كەشە ورتالىق كوممۋنيكاتسيالار قىزمەتىندە «جىبەك جولى» راللي-مارافونىنىڭ جاڭا ماۋسىمىنا بايلانىستى ءباسپاسوز ءماسليحاتى ءوتتى. وندا ءرالليدىڭ بيىلعى باعدارى, ۇيىمداستىرۋ جۇمىستارىنا قاتىستى مالىمەتتەر, قازاقستاندىق ەكيپاجدار جانە جوباعا قاتىستى تاعى باسقا ماسەلەلەر ءسوز بولدى.
شاراعا قاتىسقان مادەنيەت جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ توراعاسى ەلسيار قاناعاتوۆ ءرالليدىڭ قازاقستان ءۇشىن ماڭىزدى جوبا ەكەنىنە توقتالدى.
«حالىقارالىق دەڭگەيدەگى وسىنداي اۋقىمدى سايىستاردى وتكىزۋ وتاندىق سپورتتىڭ دامۋىنا ءوز سەپتىگىن تيگىزەدى. سونىڭ ىشىندە وسىنداي ءرالليدىڭ ورنى ەرەكشە. سەبەبى, ول تەك بەلگىلى ءبىر قالادا ەمەس, ەلىمىزدىڭ بىرنەشە ءوڭىرىن قامتيدى. ءناتيجەسىندە اۆتو-كەرۋەن وتەتىن جەرلەردە ينفراقۇرىلىمدار دامىپ, شاعىن جانە ورتا كاسىپتىڭ وركەندەۋىنە مۇرىندىق بولادى. سونداي-اق, ءبىزدىڭ اسەم تابيعاتىمىز بەن تاريحي جەرلەرىمىز شەتەلدىك قاتىسۋشىلاردىڭ قىزىعۋشىلىعىن وياتاتىنى ءسوزسىز. بۇل ءوز كەزەگىندە تۋريزم سالاسىنىڭ دامۋىنا سەپ بولادى», – دەيدى كوميتەت توراعاسى.
ەلسيار قاناعاتوۆتىڭ ءسوزىنە قاراعاندا, «جىبەك جولى» رالليىنە قاتىسۋشىلار قوستاناي, استانا, بالقاش جانە الماتى قالالارىن باسىپ وتەدى. وعان اۆتوموبيل سپورتى فەدەراتسياسى مەن «سامۇرىق-قازىنا» ۇلتتىق ءال-اۋقات قورى قولداۋ بىلدىرەدى.
سونىمەن قاتار, جيىندا «جىبەك جولى ءرالليى» جوباسىنىڭ اتقارۋشى ديرەكتورى سەرگەي گيريا سايىستىڭ بيىلعى باعدارى مەن قاتىسۋشىلار سانىنا توقتالدى. ونىڭ ايتۋىنشا, جوبا 8 شىلدە كۇنى ماسكەۋدىڭ قىزىل الاڭىنان باستاۋ الادى.
«جىبەك جولى» العاش رەت 2009 جىلى ۇيىمداستىرىلدى. سودان بەرى جوبا الەمدىك سپورتتا ءوز ورنىن ايقىنداپ, كوپشىلىكتىڭ نازارىن اۋداردى. بيىلعى جارىس 16 كۇنگە جالعاسادى. بۇل – راللي تاريحىنداعى ەڭ ۇزاق مەرزىم. ماسكەۋدەن باستالعان كەرۋەننىڭ مارەسى – بەيجىڭ قالاسى. ول جەرگە 24 شىلدەدە جەتەمىز دەپ جوسپارلاپ وتىرمىز. قاتىسۋشىلار ەكى اپتانىڭ ىشىندە 10 مىڭ شاقىرىمدى ءجۇرىپ وتۋلەرى ءتيىس. ونىڭ جارتىسىنان كوبى جىلدامدىقتى تالاپ ەتەتىن ارنايى ۋچاسكەلەر. سوندىقتان «جىبەك جولىن» ۇزاق ۋاقىتتا قىسقا باعداردى ءجۇرىپ وتۋىنە بايلانىستى گيننەستىڭ رەكوردتار كىتابىنا ەنگىزۋ كوزدەلۋدە», – دەگەن سەرگەي گيريا بيىل راللي-مارافونعا الەمنىڭ ءار ەلىنەن 120 كوماندا قاتىساتىنىن ايتتى. سونىڭ ىشىندە 15-كە جۋىق ەكيپاج قازاقستاننىڭ نامىسىن قورعايدى.
بۇدان بولەك, اتقارۋشى ديرەكتور تەحنيكالىق قولداۋ رەتىندە مارافونعا 16 ۇشاق پەن تىكۇشاق ىلەسىپ جۇرەتىنىن جەتكىزىپ, «مۇنداي شارا جارىس جولىنداعى ەلدى مەكەندەردىڭ اۆياتسيالىق ينفراقۇرىلىمىن دامىتۋعا تاپتىرمايتىن ءمۇمكىندىك. ماسەلەن, بالقاش سىندى شاعىن قالالارداعى اۋەجايلار جارىس كەزىندە كۇنىنە بىرنەشە ۇشاقتاردى قابىلدايتىن بولادى. بۇل بالقاشتىقتار ءۇشىن ۇلكەن تاجىريبە بولارى انىق. سونداي-اق, الەمنىڭ بىرنەشە ەلىنە تارايتىن الدىڭعى قاتارلى سپورت ارنالارى ءرالليدى تىكەلەي ەفيردە كورسەتەدى. وسى رەتتە كورسەتىلىمنىڭ 30 پايىزى جەرگىلىكتى جەردىڭ تابيعاتىنا ارنالاتىنىن اتاپ وتكەن ءجون», – دەدى.
تاعى ءبىر ايتا كەتەر جايت, مارافون كەزىندە الماتىعا ەۋروپادان 1 مىڭعا جۋىق قوناق كەلەدى دەپ كۇتىلۋدە. ولاردىڭ باسىم بولىگىن تۋريستەر مەن جۋرناليستەر قۇرايدى. دەمەك, بۇل ءىرى شاھار ءۇشىن قوسىمشا تابىس كوزى بولماق. ۇيىمداستىرۋشىلاردىڭ سوزىنە سەنسەك, اتالعان راللي-مارافوننان قازاقستان كەم دەگەندە 3,5 ميلليون ەۋرو تابىس تابادى.
ەلامان قوڭىر,
«ەگەمەن قازاقستان».