فۋتزالدان ەۋروپا بىرىنشىلىگىنە تۇڭعىش رەت قاتىسىپ, ءۇشىنشى ورىندى جەڭىپ العان قازاقستان قۇراماسى وسىلاي اتالىپ وتىر
قازاقستان فۋتبولىنىڭ تاريحىنا تاعى جاڭا جارقىن بەت قوسىلدى. بۇل جولى شاعىن فۋتبولدىڭ شەبەرلەرى ەرلەدى. بۇرناعى كۇنى تۇندە ەلىمىزدىڭ قۇراماسى سەربيانىڭ استاناسى – بەلگرادتا مارەگە جەتكەن فۋتزالدان ەۋروپا چەمپيوناتىنىڭ فينالىندا الاڭ يەلەرىن 5:2 ەسەبىمەن ۇتىپ, قولا جۇلدەگەر اتاندى.
باس جاتتىقتىرۋشى كاكاۋدىڭ شاكىرتتەرى وسىلايشا وزدەرى تۇڭعىش رەت قاتىسىپ وتىرعان قۇرلىق بىرىنشىلىگىندە قولا مەدالعا قول جەتكىزدى. ءوزىنىڭ باستاۋىن 1996 جىلدان الاتىن بۇل دوپ دوداسى شەجىرەسىندە دەبيۋتانتتىڭ بۇلايشا جوعارى تابىسقا جەتۋى بۇعان دەيىن بولماعان ەكەن.
ال ءۇشىنشى ورىن ءۇشىن تالاس وتە قىزۋ باستالدى. ونىڭ بىردەن اسا تارتىسقا تولى بولعانىن كەزدەسۋدىڭ ءبىرىنشى تايمىندا بار-جوعى ءبىر گول سوعىلعانىنىڭ ءوزى انىق اڭعارتادى. بىراق كوماندالار ءبىر-بىرلەرىنىڭ اڭىسىن اڭدىپ, قورعانىستى قولايلاپ وتىرعان جوق. بۇل جاعىنان اسا بەلسەندى قيمىلداعان جاساقتار كورەرمەندى ۇدايى وزىنە نازار اۋدارتىپ تۇردى. بۇعان ءبىر جاعى سەربتەردىڭ جەرگىلىكتى جانكۇيەرلەردىڭ دەمەۋىمەن ۇزدىكسىز العا ۇمتىلۋلارى اسەر ەتسە, ەكىنشى جاعىنان قازاقستاندىقتار ءوزىنىڭ تاريحىنداعى ەڭ العاشقى ءىرى حالىقارالىق جارىسىنان جۇلدەمەن ورالۋعا بار كۇشىن سالدى. قوناقتاردىڭ نەگىزگى قاقپاشىسى يگيتانىڭ ديكۆاليفيكاتسيادان كەيىن وسى ماتچقا قوسىلۋى دا ءبىزدىڭ جىگىتتەردى جىگەرلەندىرە ءتۇستى.
وسىنداي تارتىستى تالاستا قاقپاعا قاراي كوسىلتە دوپ ۇرۋ دا وڭاي بولعان جوق. ونداي ءسات ءبىرىنشى رەت تەك 9-مينۋتتا عانا مۇمكىن بولدى. سەربتەردىڭ 34 جاستاعى فورۆاردى ۆلاديمير لازيچ ءبىزدىڭ گولكيپەرمەن جەكپە-جەك شىعىپ, دوپتى ونىڭ ۇستىنەن اسىرا تاستادى. دوپ سول بويى تورعا قاراي كىرىپ بارا جاتقاندا, ونى سوڭعى ماۋرىتتە لەو قايتارىپ ۇلگەردى. مۇنىڭ سوڭىن الا قازاقستاندىقتار جاقسى قارسى شابۋىل ۇيىمداستىردى. ولاردىڭ بۇرىشتامادان تاستاعان دوبىن ميحايل پەرشين قاقپاعا شىرەنە ۇردى. بىراق ول قاقپا باعانىنا ءتيىپ كەرى سەرپىلدى. ال تايمداعى جالعىز گول 20-مينۋتتا سوعىلدى. ونى قارسى قاقپا بۇرىشىنان ساڭىلاۋ تاپقان ءبىزدىڭ دۋگلاس ءتۇسىردى. ول سەربتەر داربازاشىسى ميودراگ اكسەنتيەۆيچتىڭ قاتەلىگىن وتە جاقسى پايدالاندى.
