20 اقپان كۇنى ورال وڭىرىنە قازاقستاننىڭ «اق جول» دەموكراتيالىق پارتياسىنىڭ توراعاسى, «اتامەكەن» ۇلتتىق كاسىپكەرلەر پالاتاسى ءتورالقاسىنىڭ مۇشەسى, وسى پالاتانىڭ جانىنداعى سىبايلاس جەمقورلىققا قارسى ءىس-قيمىل جونىندەگى كەڭەستىڭ توراعاسى ازات پەرۋاشەۆ كەلدى.
ول ەڭ الدىمەن وزدەرىنىڭ سايلاۋالدى ناۋقانى وزگە ەمەس, ناق وسى وبلىستان باستالىپ وتىرعانى كەزدەيسوقتىق ەمەس ەكەنىنە توقتالدى. اتالعان پارتيا توراعاسىنىڭ مالىمدەۋىنشە, قازاقستان بارىنشا باتىستىق جانە ەۋروپالىق وركەنيەتتى, تابىستى باعىتتار بويىنشا دامۋى قاجەت. ال باتىس قازاقستان وبلىسى رەسپۋبليكانىڭ ەۋروپالىق بولىگىندە ورنالاسقان. ياعني, بۇل ايماق قازاقستان ءۇشىن ەۋروپالىق بولىككە اپاراتىن قاقپا, ال ەۋروپالىقتار ءۇشىن ازياعا اشىلاتىن كىلت ىسپەتتەس. نىساندىق تۇردە قاراستىرعاندا ۇگىت-ناسيحات شارالارىن ورالدان وراۋىمىزدىڭ ورايى وسىنداي. ويتكەنى, ءبىزدىڭ پارتيانىڭ باعدارلاماسى باتىستىق دامۋدىڭ ەۋروپالىق ۆەكتورىنا باعىتتالعان, دەدى ول.
ءبىز بۇگىن وڭىردەگى كاسىپكەرلەر پالاتاسى فيليالى عيماراتىندا باس قوسىپ وتىرمىز. بۇل دا تەكتەن تەك ەمەس. بۇلاي بولاتىن سەبەبى «اق جول» پارتياسىنىڭ باستى ماقساتى – كاسىپكەرلىككە كەڭ جول اشۋ. سونداي-اق, مۇنداي كوزقاراس داعدارىسقا قارسى باعدارلامانىڭ باستى ءبىر قۇرالى ءرولىن دە اتقارا الادى. بۇگىندە سىرتقى رىنوكتاعى ءبىزدىڭ شيكىزاتىمىزدىڭ باعالارى تومەندەپ بارادى. ونىڭ ەڭ باسىندا مۇناي شيكىزاتى تۇر. بۇل جايت ۇلتتىق ۆاليۋتامىزدىڭ تۇراقتىلىعىنا سالقىنىن تيگىزۋدە, دەدى بۇدان ءارى ازات پەرۋاشەۆ. «اق جول» كوشباسشىسى ءوز وي-پىكىرىن بىلايشا تۇجىرىمدادى.
ءبىزدىڭ ەكونوميكامىزدىڭ تەك ءبىر جاقتى شيكىزاتتىق بازاعا تىرەلىپ قالۋى يگىلىككە جەتكىزبەيدى. سوندىقتان وندىرىستىك جانە ونەركاسىپتىك ەكونوميكانى وركەندەتۋگە ءبىرىنشى كەزەكتە باعىت ۇستاپ, بۇعان داڭعىل جول اشۋ قاجەت. ءتۇيىپ ايتقاندا, بۇل ءازىر ونىمدەر مەن باسەكەلەستىككە توتەپ بەرە الاتىن تاۋارلار دەگەن ءسوز. داعدارىس كەزىندە ادامداردى ءبىرىنشى كەزەكتە تولعاندىراتىنى – كۇندەلىكتى تۇتىناتىن تاۋارلار باعاسى مەن كوممۋنالدىق قىزمەت تاريفتەرىنىڭ ءوسۋى. شىنتۋايتىنا كەلگەندە, اۋىزدىقتالمايتىن, اسۋ بەرمەيتىن جانە سەڭى بۇزىلماي تۇرىپ الاتىن بىردە-ءبىر داعدارىس بولمايدى. كەز كەلگەن داعدارىستىڭ ءوز شەشىمى تابىلادى. ونى رەتتەۋدىڭ باستى جولدارىنىڭ ءبىرى – الىپ-ساتۋ مەن تۇتىنۋشىلىققا ەمەس, كەرىسىنشە, تەرەڭ وڭدەۋ مەن دايىن ءونىمدەر شىعارۋعا نەگىزدەلگەن وندىرىستىك ەكونوميكا قۇرۋ.
سايلاۋالدى ناۋقان شەڭبەرىندە «كوندەنسات» اق كومپانيالار توبىنىڭ توراعاسى, باتىس قازاقستان وبلىستىق كاسىپكەرلەر پالاتاسى ايماقتىق كەڭەسىنىڭ جەتەكشىسى ۆالەري ءجۇنىسوۆ, «جايىق دەنت» جانە «تسۆەتۋششيە سادى» جشس-لەرىنىڭ ديرەكتورلارى مەرۋەرت مۋسينا مەن ەلەنا ۋلانوۆا, جەكە كاسىپكەر ولگا مياكۋشينا مەن «سەرتيفيكاتسيا ورتالىعى» جشس-ءنىڭ ديرەكتورى ءنادىر قۇرىمباەۆ ءسوز الىپ, وندىرىستىك ەكونوميكا قۇرۋ مەن جەكە بيزنەستى جۇرگىزۋ جونىندەگى پارتيا ءتوراعاسىنىڭ سوزىنە قولداۋ كورسەتتى.
سونىمەن بىرگە, ولار بيزنەسپەن شۇعىلدانۋ قاۋىپسىز ءارى تارتىمدى ىسكە اينالۋى قاجەتتىگىن اتاپ كورسەتتى. سايلاۋالدى ۇگىت-ناسيحاتقا ارنالعان كەزدەسۋ كەزىندە اقجولدىقتار كەز كەلگەن مەملەكەتتى ىشىنەن ۇڭگىپ جەيتىن قۇرت ىسپەتتەس قاۋىپتى دەرت – سىبايلاس جەمقورلىق كورىنىستەرى سول مەملەكەتتىڭ باستى جاۋى دەپ سانايتىندىقتارىن جەتكىزدى. سونىمەن بىرگە, بۇل وي-پىكىر بيزنەستى ودان ءارى دامىتۋعا قاتىستى دا ايتىلدى. ويتكەنى, سىبايلاس جەمقورلىق مەملەكەتتىك رەسۋرستاردى تالان-تاراجعا سالىپ, كاسىپكەرلىكتى تۇنشىقتىراتىن قاۋىپتى قۇبىلىس, دەدى سايلاۋالدى ۇگىت-ناسيحات جۇمىستارىنا ارنالعان ءسوز ءتۇيىنىندە پارتيا توراعاسى ازات پەرۋاشەۆ.
تەمىر قۇسايىن,
«ەگەمەن قازاقستان».
ورال.