قارشاداي عانا قاھارمان

باۋىرلارىن «ءتىلسىز جاۋدان» قۇتقارىپ, ەرلىك تانىتتى ءورت دەگەنىڭىز ءتىلسىز جاۋ عوي. اياق استىنان تۇ­تانىپ, اينالاسىن شارپىپ, ءتىلى تيگەن جەردى كۇلگە اينالدىرادى. بۇرناعى كۇنى قىزىلوردا قالاسىندا جالىن شارپىعان كەزدە جەكە سەكتورداعى تۇرعىن ءۇي دە وتقا ورانعان. ول كەزدە ۇيدە بىرنەشە بالا بولعان. ال ۇلكەندەرى جۇمىستا جۇرگەن ەدى. ءورت كۇندىزگى ساعات 12:05-تە باستالعان. بارلىعى 64 شارشى مەتر جەردى جالىن شالعان. ءورت سوندىرۋشىلەر وتتى 13:25 ساعاتتا اۋىزدىقتاعان. ءۇيدىڭ ءىشى كوك تۇتىنگە ورانعاندا وندا 1 جاستاعى جانە ەكىدەن ەندى اسقان ءسابي, سونىمەن قاتار 5 جانە 12 جاستاعى بالالار عانا بولعان. بالالار تۇتىنگە تۇنشىعىپ, ۋلانىپ قالعان. ولار قازىر وبلىستىق بالالار اۋرۋحاناسىندا جاتىر. ال باۋىرلارىن اجالدان اراشالاپ قالعان – 11 جاستاعى ارۋجان بيسەنباەۆا. ول سىن ساعاتىندا ەش ساسپاي, وتقا ورانىپ جاتقان ۇيدەن باۋىرلارىن دالاعا الىپ شىققان. ءسويتىپ ءجۇرىپ, ءوزى دە ۋلانىپ قالعان. ارۋجان دا قازىر باۋىرلارىمەن بىرگە اۋرۋحانادا جاتىر. جاس جەتكىنشەكتەردىڭ كورەر جارىعى بار ەكەن. ارۋجان بولماعاندا, جاعداي الدەقانداي بولىپ كەتەر مە ەدى؟ قارشاداي عانا قاھارمان قىز ۇلكەن ەرلىك جاسادى. ەرجان بايتىلەس, «ەگەمەن قازاقستان». قىزىلوردا.