پارتيا مۇشەلەرى شەتەلدىك ونەردىڭ, اسىرەسە, كينويندۋستريادا «باتىستىڭ مادەنيەتسىزدىگى» ورەسكەل قىلىقتار ارقىلى ءوزىن ءوزى اشكەرەلەپ كەلەتىنىن ءبىراۋىزدان جاريا ەتتى. سول سەبەپتى دە ەسەنتاي وزەنىنىڭ جاعاسىنا جينالعان پارتيانىڭ جاس تولقىن بەلسەندىلەرى تاۋداي ەتىپ ۇيىلگەن شەتەلدىك كينوفيلمدەر جازىلعان بەينەكاسسەتالاردى قىزىل تراكتوردىڭ دوڭعالاعىمەن اياۋسىز تاپتاپ, وزدەرىن دە تانىتا ءتۇسۋدىڭ پيار-اكتسياسىن جاسادى.
اكتسيا ۇستىندە «باتىس مادەنيەتسىزدىگى» بۇگىنگى جاس ۇرپاقتىڭ تاربيەسىنە كەرى اسەرىن تيگىزىپ وتىرعانى, جاستاردىڭ ۇلكەندى سىيلاۋ, جاڭاعا تالپىنۋ, پاتريوتيزم سەكىلدى داستۇرلەردەن ايىرىلىپ قالعانى تۋرالى كەيىستىكپەن ايتىلدى. اكتسيانىڭ باسى-قاسىندا پارتيا بەلسەندىسى, بەلگىلى تانىمال قوعام قايراتكەرى جامبىل احمەتبەكوۆ جانە باسقالارى ءجۇردى.
قازاقستان كومپارتياسى جاڭا سايلاناتىن پارلامەنت ءماجىلىسى مۇشەلەرىنىڭ قاتارىنا الدىن الا ءوز بەلسەندىلەرىنىڭ ءتىزىمىن ەنگىزدى. ولاردىڭ قاتارىندا پارلامەنت ءماجىلىسىنىڭ بىرنەشە دۇركىن دەپۋتاتى بولعان ۆلاديسلاۆ كوسارەۆتىڭ پارتيالىق جاقتاستارى – جامبىل احمەتبەكوۆ پەن ايقىن قوڭىروۆ, وتكەن جىلعى پرەزيدەنت سايلاۋىنا قاتىسقان تۇرعىن سىزدىقوۆ, پارلامەنت ءماجىلىسىنىڭ سوڭعى شاقىرىلىمىنىڭ دەپۋتاتتارى تۇرسىنبەك ومىرزاقوۆ, گالينا بايماحانوۆا, بوريس سوروكين بار.
سول كۇنى كوممۋنيستەردىڭ ءبىر شوعىرى «قازترانسگاز ونىمدەرى» جشس ەڭبەك ۇجىمىمەن بىرلەسىپ, پارتيانىڭ سايلاۋالدى باعدارلاماسىن تالقىلادى. سونداي-اق, الماتى كوممۋنيستەرى سايلاۋ ناۋقانى باستالعان وسى كۇنى كوممۋنيستىك يدەولوگيانىڭ كوسەمى لەنيننىڭ ساياباقتاعى ەسكەرتكىشىنە گۇل شوقتارىن قويۋدى دا ۇمىتپادى.
ال كەشە استانادا قكحپ اتىنان دەپۋتاتتىققا كانديداتتار «تۇران-پروفي» اكادەمياسىنىڭ وقىتۋشىلارىمەن كەزدەستى. كوممۋنيستەر بۇل اۋديتوريانى بەكەردەن-بەكەر تاڭداعان جوق. بەسىنشى شاقىرىلىمداعى ءماجىلىس دەپۋتاتى گالينا بايماحانوۆانىڭ اتاپ كورسەتۋىنشە, قازىرگى كەزدە قازاقستاندا جاستار تاربيەسىنە كوپ كوڭىل ءبولۋ كەرەك. 90-شى جىلدارى ەلىمىزدە جاستار ماسەلەسى كەنجە قالدى. ءبىز سول كەزدەگى بۋىننىڭ تاربيەسىن السىرەتىپ الدىق. «ەلىمىزگە ورتا بۋىنداعى كاسىپكەرلەر قاجەت. الايدا, بەرىلگەن ءبىلىمنىڭ تەڭ جارتىسى تاربيە بولۋى ءتيىس», – دەدى ول.
قكحپ وك حاتشىسى تۇرعىن سىزدىقوۆتىڭ ايتۋىنا قاراعاندا, قازاقستاندا كوپپارتيالى جۇيەنى قولداۋ قاجەت. دەگەنمەن, بۇل ۇدەرىستىڭ قىزىعىنا ءتۇسىپ كەتپەي, ونى زاڭ اياسىندا قاداعالاعان ابزال. ماسەلەنى قىرعىزستان مەن ۋكرايناداعى جاعدايعا جەتكىزبەۋ كەرەك. «ءبىز الەۋمەتتىڭ ءالجۋاز توبىنىڭ مۇددەسىن قورعاۋعا تىرىسامىز. ءبىز زاڭنىڭ قاراپايىم حالىققا قىزمەت ەتكەنىن قولدايمىز», – دەدى ت.سىزدىقوۆ.
بەسىنشى شاقىرىلىمداعى ءماجىلىس دەپۋتاتى ايقىن قوڭىروۆ تا ونىڭ ءسوزىن ءتىرىلتىپ, حالىقتىڭ ءالجۋاز توپتارى تۋرالى كەڭىنەن باياندادى. ول وتكەن سايلانىمدا «حالىقتىق كوممۋنيستەر» فراكتسياسى عانا اشىق تۇردە قازاقستان ايەلدەرىنىڭ زەينەت جاسىن ۇلعايتۋ زاڭناماسىنا قارسى شىققانىن ايتتى. وكىنىشكە قاراي, زاڭ جوباسىن كەرى قايتارۋ مۇمكىن بولمادى, دەگەنمەن, قوعامدىق پىكىردىڭ اسەرى قاتتى بولدى. زاڭ جوباسى كەيىنگە قالدى. ال ونىڭ جۇزەگە اسىرىلۋى قالاي بولادى, ونى ۋاقىت كورسەتەدى», – دەدى ول.
سونىمەن قاتار, ا.قوڭىروۆ كوممۋنيستەر جول قوزعالىسى جۇيەسىنە جۇرگىزىلگەن رەفورمالارعا قاتىستى پىكىر بىلدىرگەندە جۇرگىزۋشىلەردىڭ مۇددەسىن قورعاعانىن جەتكىزدى. «اۋىل شارۋاشىلىعى كووپەراتسيالارى تۋرالى» زاڭ جوباسى تالقىلانعاندا دا بەلسەندىلىك تانىتتىق. ءبىز زاڭداردى ادامداردىڭ وقۋىنا, جۇمىس ىستەۋىنە, جاقسى ءومىر سۇرۋىنە جانە دامۋىنا ىڭعايلى ەتىپ وزگەرتكىمىز كەلەدى. پارلامەنتكە وسى ماقساتقا جەتۋ ءۇشىن بارامىز. ءبىز سىزدەردىڭ قولداۋلارىڭىزعا سەنەمىز!», – دەپ قورىتتى ءسوزىن ا.قوڭىروۆ.
تالعات ءسۇيىنباي,
«ەگەمەن قازاقستان».
الماتى.