قازاق ۇلتتىق ونەر ۋنيۆەرسيتەتىنىڭ «شابىت» سارايىندا ش.ايمانوۆ اتىنداعى «قازاقفيلم» اق-نىڭ حالىقارالىق دەڭگەيدەگى ۇزدىك كارديوحيرۋرگ, ۇلتتىق عىلىمي كارديوحيرۋرگيا ورتالىعىنىڭ باسشىسى يۋري پيا تۋرالى تۇسىرگەن «جۇرەكتەردى قۇتقارۋ جولىندا» اتتى تولىق مەتراجدى دەرەكتى ءفيلمىنىڭ كورسەتىلىمى ءوتتى.
ءوزىنىڭ چەحيالىق ارىپتەسى يان پيركپەن بىرگە قازاقستاندا 2012 جىلدىڭ تامىز ايىندا سوزىلمالى جۇرەك جەتىمسىزدىگى بار پاتسيەنتكە دونورلىق جۇرەكتى العاش رەت ترانسپلانتاتسيالاعان يۋري پيانىڭ ەسىمى سول كەزدەن باستاپ ءوز اۋماعىمىزدان اسىپ, قازاقستاننان تىس جەرلەردە دە ۇلكەن بەدەلگە يە بولا باستاعانىن كەزىندە وتاندىق باسىلىمدار جارىسا جازعان بولاتىن. قازىرگى تاڭدا كارديوحيرۋرگ الەمدىك ساپا ستاندارتتارىنا جاۋاپ بەرەتىن, ورتالىق ازيا اۋماعىنداعى بىردەن-ءبىر جەتەكشى كارديوحيرۋرگيا ورتالىعى سانالاتىن ۇلتتىق مەديتسينالىق حولدينگ كلينيكاسى – ۇلتتىق عىلىمي كارديوحيرۋرگيا ورتالىعىن باسقارادى. ايتا كەتەتىن جايت, مادەنيەت جانە سپورت مينيسترلىگىنىڭ تاپسىرىسىمەن ش.ايمانوۆ اتىنداعى «قازاقفيلم» اق پەن «الماتىفيلم» ستۋدياسى بىرىگىپ تۇسىرگەن ەكراندىق تۋىندىنىڭ رەجيسسەرى – وڭداسىن تاستانوۆ.
اۆتوردان: «بەلگىلى تۇلعا تۋرالى مۇنداي دەرەكتى ءفيلمدى تۇسىرۋىڭىزگە نە سەبەپ بولدى؟ – دەپ سۇراعانىمىزدا, ول: «بۇل جەردە مەن ەرەكشە ماماندىق يەسىنىڭ حالىققا جاساپ جاتقان مىناداي شەكسىز قىزمەتىن شىنايى كورسەتۋگە تىرىستىم. دارىگەرلىك كاسىپتىڭ مارتەبەسىن كوتەرۋ ءۇشىن ءتۇسىردىم. ۇلتتىق عىلىمي كارديوحيرۋرگيا ورتالىعىنداعى قاراپايىم اق جەلەڭدى ابزال جانداردىڭ بىلىكتىلىگىن جۇرتقا ۇلگى ەتۋدى, وتاندىق مەديتسينانىڭ جەتىستىكتەرى دامىعان ەلدەرىڭىزدىكىنەن ەش جەرى كەمشىن سوعىپ تۇرماعانىن جەتكىزۋ ەدى», – دەپ تۇلعا تۋرالى فيلم ەل دامۋى تاريحىن باياندايتىن شەجىرەدەن لايىقتى ورىن تابارىنا سەندىردى.
ءوز كاسىبىن ايرىقشا سۇيەتىن كارديوحيرۋرگ پيا جايلى فيلم نەگىزى ەكى سيۋجەتپەن بەرىلگەن – دارىگەرلىك قايراتكەرلىگى جانە ونىڭ ەم-دومىنا العاش يە بولعاندار تاعدىرى. مۇنىڭ تاعى ءبىر قىرى, اق جەلەڭدى ابزال جاننىڭ ءار ءساتى, ومىردەگى تىنىس-تىرشىلىگى ناقتى دەرەكتەر ارقىلى كورىنىس تابادى. سونىمەن قاتار, مەديتسينانىڭ قىر-سىرى جايىندا كوپ ماعلۇمات بەرىلەدى.
ءفيلمدى تاماشالاپ وتىرعان كورەرمەن دونورلىقتىڭ قازىرگى ءومىر ءۇشىن قانشالىقتى ماڭىزدى ەكەندىگىن تۇسىنەدى. دامىعان ەلدەردە وعان مۇلدە باسقاشا كوزقاراس قالىپتاسقان. ءتىپتى, ول جاقتا تولىق شەشىمىن تاپقان ماسەلە دەۋگە ابدەن بولادى. ولاردىڭ تولقۇجاتتارىندا سىرقاتىنا بايلانىستى نەمەسە جازاتايىم جاعدايدا كوز جۇمعان ادامداردىڭ ىشكى ورگاندارىن ترانسپلانتاتسيالاۋعا بولاتىنىن بىلدىرەتىن ارنايى ءمور بار. دارىگەر تۋرالى فيلمدە كەيىپكەر وسىنى حالىققا دۇرىس جەتكىزگىسى كەلەدى.
فيلمنەن كەيىنگى كەزدەسۋدە دارىگەر وسى ويىن تاعى دا قايتالاپ ايتتى. «ەلىمىز الەمنىڭ دامىعان وتىز ەلىنىڭ قاتارىنا قوسىلۋدى كوزدەپ وتىرعاندا, مۇنداي تۇيتكىلدى كوپ كەشىكتىرمەي تەزىرەك شەشۋگە ءتيىسپىز. قىمبات جوبالار مەن تەحنولوگيالاردان تىس قالىپ قويماۋىمىز كەرەكتىگىن تۇسىنەمىن, بىراق ترانسپلانتاتسيا جايىن ءبىرجولا شەشپەسەك, باسقا ەشبىر ارەكەتىمىزدەن تۇك ونبەيدى»,– دەدى جۋرناليستەرگە بەرگەن سۇحباتىندا كارديوحيرۋرگ.
ەسكە سالا كەتەيىك, يۋري پيا 1981 جىلى ن.پيروگوۆ اتىنداعى ماسكەۋ مەملەكەتتىك مەديتسينالىق ۋنيۆەرسيتەتىن ويداعىداي اياقتاعان سوڭ, تۋلا قالالىق اۋرۋحاناسىندا العاشقى مەكتەپتەن وتكەن. وداقتاس رەسپۋبليكالار تاراعاننان كەيىن دوستارىنىڭ كەڭەسىمەن تۇركياعا بارىپ تۇرۋىنا تۋرا كەلگەن ول مۇنداعى ون جىلدا وتە كۇردەلى وتالار جاساۋدى ۇيرەنەدى. ءسويتىپ, ەلباسىنىڭ شاقىرۋىمەن ەلگە ءوز كاسىبىنىڭ ناعىز بىلگىرى, مىقتى حيرۋرگ بولىپ ورالادى.
قارشىعا كۇلەن.