بۇرناعى كۇنى دۇنيەجۇزىلىك قار كۇنىنە وراي جۇزدەگەن قالا تۇرعىنى ەلوردالىق پاركتە شاڭعى-روللەرلىك تراسساعا جينالدى. بۇقارالىق شاڭعى جارىسىنان «World snow day» قار فەستيۆالى استانادا ءتورتىنشى مارتە وتكىزىلىپ وتىرعانىن, سونداي-اق, وسى ۋاقىت ىشىندە شارا قىسقى ماۋسىمداعى قىزىقتى فەستيۆالدەردىڭ بىرىنە اينالىپ ۇلگەرگەنىن دە ايتا كەتكەن ابزال.
شاڭعى جارىسىنان وتكەن شاراعا قاتىسۋعا ەرەسەكتەر دە, بالالار دا كەلدى. وقۋشىلار 18 جاسقا دەيىنگىلەر توبىندا باق سىناسسا, ال, جاس سپورتشىلار قاشىقتىقتى بارىنشا تەز باعىندىرۋعا تىرىسىپ, قاتارلاستارىنان قالماۋ ءۇشىن قارقىندارىن كۇشەيتە ءتۇستى. ءتىپتى, فەستيۆالگە 4-6 جاستاعى بۇلدىرشىندەر دە اتسالىسقانىن ەستەرىڭىزگە سالا كەتسەك دەيمىز.
– جىل سايىن وتكىزىلەتىن بۇل مەرەكەلىك شاڭعى جارىسى جاقسى داستۇرگە اينالدى. ەرەسەكتەردى بىلاي قويعاندا, اسىرەسە, جاس بالالار اسىعا كۇتەتىنى اڭعارىلادى. بيىلعى جارىستىڭ اۋقىمى كەڭەيىپ, قوستاناي, قاراعاندى قالالارىنىڭ شاڭعىشىلارى قاتىسۋعا نيەت ءبىلدىردى. قىس بىتكەنشە اپتا سايىن وسى ماڭدا شاڭعى جارىسى ءوتىپ تۇرادى. سالاماتتى ءومىر سالتىن بەرىك ۇستاناتىن ەلوردالىقتاردى قالالىق دەنە شىنىقتىرۋ جانە سپورت باسقارماسىنىڭ باسشىسى بەرىك مارجىقپاەۆتىڭ ءوزى شاڭعى تەبۋگە باستاپ شىعىپ ءجۇر. يگى ءۇردىستىڭ قانات جايۋى دوستىعى بەكەم جۇرتتىڭ اۋىزبىرشىلىگىن ارتتىرا تۇسەتىنى انىق, – دەيدى سپورتتىق-بۇقارالىق شارالار ءوتكىزۋ ديرەكتسياسىنىڭ باسشىسى ازامات حامزين.
استانا قالاسىنىڭ اكىمدىگى, «سامۇرىق-قازىنا» ءال-اۋقات قورى, قالالىق دەنە شىنىقتىرۋ جانە سپورت باسقارماسى, «FIS» حالىقارالىق شاڭعى سپورتى فەدەراتسياسى, №2 بالالار جانە جاسوسپىرىمدەر سپورت مەكتەبى مەن سپورتتىق-بۇقارالىق شارالاردى وتكىزۋ ديرەكتسياسى مۇرىندىق بولعان جارىسقا 500-دەي ادام قاتىسىپ, 36 جاس شاڭعىشى قاتارلاستارىنان وزىق بولىپ, جەڭىس تۇعىرىنا كوتەرىلدى.
راۋان قايدار,
«ەگەمەن قازاقستان».
سۋرەتتەردى تۇسىرگەن
ەرلان وماروۆ.