كەشە جوعارعى سوتتا قايرات ءماميدىڭ توراعالىعىمەن قازاقستان رەسپۋبليكاسى جوعارعى سوتى جانىنداعى حالىقارالىق كەڭەستىڭ العاشقى وتىرىسى ءوتتى. وتىرىستىڭ كۇن تارتىبىنە سايكەس ينۆەستيتسيالىق داۋلار ۇعىمدارىن انىقتاۋدىڭ تاسىلدەرى, سونداي-اق, ادەپ كودەكسىنىڭ جاڭا جوباسى تالقىلاندى.
ونىڭ جۇمىسىنا حالىقارالىق كەڭەستىڭ مۇشەلەرى, جوعارعى سوتتىڭ جانە استانا قالاسى سوتىنىڭ سۋديالارى, جوعارعى سوت جانىنداعى سوتتاردىڭ قىزمەتىن قامتاماسىز ەتۋ دەپارتامەنتىنىڭ, سونداي-اق, قازاقستان سۋديالار وداعىنىڭ باسشىلىعى قاتىستى. كەڭەستىڭ شەتەلدىك مۇشەلەرىنەن دۋباي حالىقارالىق قارجى ورتالىعى سوتتارىنىڭ تىركەۋشىسى, سوت اكىمشىلىگى بويىنشا حالىقارالىق قاۋىمداستىقتىڭ پرەزيدەنتى مارك بير, كورەيا رەسپۋبليكاسىنىڭ «يۋلچون» زاڭ كومپانياسىنىڭ وكىلى حۆاچجۋن لي, «بەيكەر ي ماككەنزي – سي-اي-ەس ليميتەد» كومپانياسى فيليالىنىڭ ديرەكتورى, «شەتەل ينۆەستورلارىنىڭ قازاقستاندىق كەڭەسى» قاۋىمداستىعى باسقارماسىنىڭ حاتشىسى كۋرتيس ماستەرس قاتىستى. بۇعان قوسا, وتىرىسقا دۋباي حالىقارالىق قارجى ورتالىعى سوتىنىڭ سۋدياسى دەۆيد ستيل ساراپشى رەتىندە شاقىرىلدى.
وتىرىستى اشقان جوعارعى سوتتىڭ توراعاسى ق.ءمامي كەڭەس مۇشەلەرىن جوعارعى سوت جانىنداعى حالىقارالىق كەڭەستىڭ قۇرامىنا سايلانۋىمەن قۇتتىقتاپ, كانديداتتاردى ىرىكتەۋ كەزىندە ولاردىڭ زاڭ سالاسىنداعى جانە ساراپشىلىق قىزمەتتەگى جۇمىس تاجىريبەسى مەن بەدەلىنىڭ ەسكەرىلگەندىگىن اتاپ ءوتتى. «وتكەن جىل ەلىمىزدىڭ سوت جۇيەسى ءۇشىن مەملەكەت باسشىسى «100 ناقتى قادام» ۇلت جوسپارىندا ايقىنداعان مىندەتتەردى ىسكە اسىرۋعا باعىتتالدى. ەندى قازاقستاندىق سوت جۇيەسىنىڭ الدىندا سوت تورەلىگىنىڭ, سونىڭ ىشىندە, ينۆەستيتسيالىق جانە كوممەرتسيالىق داۋلار سالاسىنا وزىق حالىقارالىق ستاندارتتاردى ەنگىزۋگە بايلانىستى جاڭا مىندەتتەر تۇر», – دەدى ق.ءمامي.
جوعارعى سوت جانىنان حالىقارالىق كەڭەس قۇرۋ جانە ونىڭ ءبىرىنشى وتىرىسىن وتكىزۋ ۇلت جوسپارىنىڭ 25-قادامىن ءتاجىريبە جۇزىندە ىسكە اسىرۋ بولىپ تابىلادى. جوعارعى سوت توراعاسى وتىرىس قاتىسۋشىلارىنا ايتقان سوزىندە: «جوعارعى سوت كەڭەس ءمۇشەلەرىنەن قازاقستاندىق سوتتاردىڭ تاجىريبەسىنە, نورماشىعارماشىلىق قىزمەتىنە, سونداي-اق ناقتى ينۆەستيتسيالىق داۋلار بويىنشا سوت تورەلىگىنىڭ حالىقارالىق ستاندارتتارىن ودان ءارى ەنگىزۋ ماسەلەلەرى بويىنشا ساپالى ساراپشىلىق قورىتىندىلار كۇتەتىن بولادى», – دەپ اتاپ ءوتتى.
بۇگىنگى كەڭەسكە قاتىسۋشىلار بارلىق ماسەلەلەر بويىنشا حالىقارالىق تاجىريبەگە سۇيەنە وتىرىپ, سىندارلى پىكىر الماستى. قاتىسۋشىلار ازىرلەگەن ۇسىنىستار وتىرىستىڭ حاتتامالىق شەشىمدەرىندە كورىنىس تاۋىپ, سوت قىزمەتىن ودان ءارى جەتىلدىرۋ جونىندەگى ۇسىنىم رەتىندە قولدانىلاتىن بولادى. جوعارعى سوتتىڭ رەسمي ينتەرنەت-رەسۋرسىنىڭ «حالىقارالىق ىنتىماقتاستىق» ايدارى شەڭبەرىندە «جوعارعى سوت جانىنداعى حالىقارالىق كەڭەس» اتتى قوسىمشا پاراق اشىلدى. كەڭەس جۇمىسى تۋرالى بارلىق قاجەتتى ماتەريالدار وسى ايداردا ءۇش تىلدە (مەملەكەتتىك, ورىس جانە اعىلشىن) ورنالاستىرىلادى.
ەسكە سالا كەتەيىك, جوعارعى سوتتىڭ اعىمداعى جىلعى 15 قاڭتارىندا وتكەن جالپى وتىرىسىنىڭ قاۋلىسىمەن حالىقارالىق كەڭەس جانە ونىڭ قۇرامى تۋرالى ەرەجە بەكىتىلدى. كەڭەس وتاندىق سوت تورەلىگى جۇيەسىن جەتىلدىرۋ ماسەلەلەرى بويىنشا ساراپشىلىق كونسۋلتاتسيالار بەرەدى. بەلگىلى قازاقستاندىق عالىمداردان بولەك, ونىڭ قۇرامىندا بەدەلدى شەتەلدىك زاڭگەرلەر دە بار. كەڭەستى جوعارعى سوت توراعاسى باسقارادى. ونىڭ مۇشەلەرى ءبىر جىل مەرزىمگە سايلانادى. وتىرىس جىلىنا كەمىندە ەكى رەت وتەتىن بولادى.
«ەگەمەن-اقپارات».