتىڭ وكىلى ايدوس بايشاعىروۆتىڭ ايتۋىنشا, 23 اقپان كۇنى ساعات 19:05-تە تاراز قالاسىنداعى قوعامدىق ءتارتىپ پەن قاۋىپسىزدىكتى قامتاماسىز ەتۋ بويىنشا قىزمەت اتقارۋ بارىسىندا ۇلتتىق ۇلاننىڭ اسكەري جاساعىنا سول قالانىڭ تۇرعىنى, ازاماتشا ارايلىم ومىراليەۆادان 6 جاسار ۇلى قالماحان بەكنۇردىڭ ۇيدەن شىعىپ, جوعالىپ كەتكەندىگى تۋرالى حابار تۇسكەن. بالاسىن تاۋىپ بەرۋدى وتىنگەن اناسىنىڭ ايتۋى بويىنشا ۇلى بەكنۇر سول كۇنى ساعات 12:30 شاماسىندا كومپيۋتەر كلۋبىنا ويناۋعا كەتىپ, قايتا ورالماعان. اناسى ءوز كۇشىمەن ۇلىن ىزدەپ تابا الماعان سوڭ ساربازداردان كومەك سۇراۋعا ءماجبۇر بولعان.
«جوعالعان بالا تۋرالى مالىمەت العان سوڭ ۇلتتىق ۇلاننىڭ اسكەري جاساق قۇرامى, اسكەري جاساق ءپاترۋلىنىڭ باستىعى قاتارداعى ازامات اسىلبەك, پاترۋلدەر قاتارداعى ايدوس داۋلەتقۇلوۆ پەن تايىر يبراگيموۆ جانە كينولوگ سەرجانت ەربولات اسانوۆ «رادا» لاقاپ اتتى قىزمەتتىك ءيتتى قولدانۋ ارقىلى دەرەۋ بالانى ىزدەۋگە كىرىستى. بالانى ىزدەۋ بارىسىندا كومپيۋتەرلىك كلۋبتىڭ ماڭىنان «رادا» لاقاپ اتتى قىزمەتتىك يت جوعالعان بالانىڭ ءىزىن كەسەدى, سول ارقىلى اسكەري جاساق ىزگە ءتۇسىپ ايماقتى تىنتۋگە كىرىستى», – دەدى ايدوس بايشاعىروۆ.
وسىدان كەيىن 20 مينۋت ۋاقىت بويى ءىز كەسكەن اسكەري جاساق قۇرامى 1500 مەتر اۋماقتى ءتىنتىپ شىعىپ, اقىرى جوعالعان بالانى قالالىق مادەنيەت ءۇيىنىڭ ماڭىنان تاۋىپ الادى جانە ونى سارىلا كۇتىپ وتىرعان اناسىنا امان-ەسەن جەتكىزەدى. بالانىڭ ايتۋى بويىنشا, ول ويناپ ءجۇرىپ ۋاقىتتىڭ كەش بولىپ كەتكەنىن بىلمەي قالادى جانە اناسىنىڭ ونى ىزدەپ جۇرگەنىن سەزبەگەن.
«وزدەرىنىڭ قىزمەتتىك ءىس-ارەكەتتەرىنە دەرەۋ كىرىسىپ, جەدەل ءىس-قيمىلدارىنىڭ ارقاسىندا ۋاقىت وزدىرماي ۇلىن تاۋىپ بەرگەن ۇلتتىق ۇلاننىڭ اسكەري جاساق قۇرامىنا جوعالعان 6 جاستاعى بەكنۇردىڭ اناسى شەكسىز العىسىن ءبىلدىردى», – دەدى «وڭتۇستىك» وڭىرلىك قولباسشىلىعى ءباسپاسوز قىزمەتىنىڭ وكىلى.
ورالحان ءداۋىت.
دەرەك: egemen.kz.
سۋرەت: inform.kz.