وڭىردەگى اقسۋ قالاسىندا ورنالاسقان ەۋرازيالىق توپ (ERG) قۇرامىنداعى «ەۋرازيالىق ەنەرگەتيكالىق كورپوراتسيا» اق-تا قۋاتى 220كۆ بولاتىن تاراتۋ قۇرىلعىسىنا جاڭعىرتۋ جۇمىستارى اياقتالدى. بۇل قۇرىلعى الىپ ستانسادا سوناۋ 1969 جىلدان بەرى جۇمىس جاساپ كەلەدى. ال جاڭارتۋ, جاڭعىرتۋ جۇمىستارى 2009 جىلى باستالدى. جوبانىڭ قۇنى 2 ملرد. تەڭگەنى قۇرايدى.
جالپى, اتق-220 كۆ اتالاتىن بۇل قۇرىلعى ستانسا ماماندارىنىڭ ايتۋىنشا, ەكى جۇمىس قوندىرعىسىنان, ءبىر اينالمالى دوڭگەلەك جۇيەسىنەن, 15 جوعارى ۆولتتى ۇياشىقتاردان تۇرادى. ۇياشىقتار ستانسا وندىرگەن ەلەكتر قۋاتىن قابىلداپ الادى دا اتق-110 ارقىلى 500 كۆ قۋات كۇشىن تاراتىپ, ەۋرازيالىق توپ قۇرامىنداعى«كازحروم» تۇك» اق فيليالى – اقسۋ فەرروقورىتپا زاۋىتى, قازاقستان ەلەكتروليز زاۋىتى جانە «KEGOس» اق سياقتى تۇتىنۋشىلارعا جىبەرەدى.
«ەۋرازيالىق ەنەرگەتيكالىق كورپوراتسيا» اق ەلەكتر ەنەرگياسىن جانە كومىر وندىرۋشىلەردىڭ ءبىرى. ەلىمىزدە وندىرىلەتىن ەلەكتر ەنەرگياسىنىڭ 17 پايىزىن, كومىردىڭ 20 پايىزىن وندىرەدى. الىپ كاسىپورىن ەكى قۇرىلىمدىق بولىمشەنى بىرىكتىرەدى: «شىعىس» كومىر كەنىشى جانە اقسۋ ەلەكتر ستانساسى. كورپوراتسيادا 6 222 ادام ەڭبەك ەتۋدە.
ال الىپ قۇرىلعىنى قايتا جاساقتاۋ كەزىندە ەسكىرىپ, توزعان بارلىق ۇياشىقتاردىڭ جابدىقتارى الماستىرىلىپتى. ولاردىڭ ىشىندە ەلەكتر-گازدىق اجىراتقىشتار, قاشىقتىقتان باسقارۋ مۇمكىندىگى بار ايىرعىشتار, توك ترانسفورماتورلارى, جوعارى كەرنەۋلى ترانسفورماتورلار دا بار, دەيدى ەنەرگەتيكتەر. سونىمەن قاتار, ورالىم جۇيەسىندەگى سىمدار جانە وقشاۋلاۋ قابى, جاقىنداتۋ كانالدارى ىشىندەگى يىلگىش بايلانىستارى اۋىستىرىلعان, ميكروپروتسەسسورلىق تەرمينالدارداعى پانەلدەر, ورتەنبەيتىن سىم سىزىقتارى ورناتىلعان.
– جوعارى توك كەرنەۋلى اتق-220 كۆ قۋاتتى ەلەكترلىك الىپ قۇرىلعىنىڭ قايتا قۇرۋ جۇمىستارى كەزىندە قيىندىقتار دا تۋعىزدى. سول سەبەپتەن, ءبىز «كەGوC» اق كەزەكشىلىك باقىلاۋ قىزمەتتەرىمەن بىرلەسىپ, جابدىقتاردى قاۋىپتەن اجىراتۋ كەستەسىن جاسادىق. مەردىگەر جانە تاپسىرىس بەرۋشى ينجەنەرلىك-تەحنيكالىق توپتىڭ جوعارى كاسىبي دايارلىعىن قاجەت ەتتى, – دەيدى ستانسا باس مامانى ۆلاديمير فەنەۆ.
بۇل الىپ قۇرىلعىنى قايتا قالپىنا كەلتىرۋ جۇمىستارىنا «ەەك» اق-تىڭ كوپ جىلعى سەرىكتەستەرى «ەكىباستۇزجىلۋەنەرگومونتاج» جشس كورپوراتسياسى قاتىستى, بۇدان بۇرىن «ەتەم» جشس ماماندارى №2, №6 ەنەرگوبلوكتاردى جاڭارتۋعا بىرگە ۇلەس قوسقان بولاتىن. ەندىگى كەزەكتە ەتەم ۇجىمى ەس №3 كۇل ساقتايتىن قويماسىنىڭ سالۋىن ءارى №5 ەنەرگوبلوكتىڭ جانە «شىعىس» كەنىشىندەگى №2, №4 كومىر قويمالارىنىڭ قايتا قۇرۋىن جۇرگىزەدى. سوندىقتان, بۇل جوبانى وتاندىق كاسىپورىندار بىرلەسە جۇزەگە اسىردى دەۋگە بولادى. ال, ەلەكتر ەنەرگياسىن تاراتۋ قۇرىلعىسىن قايتا جاڭعىرتۋ بۇل ستانسانىڭ الداعى جىلدارى تۇتىنۋشىلارىن ەلەكتر قۋاتىمەن كەدەرگىسىز قامتاماسىز ەتۋىنە ۇلكەن مۇمكىندىك بەرەدى.
فاريدا بىقاي,
«ەگەمەن قازاقستان».
پاۆلودار وبلىسى,
اقسۋ قالاسى.