ورتالىق سايلاۋ كوميسسياسىنىڭ جۇمىس كەستەسىنە سايكەس ەلىمىزدەگى ساياسي كۇشتەر ۇگىت-ناسيحات جۇمىستارىن باستاپ كەتتى. وتكەن سەنبىدە «نۇر وتان» پارتياسى توراعاسىنىڭ ءبىرىنشى ورىنباسارى اسقار مىرزاحمەتوۆ باستاعان قۇرامىندا ايمان مۇساقوجاەۆا, نۇرلان ءابدىروۆ, يرينا ارونوۆا, نۇرلان التاەۆ, بەكبولات تىلەۋحان جانە سەرىك ساپيەۆ كىرگەن توپ «نۇر وتان» ەلىمىزدىڭ بارلىق وڭىرلەرىندە ۇگىت جۇمىستارىنا بەلسەنە كىرىسىپ كەتكەندىكتەرىن جاريا ەتتى.
ۇگىت-ناسيحات جۇمىستارىن اتقارۋ ءبىرشاما جەڭىل ەكەندىگىن تىلگە تيەك ەتكەن ا.مىرزاحمەتوۆ ونىڭ سەبەبىن «نۇر وتان» پارتياسىنىڭ كۇندەلىكتى ءارى تۇراقتى جانە كەشەندى جۇمىس ىستەپ كەلە جاتقاندىعىمەن ءتۇسىندىردى. «ساياسي ناۋقانعا بايلانىستى بۇل جۇمىستار كۇشەيتىلىپ وتىر. جوسپار بويىنشا پارتيانىڭ سايلاۋالدى باعدارلاماسىن جانە پارتيا توراعاسىنىڭ العا قويعان تالاپتارىن ورىنداۋ ءۇشىن مۇمكىندىك پەن رەسۋرس جەتكىلىكتى. بۇل جۇمىستاردى اتقارۋ ءۇشىن 60 مىڭنان استام پارتيا مۇشەلەرى مەن پارتيا جاقتاستارى قاتىساتىن بولادى. ەندى وسى باعدارلامالاردى تۇپكىلىكتى سايلاۋشىلارعا جەتكىزۋ ءۇشىن 88 مىڭ شارا وتكىزۋ قاراستىرىلعان», دەپ اتاپ ءوتتى اسقار يسابەك ۇلى.
بۇدان كەيىن ءسوز العان قازاق ۇلتتىق مۋزىكا اكادەمياسىنىڭ رەكتورى ايمان مۇساقوجاەۆا ءماجىلىس دەپۋتاتتىعىنان ۇمىتكەر ءاربىر پارتيا مۇشەسى سايلاۋشىلارمەن كەزدەسۋلەر وتكىزىپ, پارتيانىڭ سايلاۋالدى تۇعىرناماسىندا بەلگىلەنگەن مىندەتتەردى جان-جاقتى اشىپ كورسەتۋى تيىستىگىنە نازار اۋدارتتى. «بۇل ءوز كەزەگىندە «نۇر وتان» پارتياسىنىڭ حالىقتىق پارتيا ەكەندىگىن كورسەتەدى. ويتكەنى, پارتيا قاتارىندا قوعامنىڭ مۇعالىمدەر, دارىگەرلەر, ينجەنەرلەر, قۇرىلىسشىلار جانە وزگەلەر بار. مەن ءوزىم ءبىلىم بەرۋ سالاسىنان بولعاندىقتان, ماعان مۇعالىمدەر وتە جاقىن. مۇعالىمدەر تاۋەلسىز قازاقستاننىڭ قالىپتاسۋىنا زور ۇلەس قوسۋدا. ولار ۇلتتى تاربيەلەپ قانا قويماي, رەفورمالاردى ءتۇسىندىرىپ, ناسيحاتتاپ جانە ونىڭ جۇزەگە اسۋىنا ىقپال ەتىپ كەلەدى. پارتيا باعدارلاماسىندا ءبىلىم سالاسىنا ۇلكەن ماڭىز بەرىلىپ وتىرعانى دا سوندىقتان», دەدى ايمان قوجابەكقىزى.
ا.مۇساقوجاەۆانىڭ ايتۋىنشا, كەلەسى جىلدىڭ سوڭىنا دەيىن «نۇر وتان» پارتياسى ءۇش اۋىسىمدىق ءبىلىم بەرۋ مەن اپاتتى مەكتەپتەر ماسەلەسىن تۇبەگەيلى شەشەتىن بولادى. بۇل ءۇشىن ەلىمىز بويىنشا 42 جاڭا مەكتەپ سالىنادى. 2017 جىلى ەلباسىنىڭ تاپسىرماسىمەن تەگىن كاسىپتىك-تەحنيكالىق ءبىلىم بەرۋ ەنگىزىلەدى. ال 2021 جىلى قازاقستان قوعامى ءۇشىن ۇشتۇعىرلى ءتىل ۇيرەنشىكتى بولىپ قالماق.
بەسىنشى شاقىرىلىمداعى پارلامەنت ءماجىلىسىنىڭ دەپۋتاتى نۇرلان ءابدىروۆ ەلباسىنىڭ تىكەلەي تاپسىرماسىمەن ەلىمىزدە جاڭا جول توراپتارىن سالۋ جانە جولداردى كۇردەلى جوندەۋ جۇزەگە اسىرىلىپ جاتقاندىعىن ەرەكشە اتاپ, «نۇرلى جول» باعدارلاماسىنىڭ جۇزەگە اسۋى بارىس-كەلىستىڭ, الىس-بەرىستىڭ ارتۋىنا جاڭا مۇمكىندىكتەر اشاتىنىن جەتكىزدى. «پارتيانىڭ سايلاۋالدى باعدارلاماسىندا باسىمدىق بەرىلگەن باستى باعىتتىڭ ءبىرى ينفراقۇرىلىمدى دامىتۋ ەكەندىگىن اتاپ وتكەن ءجون. ءبىز 5 مىڭ شاقىرىم جاڭا اۆتوجول مەن 2,5 مىڭ شاقىرىم تەمىرجول سالامىز. بيىلدىڭ وزىندە 1,5 مىڭ شارشى مەتر قولجەتىمدى تۇرعىن ءۇي پايدالانۋعا بەرىلەدى», دەدى پارتيا بەلسەندىسى ن.ءابدىروۆ. ونىڭ سوزىنە قاراعاندا, بۇعان دەيىن پارتيانىڭ سايلاۋالدى تۇعىرناماسىندا ەلدىڭ يندۋستريالىق-يننوۆاتسيالىق دامۋىنا باسىمدىق بەرىلىپ, زاۋىتتار مەن فابريكالار اشىلسا, الداعى ۇگىت-ناسيحات جۇمىستارى اياسىندا وسى وبەكتىلەردىڭ بۇگىنگى تىنىس-تىرشىلىگىمەن تانىسۋ ءۇشىن وڭىرلەرگە ساپارلار جاسالاتىنى دا العا كولدەنەڭ تارتىلدى. سونىمەن دە پارتيا سايلاۋعا تەك ۋادەمەن عانا ەمەس, ناتيجەمەن دە باراتىنى اتالماي قالعان جوق.
اسقار تۇراپباي ۇلى,
«ەگەمەن قازاقستان».