ەلىمىزدىڭ سوت جۇيەسىندە كادر تاپشىلىعى ازايدى. ماسەلەن, بىلتىر 151 جاڭا سۋديا تاعايىندالعان. سونىمەن قاتار كەيىنگى بەس جىل بويى ۇمىتكەرلەر بولماۋىنا بايلانىستى بوس تۇرعان 64 ۆاكانتتىق لاۋازىم العاش رەت تولىقتىرىلدى. بۇل تۋرالى ورتالىق كوممۋنيكاتسيالار قىزمەتىندە وتكەن بريفينگتە جوعارى سوت كەڭەسىنىڭ مۇشەسى جانات وسپانوۆا مالىمدەدى.
ونىڭ ايتۋىنشا, وسى جىلى دا بۇل جۇمىس جالعاسادى. مەملەكەت باسشىسىنىڭ بيىلعى 2 ناۋرىزداعى جارلىعىمەن ازىرگە 128 اۋداندىق سوت سۋدياسى تاعايىندالدى. ناتيجەسىندە, بوس لاۋازىمدار سانى 230-عا دەيىن قىسقاردى. بۇعان قوسا 41 كانديدات ارنايى تەكسەرۋدى ءساتتى اياقتاپ, سوتتاردا تاعىلىمدامادان ءوتىپ جاتىر. ولاردى تاعايىنداۋ ناتيجەسىندە بوس لاۋازىمدار سانى 189-عا دەيىن ازايادى دەپ كۇتىلىپ وتىر. وسىلايشا, سوت جۇيەسىندەگى كادرلىق جاعداي تۇراقتالا باستادى.
– سوت جۇيەسىندەگى باستى وزگەرىستىڭ ءبىرى – بوس لاۋازىمداردىڭ قىسقارۋى. بىلتىر كادرمەن قامتىلۋ دەڭگەيى 97,5%-دان 131,3%-عا دەيىن ءوستى. بۇل سوت جۇيەسىندە العاش رەت كادرلىق سۇرانىستىڭ ورنىن تولىقتىرىپ قانا قويماي, تازا وسىمگە قول جەتكىزىلگەنىن كورسەتتى. كادرلىق تۇراقتىلىققا قول جەتكىزۋدىڭ ماڭىزدى قۇرالى بىلىكتىلىك ەمتيحانىن رەفورمالاۋ بولدى. 2024 جىلمەن سالىستىرعاندا ەمتيحان سانى ءۇش ەسە ارتىپ, 12 ەمتيحان وتكىزىلدى. وعان 1 365 كانديدات قاتىستى, – دەيدى ج.وسپانوۆا.
كەيىنگى 5 جىلدا شامامەن 350 سۋديالىق لاۋازىم بوس بولعان. سالدارىنان سوتتاردىڭ جۇكتەمەسى ارتقان. سوندىقتان تاپشىلىقتىڭ ورنىن تولتىرۋ ماقساتىندا وتكىزىلەتىن كونكۋرستار سانى 2024 جىلمەن سالىستىرعاندا 3 ەسە كوبەيگەن. وعان قوسا بىلتىر العاش رەت ادۆوكاتتار, زاڭ كەڭەسشىلەرى, نوتاريۋستار مەن جەكە سوت ورىنداۋشىلارىنا ونلاين سەمينارلار تسيكلى ۇيىمداستىرىلىپتى. جالپى, 40 مىڭنان اسا سەمينار وتكىزىلىپ, وعان 13 مىڭنان اسا زاڭ قاۋىمداستىعىنىڭ وكىلدەرى قاتىسقان. بۇل سۋديا ماماندىعىنا قىزىعۋشىلىق تانىتقان كانديداتتاردىڭ ارتۋىنا ىقپال ەتكەن.
