استانا. 14 اقپان. بۇگىن تۇندە سەربيانىڭ استاناسى – بەلگرادتا ءوتىپ جاتقان فۋتزالدان ەۋروپا چەمپيوناتىندا قازاقستان قۇراماسى الاڭ يەلەرى – سەربتەردى 5:2 ەسەبىمەن ۇتىپ, قولا جۇلدەگەر اتاندى. بۇل تۋرالى Vesti.kz پورتالىنا سىلتەمە جاساعان egemen.kz حابارلادى.
باس جاتتىقتىرۋشى كاكاۋدىڭ شاكىرتتەرى وسىلايشا تۇڭعىش رەت قۇرلىق بىرىنشىلىگىنىڭ مەدالىنە قول جەتكىزدى.
ءۇشىنشى ورىننىڭ تاعدىرىن شەشكەلى تۇرعان بۇل ماتچقا ەكى جاق تا ساقاداي-ساي كەلدى. سەربتەر جەرگىلىكتى جانكۇيەرلەردىڭ زور قولداۋلارىنا سۇيەنسە, قازاقستاندىقتار ءوزىنىڭ تاريحىنداعى ەڭ العاشقى ءىرى حالىقارالىق جارىسىنان جۇلدەمەن ورالۋعا بار كۇشىن سالدى. بۇعان وسىنىڭ الدىندا ديسكۆاليفيكاتسياعا ۇشىراعان قاقپاشى يگيتانىڭ ساپقا قايتا ورالۋى دا يگى اسەر ەتتى.
ماتچتىڭ ءبىرىنشى تايمى ەكى جاقتىڭ دا اشىق فۋتبول كورسەتىپ, باتىل العا ۇمتىلۋلارى ارقىلى كورەرمەن قاۋىمدى قۋانىشقا بولەدى. بۇل تۇستا قارسىلاستار ءبىرىنىڭ شابۋىلىن ءبىرى ءىلىپ اكەتىپ, ىلگەرى شاپقىلاۋمەن بولدى. الايدا, ولاردىڭ قايسىلارىنىڭ باسىم ەكەنىن انىقتاۋ قيىن ەدى. ال قاقپا الدىنداعى ەڭ العاشقى قاۋىپتى ءساتتى سەربتەر تۋعىزدى. ولاردىڭ 34 جاستاعى ويىنشىسى ۆلاديمير لازيچ 9-مينۋتتا قاقپاشىمەن بەتپە-بەت شىعىپ, دوپتى يگيتانىڭ ۇستىنەن اسىرا تاستادى. دوپ سول بويى تورعا قاراي كەتىپ بارا جاتقاندا, ونى سوڭعى ماۋرىتتە لەو قايتارىپ ۇلگەردى. وسىنىڭ ارتىنشا قوناقتار دا جاقسى قارسى شابۋىل جاساي ءبىلدى. ولاردىڭ بۇرىشتامادان جىبەرگەن دوبىن ميحايل پەرشين قاقپاعا شىرەنە ۇردى. بىراق ول قاقپا باعانىنان قايتتى.
ويىن وسىلايشا ءبىرىنشى تايمنىڭ سوڭعى مينۋتىنا دەيىن ارپالىسپەن جالعاستى. ەكى جاقتىڭ دا گول سوعاتىن تالاي ساتتەرى بولدى, بىراق سونىڭ بارىندە دە گولكيپەرلەر بيىكتەن كورىنىپ جاتتى. اقىرىندا ءبىزدىڭ دۋگلاس قارسى جاق قاقپاسىنان ساڭىلاۋ تابا ءبىلدى – 1:0. ول مۇندا سەربتەر داربازاشىسى ميودراگ اكسەنتيەۆيچتىڭ قاتەلىگىن وتە جاقسى پايدالانىپ كەتتى.
