استانا. 23 اقپان. قازاقستاندا جۇمىسسىزدارعا جاردەماقى تولەۋ ۋاقىتى 6 ايعا دەيىن ۇزارتىلادى. بۇل تۋرالى NewTimes.kz-كە سىلتەمە جاساعان egemen.kz ءتىلشىسى حابارلادى.
دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى ءبىرجان نۇرىمبەتوۆ كاسىپورىنداردا قىسقارتۋعا بايلانىستى جۇمىسىنان ايىرىلعاندارعا الەۋمەتتىك تولەمدەر بەرۋ مەرزىمى جارتى جىلعا دەيىن سوزىلعانىن مالىمدەدى.
بۇگىن پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسى ءوتىپ, وندا «حالىقتى جۇمىسپەن قامتۋ تۋرالى» زاڭ جوباسى قارالعان بولاتىن. جيىن بارىسىندا ءبىرجان نۇرىمبەتوۆ قىسقارتۋعا وراي جۇمىسسىز قالعان تۇلعالارعا قاتىستى زاڭعا وزگەرىستەر ەنگىزىلگەنىن حابارلادى. وسىلايشا جاردەماقى تولەۋ مەرزىمى 4 ايدان 6 ايعا دەيىن ۇزارتىلدى.
ۆيتسە-مينيستر جۇمىس بەرۋشىنىڭ الەۋمەتتىك ساقتاندىرۋ قورىنا 5 پايىز كولەمىندە الەۋمەتتىك تولەم جىبەرەتىنىن, ال جۇمىسشىنىڭ وسى جۇيەنىڭ قاتىسۋشىسى ەكەنىن ءتۇسىندىرىپ ءوتتى.
«بىزدە جۇمىسسىزداردى تىركەۋ ءتارتىبى از-كەم وزگەرتىلدى. الدىمەن ونى جۇمىس ىزدەپ جۇرگەن تۇلعا رەتىندە ەسەپكە الىپ, 10 كۇن كولەمىندە وعان جۇمىس ىزدەيمىز. ەگەر جۇمىس تابىلماسا, ونى جۇمىسسىز رەتىندە تىركەۋگە الامىز. جۇمىسپەن قامتۋ ورگاندارى جۇمىسسىز ازاماتتارعا بوس ورىندارعا جولداما بەرەدى, ول سول جاققا بارىپ, اڭگىمەلەسۋدەن ءوتۋ كەرەك», – دەپ ءتۇسىندىردى دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى.
ونىڭ سوزىنە قاراعاندا, قالادا تۇراتىن جۇمىسسىز ءار 10 كۇن سايىن جۇمىسپەن قامتۋ ورتالىعىنا كەلىپ, ءوزىنىڭ جۇمىس ىزدەپ جۇرگەنى تۋرالى حاباردار ەتىپ وتىرۋى كەرەك. ال اۋىلدى جەرلەردە جۇمىس ىزدەگەندەر ايىنا ءبىر رەت اۋىل اكىمىنىڭ الدىنا بارۋى قاجەت.
ەلامان قوڭىر.
دەرەك: NewTimes.kz.
سۋرەت: ya2016.com.