اتىراۋ. 19 قاڭتار. اتىراۋ وبلىسىنىڭ قۇرمانعازى اۋدانىندا تۇراتىن 2 وقۋشى «توتەنشە جاعدايداعى ەرلىگى ءۇشىن» توسبەلگىسىنە يە بولدى. توتەنشە جاعدايلار كوميتەتىنىڭ ارناۋلى توسبەلگىسىن وقۋشىلارعا وبلىس اكىمى باقتىقوجا ىزمۇحامبەتوۆ وبلىستىق ءماسليحاتتىڭ سەسسياسىندا تاپسىردى. بۇل تۋرالى egemen.kz ءتىلشىسى حابارلادى.
وتكەن جىلدىڭ جازىندا قۇرمانعازى اۋدانىنىڭ ەڭبەكشى اۋىلدىق وكرۋگىندە تۇراتىن بەيبارىس قايروللا ۇلى مەن ەرماحان ناسيحاننىڭ وزەنگە باتىپ بارا جاتقان ايەلدى قۇتقارعانىن حابارلاعان ەدىك. سول كەزدە ءبىرى 13-تەگى, ەكىنشىسى 12 جاستاعى قوس ورەن ءوز ومىرلەرىن قاتەرگە تىگۋدەن جاسقانباي, جانۇشىرا كومەك سۇراعان ايەلدى اجالدان امان الىپ قالۋعا ۇمتىلعان. ەندى مىنە, باتىل بالعىندار قورعانسىز جاندى سۋدان قۇتقارۋداعى ەرلىككە ءتان ءىسى ءۇشىن توتەنشە جاعدايلار كوميتەتىنىڭ «توتەنشە جاعدايداعى ەرلىگى ءۇشىن» توسبەلگىسىمەن ماراپاتتالدى.
جولداسبەك شوپەعۇل.
دەرەك: egemen.kz.
سۋرەت: راحىم قويلىباەۆ.