ەكىنشى تايم ەندى قازاقستاندىقتاردىڭ شابۋىلىمەن باستالدى. ول جانە ءبىزدىڭ جىگىتتەردىڭ تەز ەسەپتى ۇلعايتا بىلۋلەرىنە جالعاستى. ءسويتىپ, 21-مينۋتتا سەرىك جامانقۇلوۆ وتە قاتتى سوققىمەن اكسەنتيەۆيچتىڭ سول جاق «ءبۇيىرىن» بۇلك ەتكىزدى. وسىمەن تۋرنيردەگى التىنشى گولىن سوققان فۋتبولشىمىز ەسەپتى 2:0-گە جەتكىزدى.
وسى گولدان كەيىن سەربتەر تايلى-تاياعى قالماي العا ۇمتىلدى. ال قازاقتار قورعانىستا قاتىپ قالماي, ءبىرىنشى مۇمكىندىك بولعان ساتتە جىلدام قارسى شابۋىل ۇيىمداستىرۋعا كۇش سالدى. ولار 29-مينۋتتا الەكساندر دوۆگان شابۋىل وتىندە بولعان ساتتە ەسەپتى ۇلعايتۋدىڭ ءبىر مۇمكىندىگىن جىبەرىپ الدى. ارادا ءبىر مينۋت وتكەندە, دۋگلاس سول وكىنىشتىڭ ورنىن تولتىرىپ بەردى - 3:0. بۇدان كەيىن بۇرىنعىدان بەتەر اشىنىپ كەتكەن الاڭ يەلەرى قورعانىستى مۇلدەم ۇمىتقانداي بولدى. ولار داربازاشىنى التىنشى ويىنشىعا اۋىستىرىپ, جاپپاي العا ۇمتىلىپ جاتقان پايتتە مەيماندار تاعى دا وسىدان وڭتايلى ناتيجە شىعارۋدىڭ جولدارىن قاراستىرىپ جاتتى. مۇنى جانە كوپ كۇتۋگە دە تۋرا كەلگەن جوق. ءبىزدىڭ جىگىتتەر وسىلايشا 32-مينۋتتا ەسەپتى 4:0-گە ءبىر-اق اپاردى. ونى قارسى جاق قاقپاسىنىڭ بوس تۇرعانىن پايدالانعان يگيتا الىستان ۇرىپ ءتۇسىردى.
قازاقستان قۇراماسى كەزدەسۋدىڭ 36-مينۋتىندا تابلوداعى ەسەپتى 5:0 ەتتى. بۇل جولى دا دۋگلاس مەرگەندىگىمەن كوزگە ءتۇسىپ, ويىنداعى حەت-تريگىن جاسادى. ول قاقپاشىمەن بىرگە-ءبىر شىققان ءساتىن ءمۇلت جىبەرگەن جوق.
وسىدان كەيىن قازاقستاندىقتار ءبىرشاما بوساڭسىپ وينادى. ولار قالعان 4 مينۋتتا سەربتەردىڭ اشۋ-ىزالارىن ءبىرشاما قايتارىپ الۋلارىنا مۇمكىندىك بەرىپ قويدى. سونىڭ ناتيجەسىندە الاڭ يەلەرى ەكى دوپتىڭ قارىمتاسىن قايتارىپ ۇلگەردى. الدىمەن 38-مينۋتتا ستەفان راكيچ گول سالدى, سوسىن فينالدىق ىسقىرىق ەستىلۋگە ەكى سەكۋند قالعاندا, سلوبودان رايچەۆيچ مەرگەندىگىمەن تانىلدى.
وسىلايشا قازاقستان قۇراماسى تۇڭعىش رەت ەۋروپا بىرىنشىلىگىنىڭ قولا جۇلدەسىنە قول جەتكىزدى.
ال چەمپيوناتتىڭ التىن جۇلدەسى وسىنىڭ الدىندا, جارتىلاي فينالدا قازاقستان كومانداسىن سۇرىندىرگەن يسپانيا قۇراماسىنىڭ قانجىعاسىنا بايلاندى. يسپاندار فينالدا رەسەيلىكتەردى 7:3 ەسەبىمەن ويسىراتا ۇتتى.
دامير قوجامقۇل.
دەرەك, فوتو: vesti.kz.