قازاقستاننىڭ زەينەتاقى زاڭناماسىنداعى سوڭعى وزگەرىستەرگە سايكەس, اسكەري قىزمەتشىلەر مىندەتتى زەينەتاقى جارنالارىن تولەۋدەن بوساتىلدى. بۇدان بۇرىن 1998 جىلعى 1 قاڭتارداعى جاعداي بويىنشا اسكەري ەڭبەك ءوتىلى 10 جىلدان كەم قازاقستان قارۋلى كۇشتەرىنىڭ اسكەري قىزمەتشىلەرىنە بيۋدجەتتىك قاراجات ەسەبىنەن اقشالاي ۇستالىمنىڭ 20 پايىزى كولەمىندە بىرىڭعاي جيناقتاۋشى زەينەتاقى قورىنا مىندەتتى زەينەتاقى جارنالارى ءتارتىبى ەنگىزىلگەن بولاتىن.
وسى تۇزەتۋلەر ارنايى مەملەكەتتىك جانە قۇقىق قورعاۋ ورگاندارى, مەملەكەتتىك فەلدەگەرلىك قىزمەت قىزمەتكەرلەرىنە, سونداي-اق, 2012 جىلدىڭ 1 قاڭتارىنان باستاپ ارنايى اتاق پەن سىنىپتىق شەندەردى تاعۋعا, نىساندى كيىم كيۋگە قۇقىقتارىنان ايىرىلعان تۇلعالارعا قاتىستى بولدى.
بۇل رەتتە مەرزىمدى قىزمەتتەگى اسكەري قىزمەتشىلەر جيناقتاۋشى زەينەتاقى جۇيەسىنە قاتىسا وتىرىپ, اي سايىنعى كىرىستەن 10 پايىز كولەمىندە مىندەتتى زەينەتاقى جارنالارىن جۇزەگە اسىرۋدى جالعاستىرا بەرەتىنىن ايتا كەتكەن ءجون.
ەستەرىڭىزگە سالا كەتەيىك, 2016 جىلدىڭ 1 قاڭتارىنان كەيىن جۇمىستان بوساتىلعان جانە ەڭبەك سىڭىرگەن نەمەسە جالپى ەڭبەك ءوتىلى 25 جىل, ونىڭ ىشىندە 12,5 جىلى ۇزدىكسىز اسكەري قىزمەت بولسا تولىق كولەمدە زەينەتاقىمەن قامتاماسىز ەتىلەدى. سونىمەن قاتار, مىندەتتى زەينەتاقى جارنالارىنىڭ 50 پايىزىن قايتارعان كەزدە تولىق كولەمگە جەتكىزە وتىرىپ, 2016 جىلعى 1 قاڭتارعا دەيىن تولىق ەمەس كولەمدە تاعايىندالعان زەينەتاقى تولەمدەرىن قايتا ەسەپتەۋ جۇزەگە اسىرىلادى.
مەملەكەت اۋدارعان جيناقتالىمنىڭ جارتىسىن قولدانىستاعى اسكەري قىزمەتشىلەرگە, تولىق ەمەس كولەمدە زەينەتاقى تولەمدەرىن الۋشىلارعا جانە 1998 جىلدىڭ 1 قاڭتارىنان كەيىن قىزمەتكە العاش رەت ورنالاسقان جانە 2016 جىلعى 1 قاڭتارعا دەيىن زەينەتاقى الۋ قۇقىعىنا يە اسكەري قىزمەتشىلەرگە قايتارۋ قاجەت. زەينەتاقىسى تولىق كولەمدە تاعايىندالعان قولدانىستاعى اسكەري قىزمەتشىلەرگە مۇنىڭ ەش قاتىسى جوق. ولار بەلگىلەنگەن زەينەتاقى تولەمدەرىن الۋدى ءارى قاراي جالعاستىرا بەرەدى.
«ەگەمەن-اقپارات».