تاراز. 15 اقپان. جامبىل اۋداندىق ىشكى ىستەر باسقارماسىنىڭ قىزمەتكەرلەرى ون ەكى قىلمىس جاساعان كۇدىكتىلەردى قولعا ءتۇسىردى. بۇل تۋرالى جامبىل وبلىسى ىشكى ىستەر دەپارتامەنتىنىڭ ءباسپاسوز قىزمەتى حابارلادى.
جىل باسىنان بەرى جامبىل اۋداندىق ءىىب-نا بەلگىسىز بىرەۋلەردىڭ «قازاقتەلەكوم» اق ورناتقان تەلەفون كابەلدەرىن قيىپ, قولدى قىلعاندارى تۋرالى شاعىم تۇسكەن بولاتىن. ءىرى كولەمدە ماتەريالدىق شىعىن كەلتىرگەن كۇدىكتى تۇلعالاردى قۇرىقتاۋ ءۇشىن جامبىل ءاىىب-ءنىڭ تاجىريبەلى قىزمەتكەرلەرى قاتارىنان جىلجىمالى توپ قۇرىلىپ, جەدەل ىزدەستىرۋ ءىس-شارالارىن جۇرگىزدى. ناتيجەسىندە ورىن العان قىلمىسقا قاتىسى بار دەگەن كۇدىكپەن 21-23 جاستاعى ءۇش ازاماتتى قولعا ءتۇسىردى.
كۇدىكتى تۇلعالار قاڭتار ايىنىڭ التىسىندا ءسوز بايلاسۋ ارقىلى قىلمىستىق ويلارىن تۇركسيب اۋىلىنان باستاپ, سوڭعى قىلمىسىن اقپان ايىنىڭ ۇشىندە جاساعان. ولار كوشە بويىنداعى باعانالاردا ورناتىلعان «قازاقتەلەكوم» اق تەلەفون كابەلدەرىن قيىپ, الىپ كەتىپ وتىرىپتى. پايدانىڭ وڭاي جولىن ولجا قىلعان, سەزىكتى تۇلعالار قىلمىستارىن كاسىپكە اينالدىرعان سىڭايلى, ءبىر اۋىلدىڭ وزىندە بىرنەشە رەت ارام ويىن جۇزەگە اسىرعان. بۇگىنگى كۇنى ۇستالعان تۇلعالار ءوز كىنالارىن تولىق مويىندادى.
قازىرگى تاڭدا كۇدىكتىلەر باسقا دا قىلمىستارعا قاتىسى بار-جوقتىعى تەكسەرىلىپ, كەلتىرىلگەن شىعىن كولەمى انىقتالۋدا.
اتالمىش دەرەك بويىنشا قر قك 187–بابىنىڭ 1-ءبولىمى, 188-بابىنىڭ 2-ءبولىمى 2,3-تارماقتارىمەن قىلمىستىق ءىس قوزعالىپ, سوتقا دەيىنگى تەرگەۋ جۇمىستارى جۇرگىزىلۋدە.
ورالحان ءداۋىت.
دەرەك, سۋرەت: egemen.kz