ەكىنشى تايم ەندى قازاقستاندىقتاردىڭ شابۋىلىمەن باستالدى. ول جانە ءبىزدىڭ جىگىتتەردىڭ ەسەپتى تەز ۇلعايتا الۋىنا ۇلاستى. ءسويتىپ, 21-مينۋتتا سەرىك جامانقۇلوۆ وتە قاتتى سوققىمەن اكسەنتيەۆيچتىڭ سول جاق «ءبۇيىرىن» بۇلك ەتكىزدى. وسىمەن تۋرنيردەگى التىنشى گولىن سوققان فۋتبولشىمىز ەسەپتى 2:0-گە جەتكىزدى. وسى گولدان كەيىن سەربتەر تايلى-تاياعى قالماي العا ۇمتىلدى. ال قازاقتار قورعانىستا عانا قالماي, ءبىرىنشى مۇمكىندىك بولعان ساتتە-اق قارسى شابۋىل ۇيىمداستىرۋعا كۇش سالدى. ولار 29-مينۋتتا الەكساندر دوۆگان شابۋىل وتىندە بولعان ساتتە ەسەپتى ۇلعايتۋدىڭ ءبىر مۇمكىندىگىن جىبەرىپ الدى. ارادا ءبىر مينۋت وتكەندە, دۋگلاس سول وكىنىشتىڭ ورنىن تولتىرىپ بەردى – 3:0. بۇدان كەيىن بۇرىنعىدان بەتەر اشىنىپ كەتكەن الاڭ يەلەرى قورعانىستى مۇلدەم ۇمىتقانداي بولدى. ولار داربازاشىنى التىنشى ويىنشىعا اۋىستىرىپ, جاپپاي العا ۇمتىلىپ جاتقان ساتتە مەيماندار تاعى دا وسىدان وڭتايلى ناتيجە شىعارۋدىڭ جولدارىن قاراستىرىپ جاتتى. مۇنى جانە كوپ كۇتۋگە دە تۋرا كەلگەن جوق. ءبىزدىڭ جىگىتتەر وسىلايشا 32-مينۋتتا ەسەپتى 4:0-گە ءبىر-اق اپاردى. ونى قارسى جاق قاقپاسىنىڭ بوس تۇرعانىن پايدالانعان يگيتا الىستان ۇرىپ ءدوپ ءتۇسىردى.
قازاقستان قۇراماسى كەزدەسۋدىڭ 36-مينۋتىندا تابلوداعى ەسەپتى 5:0 ەتتى. بۇل جولى دا دۋگلاس مەرگەندىگىمەن كوزگە ءتۇسىپ, ويىنداعى حەت-تريگىن جاسادى. ول قاقپاشىمەن بىرگە-ءبىر شىققان ءساتىن ءمۇلت جىبەرگەن جوق. وسىدان كەيىن قازاقستاندىقتار ءبىرشاما بوساڭسىپ قالدى. ولار قالعان 4 مينۋتتا سەربتەردىڭ ەركىن ويناۋلارىنا مۇمكىندىك بەرىپ قويدى. سونىڭ ناتيجەسىندە الاڭ يەلەرى ەكى دوپتىڭ قارىمتاسىن قايتارىپ ۇلگەردى. الدىمەن 38-مينۋتتا ستەفان راكيچ گول سالدى, سوسىن فينالدىق ىسقىرىق ەستىلۋگە ەكى سەكۋند قالعاندا سلوبودان رايچەۆيچ مەرگەندىگىن تانىتتى. ءبىر ايتا كەتەتىن جايت, وسىنىڭ الدىنداعى جارتىلاي فينالدا رەسەي قۇراماسىنان وۆەر-تايمدا ۇتىلعان سەربيا فۋتبولشىلارىنىڭ شارشاپ قالعانى دا تەز بايقالدى. ال ولاردى ءوز ءۇيىنىڭ تورىندە تاس-تالقان ەتىپ جەڭگەن قازاقستان قۇراماسى وسىلايشا تۇڭعىش رەت ەۋروپا بىرىنشىلىگىنىڭ قولا جۇلدەسىنە قول جەتكىزدى.
چەمپيوناتتىڭ التىن جۇلدەسى وسىنىڭ الدىندا, جارتىلاي فينالدا قازاقستان كومانداسىن سۇرىندىرگەن يسپانيا قۇراماسىنىڭ قانجىعاسىنا بايلاندى. يسپاندار فينالدا رەسەيلىكتەردى 7:3 ەسەبىمەن ويسىراتا ۇتتى. وسىمەن رەسەي قۇراماسى قاتارىنان ءۇشىنشى رەت چەمپيوناتتىڭ فينالىندا قارسىلاستارىنا ەسە جىبەرىپ, كۇمىس مەدالدى قاناعات تۇتىپ وتىر.
جەڭىس قۇتتى بولسىن, قۇرمەتتى قازاقستاندىقتار!
دامير قوجامقۇل.