الماتى. 23 اقپان. الماتى قالاسىندا قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ۇيىمداستىرۋىمەن 26 اقپان كۇنى ەلىمىزدىڭ 7 وبلىسىندا مەكتەپ ءبىتىرۋشى تۇلەكتەر اراسىندا رەسپۋبليكالىق «ى.التىنسارين-2016» پاندىك وليمپياداسى وتەدى. بۇل تۋرالى «قىزدار ۋنيۆەرسيتەتى» مەديا ورتالىعىنا سىلتەمە جاساعان egemen.kz ءتىلشىسى حابارلادى.
باعىن سىناپ كورەمىن دەيتىن 11 سىنىپ وقۋشىلارىنا جاقسى مۇمكىندىك بەرەتىن ءبىلىم سايىسىنىڭ باستى ماقساتى – مەكتەپ بىتىرۋشىلەرگە ماماندىق تاڭداۋعا كومەكتەسۋ, دارىندى وقۋشىلاردى ايقىنداۋ, جاستار اراسىندا ىرگەلى عىلىمي ءبىلىمدى دامىتۋ, ءبىلىمدى جاستاردىڭ ءوز قابىلەتتەرىن جۇزەگە اسىرۋىنا كومەكتەسۋ, دارىندى تالاپكەر قىزداردى قازاق مەملەكەتتىك قىزدار پەداگوگيكالىق ۋنيۆەرسيتەتىنە شاقىرۋ. بيىل دا وليمپيادا سەگىز ءپان بويىنشا: قازاق ءتىلى مەن ادەبيەتى, ورىس ءتىلى مەن ادەبيەتى, اعىلشىن ءتىلى, فيزيكا, بيولوگيا, گەوگرافيا, دۇنيەجۇزى تاريحى, حيميا پاندەرى بويىنشا وتكىزىلەدى. وليمپيادانىڭ ەرەكشەلىگى – وعان تەك قانا قىز بالالار قاتىسادى.
وليمپيادا وبلىستىق ءبىلىم باسقارمالارىمەن, اۋداندىق ءبىلىم بولىمدەرىمەن بەلگىلەنگەن ايماقتاردا بىرلەسە وتىرىپ وتكىزىلمەك. وليمپيادا اتاپ ايتقاندا, الماتى وبلىسى بويىنشا الماتىدا, تالدىقورعاندا, جاركەنت قالاسى مەن رايىمبەك اۋدانىنىڭ كەگەن اۋىلىندا; جامبىل وبلىسى بويىنشا تاراز قالاسى مەن قورداي اۋدانىندا; وڭتۇستىك قازاقستان وبلىسىنىڭ شىمكەنت جانە تۇركىستان قالالارىندا; قىزىلوردا وبلىسى بويىنشا قازالى, جاڭاقورعان, قارماقشى اۋداندارىندا, قىزىلوردا قالاسىندا; شىعىس قازاقستان وبلىسى بويىنشا سەمەي جانە وسكەمەن قالالارىندا; قاراعاندى وبلىسى بويىنشا قاراعاندى قالاسىندا; باتىس قازاقستان وبلىسى بويىنشا ورال مەن اتىراۋ قالالارىندا وتەدى.
قازىرگى ۋاقىتتا وليمپياداعا قاتىسۋعا تىلىك ءبىلدىرۋشى وقۋشىلاردى تىركەۋ جالعاسۋدا. ايتا كەتەيىك, نيەت بىلدىرۋشىلەر قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ سايتىندا تىركەلە الادى.
ەستەرىڭىزگە سالا كەتەيىك, بىلتىرعى وتكەن «ى.التىنسارين-2015» وليمپياداسىنا 3956 مەكتەپ ءبىتىرۋشى قاتىسسا, ونىڭ 24-ءى رەكتور گرانتىنا يە بولىپ, 10 پايىزدىق جەڭىلدىككە 700-گە جۋىق وقۋشى ىلىككەن.
ايناش ەسالي.
دەرەك, سۋرەت: «قىزدار ۋنيۆەرسيتەتى» مەديا ورتالىعى.