ارقا ءتوسىنىڭ ون ساۋساعىنان ونەر تامعان حاس شەبەرلەرگە كەندە بولعان كەزى جوق. بۇرىنعى وتكەن ونەرلىلەردىڭ بۇگىنگى جالعاسى جاس كاسىپكەر ارمان توسقانباەۆتى ايتۋعا بولادى.
بۇگىنگى كۇندە تالاپتى جاس ءوزىنىڭ باعىن ساعات جاساۋ سىندى سيرەك تالانت پەن عالامات ىجداعاتتىلىقتى تالاپ ەتەتىن مەحناتتى ىستە سىناپ ءجۇر. العاشقى قادامى جامان ەمەس. شەبەردىڭ قولىنان شىققان «وتان پاتريوتى» دەپ اتالاتىن ەرلەردىڭ 25 قولساعاتى كوزدى اشىپ-جۇمعانشا ءوتىپ كەتكەن. تسيفەربلاتىندا قازاقستاننىڭ ەلتاڭباسى بەدەرلەنگەن ساعاتتاردى دەپۋتاتتار مەن مەملەكەتتىك قىزمەتكەرلەر پىشاق ۇستىندە تالاپ اكەتىپتى. ناۋرىز ايىندا ارمان «پرەزيدەنت» دەپ اتالاتىن ساعاتتىڭ قىمبات جيىنتىعىن قۇراستىرىپ شىعارماق. ودان كەيىنگى كەزەكتە ايەلدەرگە ارنالعان ساعاتتار تۇر.
جاقسىنىڭ ءىسى جەردە جاتقان با؟ قازىرگى تاڭدا ارمان تاپسىرىستىڭ استىندا قالعان. ەلىمىزدىڭ تۇپكىر-تۇپكىرىنەن التىن جانە كۇمىس ساعاتتارعا دەگەن تاپسىرىستار كۇن سايىن ءتۇسىپ جاتقان كورىنەدى. اسىرەسە, استانا مەن الماتىنىڭ ساعاتقۇمارلارى بۇل شارۋادا ات وزدىرىپ تۇر.
قازىرگى تاڭدا ارماننىڭ شاعىن عانا شەبەرحاناسىندا بەس ادام ەڭبەك ەتەدى. كىم بىلەدى, مۇمكىن بۇل قازاقستان تاريحىنداعى ساعات شىعاراتىن تۇڭعىش مانۋفاكتۋرانىڭ باسى شىعار؟! «ماعان بۇل ىستە وتانعا دەگەن سۇيىسپەنشىلىك رۋحاني كۇش بەرەدى. ەلباسىمىز وتاندىق ءوندىرىستى دامىتۋ كەرەك دەگەندە بۇعان مەن ءوزىمنىڭ ۇلەسىمدى وسىلايشا قوسقىم كەلدى», – دەپ سىر اقتارادى ارماننىڭ ءوزى.
قازىر ارماندار ساعاتتىڭ دايىن ءبولشەكتەرىن قۇراستىرۋمەن عانا اينالىسادى. بارا-بارا بۇل ءىستى جەتىلدىرىپ, قۇراستىرۋدى تەرەڭدەتە ءتۇسۋ – كوزدەگەن ماقساتتىڭ ءبىرى. مىسالى, ساعاتتىڭ باۋى مەن كورپۋسىن جانە بەدەرورنەگىن سالۋدى ءوز بەتتەرىمەن جاساي باستاماق.
نەگىزىنەن, قول ساعاتىنا قاجەتتى ءبولشەكتەر شۆەيتساريا, جاپونيا جانە قىتاي مەملەكەتتەرىندە شىعارىلادى. بۇرىن بۇل ىسپەن رەسەيلىكتەر دە اينالىسقان ەكەن, الايدا, ولار بەلگىلى سەبەپتەرمەن مۇنداي شارۋادان باس تارتىپتى. البەتتە, ساعات جاساۋ نارىعىندا بوس ورىن جوق دەسە دە بولادى. باسەكەلەستىك دەگەنىڭىز جالىنا قول تيگىزبەيدى. دەگەنمەن, سولاي ەكەن دەپ تارتىنىپ وتىرعان ارمان جوق. ونىڭ ويىنشا, وزىندىك ءوندىرىستى دامىتىپ, ونى جەرگىلىكتى مازمۇنمەن بايىتىپ, دايىن ونىمگە پاتريوتتىق تەرەڭ ءمان بەرۋ – يگىلىكتى ءىس, باستى مىندەت.
ارمان العاشقى ساعاتتاردىڭ ديزاينىن ءوز قولىمەن سىزعان. سوڭىنان مامانداردىڭ كومەگىنە سۇيەنە وتىرىپ, ەلىمىزدەگى اتاۋلى داتالار مەن باس قالامىزداعى تانىمال عيماراتتاردى بەينەلەگەن نۇسقالار پايدا بولا باستادى. ارمانعا بۇل ىستە ءونىمى امەريكا مەن ەۋروپا نارىعىنا تارايتىن «Miami watch» كومپانياسىندا جۇمىس ىستەيتىن قازاق جىگىتتەرى كوپ قولعابىسىن تيگىزگەن ەكەن. سولاردىڭ كومەگىنىڭ ارقاسىندا بىرلەسكەن ءوندىرىس قۇرۋدىڭ ءمۇمكىندىگى تۋدى.
ارماننىڭ شاعىن عانا ساعات جاساۋ مانۋفاكتۋراسىنىڭ جوباسى جىل سايىنعى «ءوز بيزنەسىڭدى جاسا!» اتتى رەسپۋبليكالىق كونكۋرسقا قاتىسۋدا. بۇل بايقاۋدى كەڭەس راقىشەۆ (Singulariteam قورىنىڭ ارىپتەس باسقارۋشىسى) پەن ۆياچەسلاۆ كيم («Kaspi Bank» اق ديرەكتورلار كەڭەسىنىڭ ءتوراعاسى) قولداۋ كورسەتەتىن «ءسابي» قايىرىمدىلىق قورى ۇيىمداستىرعان. ەگەر دە ارمان ۇسىنعان جوبانىڭ جۇلدىزى جانىپ, بايگەگە دەپ تىگىلگەن 100 مىڭ اقش دوللارى كولەمىندەگى سىياقىنى ۇتىپ الار بولسا, قازاقستاندىق ساعات جاساۋشى شەبەرلەردىڭ تاسى ورگە دومالاۋشى ەدى. قوماقتى قارجىعا وندىرىسكە قاجەتتى قۇرال-جابدىق الىنسا – جوقتان بار جاساپ جاتقان تالاپتى ورەندەردىڭ تاسى ورگە دومالار ەدى عوي. «سوندا, – دەيدى ارمانشىل جاس ارمان, – قولىنا قازاقستاندىق ساپالى ءارى ءساندى ساعات تاققان وتانداستارىما وزگە جۇرتتىڭ وكىلدەرى قىزىعا قارايتىن بولادى».
قايرات ءابىلدينوۆ,
«ەگەمەن قازاقستان».
قاراعاندى.