وسكەمەن. 22 اقپان. «ماڭگىلىك ەل» پويىزىمەن شىعىس وڭىرىنە كەلگەن مەيماندار ءوڭىر جاستارىمەن دوڭگەلەك ۇستەل باسىندا كەزدەستى. بۇل تۋرالى شىعىس قازاقستان وبلىسىنىڭ اقپاراتتىق ورتالىعىنا سىلتەمە جاساعان egemen.kz ءتىلشىسى حابارلادى.
كەزدەسۋ بارىسىندا مەملەكەتتىك-الەۋمەتتىك تاپسىرىستار اياسىندا جۇزەگە اسىرىلعان بىرقاتار جوبالار تانىستىرىلدى. داۋلەت سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىندە وتكەن كەزدەسۋدە «تاۋەلسىزدىك تاريحى – ۇلت رۋحىنىڭ كورسەتكىشى» تاقىرىبىمەن تۇساۋكەسەر-ءدارىسى, «ماڭگىلىك ەل – ۇلت كەلەشەگىنىڭ رۋحاني نەگىزى» اتتى ەكىجاقتى سۇحبات ءوتتى.
سونداي-اق, مەيماندار سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە «تاۋەلسىزدىككە – 25 جىل» اتتى كىتاپ كورمەسىن تاماشالادى. قوناقتارعا ۋنيۆەرسيتەت مۇراجايى, «زياتكەر» عىلىمي-زەرتتەۋ ورتالىعى مەن ءدارىسحانالار تانىستىرىلدى. وزدەرىنىڭ ءبىلىم-بىلىكتەرىن كورسەتكەن جاستاردىڭ عىلىمي جوبالارى مەن وزگە دە جۇمىستارىن دەلەگاتتار جوعارى باعالادى.
ودان وزگە اۋىل شارۋاشىلىعى مەن كاسىپكەرلىكتى ورىستەتۋ بويىنشا دوڭگەلەك ۇستەلدەر ۇيىمداستىرىلدى. ۇلتتىق كاسىپكەرلەر پالاتاسىنىڭ وكىلى قۇرالاي قاناحينا ءوڭىر كاسىپكەرلەرىنە ناۋرىز ايىنان باستاپ «كاسىپكەرلىكتى دامىتۋدىڭ ايماقتىق كارتاسى» ىسكە قوسىلىپ, بارلىق وڭىرلەردەگى شاعىن جانە ورتا بيزنەستىڭ دامۋ دەڭگەيى, پروبلەمالىق ماسەلەلەرى مەن الەۋەتى, كاسىپكەرلەردىڭ ۇسىنىستارى ارنايى پورتالدا جاريالانىپ, بيزنەستىڭ العا باسۋىنا تاعى دا ءبىر ەرەكشە جاعداي جاسالاتىنىن جەتكىزدى. بيىل «بيزنەستىڭ جول كارتاسى – 2020» باعدارلاماسى بويىنشا, ەكونوميكانىڭ باسىم باعىتتارىن قارجىلاندىرۋ شارالارى اياسىندا شاعىن جانە ورتا بيزنەستى دامىتۋعا بارلىعى 300 ميلليارد تەڭگە بولىنەتىنىن اتاپ ءوتتى. «سىيلاستىق. تۇسىنىستىك. كەلىسىم» تاقىرىبىندا تاعاتتىلىق پەن كەلىسىمدى قالىپتاستىرۋعا ارنالعان ىسكەرلىك ويىندار ەرەكشە قىزىعۋشىلىق تۋعىزدى. سونداي-اق قوناقتار وبلىس ورتالىعىنىڭ كورىكتى ورىندارىن ارالاپ, ەستەلىككە سۋرەتكە ءتۇستى.
دۋمان اناش.
دەرەك, سۋرەت: شىعىس قازاقستان وبلىسىنىڭ اقپاراتتىق ورتالىعى.