كيىك دەگەن جانۋار بار ەدى. دوبالداي تۇمسىعىمەن اۋا تارتىپ, باسىن جەرگە تۇقىرتىپ اتقان وقتاي زاۋلاعاندا شاپقان اتقا جەتكىزبەيتىن. ساكەن سەيفۋللين انگە قوسقان كيەلى جانۋاردىڭ ءبىر عادەتى, جول بويىنان ماشينا كورسە قۇيعىتا شاۋىپ الدىن كەسىپ وتپەي توقتامايتىن.
قۇرالايدىڭ سالقىنى كەزىندە اۋىل سىرتىنا سىيماي ازان-قازان بولىپ ماڭىراپ جاتاتىن. ماڭ دالادا بوسىپ جۇرەتىن سول ميلليونداعان كيىكتەردى جۇرت «بۇل دۇنيەسىن وزىنە قيماعان ساراڭ قارىنبايدىڭ مالى» دەيتىن.
سول سان ميلليونداعان كيىكتەردەن ايىرىلىپ قالدىق. سايىن دالا بوس. اجالىن, بۇگىنگىدەي ايتىپ جۇرگەن, ۋلى شوپتەن ەمەس, نەگىزىنەن قىرىپ تاۋىسپاسا كوزىنىڭ قانى تارقامايتىن ەكى اياقتى جىرتقىشتاردان كەلدى. وتكەن عاسىردىڭ توقسانىنشى جىلدارىنداعى توقىراۋدا قىتايعا ءمۇيىز وتكىزىپ پايدا تاپقاندار جازىقسىز جانۋارلاردىڭ تەك تەكەسىن تاڭداپ اتىپ, ەتىن الىپ كەتە الماي دالانى قان ساسىتقان.
بۇگىندە ماڭ دالانىڭ ءسانى كيىك جوق. ەندى ەكى اياقتى جىرتقىشتار تۇندە جايىلىمدا جۇرگەن مالعا تىنىشتىق بەرۋدى قويدى. كوزكە تۇرتسە كورگىسىز تۇندە اڭ قاراۋعا شىققانداي مىلتىعىن اسىنىپ جايىلىمعا بارادى دا, قوڭدىلاۋلارىن اتىپ, قىرىپ سالادى. ءوز مالىنداي مۇقيات سويىپ, جىلىكتەپ ەت بازارلارىنا ساتىپ جىبەرەدى. تالايى ۇستالدى, سوتتى بولدى. اۋىلداردا مەدياتور شالدار بار.
كەشىرىمگە الدىنداعى مالىن مال ۇرلاتقانعا سىپىرىپ بەرگەن, مەدياتورلارعا دا ات مىنگىزگەن ۇرى ەكى-ءۇش اپتا ۇرتى سالبىراپ جۇرەدى دە, ۇيرەنگەن ماشىعىنا قايتا باسادى.
ماقتاارالدا تۇرعىنداردىڭ جايىلىمدا دەپ الاڭسىز جۇرگەن 18 باس ءىرى قاراسىن ايداپ اكەتىپ, شىمكەنتكە كەلىپ مال بازارىندا ساتىپ جىبەرگەن ەكەۋ ۇستالدى. كۇدىكتىنىڭ ءبىرى بۇرىن سوتتى بولعان ەكەن. تەمىر توردىڭ ار جاعى اششى ساباق بولماعانعا ۇقسايدى. ەكەۋدىڭ بۇدان بولەك تاعى ءۇش ۇرلىققا قاتىستىلىعى انىقتالعان.
دالانىڭ ەركەسى كيىك تۋرالى بەكەر اڭگىمە قوزعامادىق. ولاردى قىرىپ تاستاعاندار ەندى جايىلىمدا جۇرگەن ءتورت ت ۇلىكتى دە قارىنبايدىڭ يەسىز مالى كورەتىن سىڭايلى. اتىپ الادى, ايداپ كەتەدى. ۇستالسا ات-شاپان ايىبىن تولەيدى.
قازىر ۇستالعان ەكەۋدىڭ ۇستىنەن قر قك-ءنىڭ 188-بابىمەن «ۇرلىق» بويىنشا قىلمىستى ءىس قوزعالدى. قاماۋعا الىندى.
باقتيار تايجان,
«ەگەمەن قازاقستان».
وڭتۇستىك قازاقستان وبلىسى.