– «سۋديا كادرلارىنىڭ جاي-كۇيى تۋرالى» ۇلتتىق بايانداما سوت جۇيەسىندەگى كادر ساياساتىنىڭ جاڭا ساپالىق دەڭگەيگە وتكەنىن ايقىن كورسەتەدى. بۇگىندە سۋديالار كورپۋسىن جاڭارتۋ تۋرالى جۇمىس مەريتوكراتيا قاعيداتى نەگىزىندە دە جۇيەلى تۇردە جالعاسىپ كەلەدى. اۋداندىق سوتتارعا ۇسىنىلعان كانديداتتار اراسىندا جۇمىس ىستەپ جۇرگەن سۋديالاردىڭ ۇلەسى 31 پايىزدان 14 پايىزعا دەيىن تومەندەدى. بۇل – جاڭا كاسىبي مامانداردىڭ كەلۋىن, بازانىڭ ايتارلىقتاي كەڭەيگەنىن كورسەتتى. وتكەن جىلدىڭ قورىتىندىسىندا اۋداندىق سوتتاردىڭ 583 سۋدياسى, جالپى سانى 31 پايىزى جوعارى سوت كەڭەسى جانىنداعى سوت تورەلىگى اكادەمياسىنىڭ تۇلەگى بولدى. ولاردىڭ 65-ءى اۋداندىق سوتتاردا توراعا قىزمەتىن اتقارىپ جاتىر. سۋديالاردىڭ كادرلىق رەزەرۆى ينستيتۋتى مەريتوكراتيانىڭ ءتيىمدى قۇرالى رەتىندە بەلسەندى قولدانىلادى. قازىر بۇعان ىرىكتەۋ جىلىنا ەكى رەت وتكىزىلىپ, بىرنەشە اي ىشىندە اياقتالادى. رەزەرۆتە 149 سۋديا بار. ونىڭ 47-ءى وزىنەن جوعارى جانە باسشىلىق لاۋازىمدارعا تاعايىندالدى, – دەيدى جوعارى سوت كەڭەسىنىڭ مۇشەسى سالتانات جۇنىسپەكوۆا.
سونداي-اق ەلىمىزدە كاسساتسيالىق سوتتار جۇمىسىن باستادى. 2025 جىلدىڭ 1 شىلدەسىنەن استانا قالاسىندا ءۇش دەربەس وڭىرارالىق كاسساتسيالىق سوت جۇمىسىنا كىرىستى. سپيكەرلەردىڭ ايتۋىنشا, جوعارى سوت كەڭەسىنىڭ اشىقتىعىن ارتتىرۋ ماقساتىندا كەڭەس توراعاسىنىڭ ازاماتتاردى كۇندەلىكتى قابىلداۋ ءتارتىبى دە ەنگىزىلگەن. وسىلايشا, وتكەن جىلى 220 ازامات قابىلداۋدا بولعان. ولاردىڭ ىشىندە 56 سۋديا بار. وتىنىشتەردىڭ كوپشىلىگى سۋديالاردى ىرىكتەۋ مەحانيزمىن جەتىلدىرۋ, تارتىپتىك جاۋاپكەرشىلىك ماسەلەلەرىنە قاتىستى تىركەلگەن. بۇل – جوعارى سوت كەڭەسىنىڭ سۋديا قاۋىمداستىعىمەن, ازاماتتارمەن ءوزارا قارىم-قاتىناس ورناتىلعانىن كورسەتەدى.
سوت جۇيەسىن رەفورمالاۋ سوت تورەلىگىنىڭ تيىمدىلىگىن ارتتىرۋعا, اشىقتىقتى كۇشەيتۋدەن بولەك, تسيفرلىق تەحنولوگيالاردى ەنگىزۋگە باعىتتالعان. بيىل سالادا كادرلىق ۇدەرىستى تولىق تسيفرلاندىرۋعا باسىمدىق بەرىلىپ وتىر. ادامي فاكتور اسەرىن تومەندەتۋگە نەگىزدەلگەن ارنايى جۇيە بيىل شىلدە ايىندا تاجىريبەلىك پايدالانۋعا ەنگىزىلەدى دەپ جوسپارلانعان.