قىزىلوردا. 15 اقپان. قىزىلوردا وبلىسى بويىنشا مەملەكەتتىك قىزمەت ىستەرى جونىندەگى دەپارتامەنت باسشىسى تاعايىندالدى. بۇل تۋرالى egemen.kz ءتىلشىسى حابارلادى.
بۇگىن وبلىس اكىم قىرىمبەك كوشەرباەۆ مەملەكەتتىك قىزمەت ىستەرى مينيسترلىگىنىڭ قىزىلوردا وبلىسى بويىنشا دەپارتامەنت باسشىسىن تانىستىردى. بۇل قىزمەتكە مەملەكەتتىك قىزمەت ىستەرى ءمينيسترىنىڭ بۇيرىعىمەن وبلىس اكىمىنىڭ كەلىسىمى ارقىلى جازيرا جىلقىشيەۆا تاعايىندالدى.
جازيرا جىلقىشيەۆا 1970 جىلى 30 تامىزدا قىزىلوردا وبلىسى جالاعاش اۋدانىندا تۋعان. 1987 جىلى قىزىلورداداعى قورقىت اتا اتىنداعى پەداگوگيكالىق ينستيتۋتتىڭ فيزيكا-ماتەماتيكا فاكۋلتەتىنىڭ فيزيكا جانە تاربيە ءىسى جونىندەگى ادىسكەرى بولىمىنە وقۋعا تۇسكەن.
مەملەكەتتىك قىزمەتتە ەڭبەك جولىن 2001 جىلدىڭ 10 ساۋىرىندە مەملەكەتتىك قىزمەت ىستەرى جونىندەگى اگەنتتىگىنىڭ قىزىلوردا وبلىسى بويىنشا باسقارماسىنا باس مامانى رەتىندە باستاعان. 2005 جىلدىڭ قاڭتار ايىنان تامىز ايىنا دەيىن وبلىستىق جولاۋشىلار كولىگى جانە اۆتوموبيل باسقارماسىنىڭ اكىمشىلىك ءبولىمىنىڭ باسشىسى قىزمەتىن اتقارعان. 2005 جىلى «بولاشاق» ۋنيۆەرسيتەتىن زاڭگەر ماماندىعى بويىنشا ءبىتىرىپ, ەكىنشى جوعارى ءبىلىم الدى. 2005 جىلدىڭ 1 تامىزىندا مەملەكەتتىك قىزمەت ىستەرى جونىندەگى اگەنتتىگى قىزىلوردا وبلىسى بويىنشا باسقارماسىنىڭ مەملەكەتتىك قىزمەتتى كادرلىق جانە قۇقىقتىق قامتاماسىز ەتۋ ءبولىمىنىڭ باسشىسى قىزمەتىنە تاعايىندالدى.
2007 جىلدىڭ 19 ساۋىرىنەن 2007 جىلدىڭ 7 قاراشاسىنا دەيىن قىزىلوردا وبلىستىق ىشكى ساياسات دەپارتامەنتى ديرەكتورىنىڭ ورىنباسارى بولدى.
2007 جىلدىڭ 7 قاراشاسىنان 2011 جىلدىڭ 8 ماۋسىمىنا دەيىن قىزىلوردا وبلىسى اكىمى اپپاراتىنىڭ كادر جۇمىسى ءبولىمىنىڭ مەڭگەرۋشىسى, 2011 جىلدىڭ 8 ماۋسىمىنان 2015 جىلدىڭ 8 قىركۇيەگىنە دەيىن قىزىلوردا وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قىزمەتىن اتقاردى.
2015 جىلى 8 قىركۇيەكتە قىزىلوردا وبلىسى اكىمىنىڭ وكىمىمەن وبلىستىق ىشكى ساياسات باسقارماسىنىڭ باسشىسى بولىپ تاعايىندالدى.
وبلىس اكىمى جازيرا جىلقىشيەۆانىڭ جاڭا قىزمەتىنە ساتتىلىك تىلەپ, «العىس حات» تاپسىردى.
ەرجان بايتىلەس.
دەرەك, سۋرەت: قىزىلوردا وبلىسىنىڭ اكىمدىگى.