بۇرناعى كۇنى «بارىس» كومانداسى قۇرلىقتىق حوككەي ليگاسى شەڭبەرىندە ءوز ايدىنىندا نيجني نوۆگورودتىڭ «تورپەدوسىن» قابىلدادى. تارتىستى وتكەن كەزدەسۋ ناتيجەسىندە استانالىقتار 5:2 ەسەبىمەن باسىم ءتۇسىپ, ماۋسىمداعى 25-جەڭىستەرىنە قول جەتكىزدى.
ويىننىڭ ەسەبى ءبىرىنشى كەزەڭنىڭ سوڭعى مينۋتىندا اشىلدى. نايدجەل دوۋس پەن برەندون بوچەنسكي ۇيىمداستىرعان شابۋىلعا ناتيجەلى نۇكتە قويعان داستين بويد ماتچتاعى العاشقى گولدىڭ اۆتورى اتاندى. بۇل كەزدە «بارىستىڭ» ءبىر ويىنشىسى ارتىق بولعانىن اتاپ وتكەن ءجون.
ەكىنشى كەزەڭدى اندرەي نازاروۆتىڭ شاكىرتتەرى وتە بەلسەندى باستادى. ناتيجەسىندە 25-مينۋتتا ەلوردالىقتار ەكى بىردەي شايبا سوعىپ, ەسەپتى 3:0-گە جەتكىزدى. اتاپ ايتقاندا, الدىمەن مايك لاندين كەزەكتى رەت ويىنشى باسىمدىعىن ءجۇزەگە اسىرسا, ارادا 45 سەكۋند وتكەندە, كونستانتين رومانوۆ مەرگەندىگىمەن كوزگە ءتۇستى. الايدا, قوناقتار ەكىنشى ۇزىلىسكە دەيىن ەسەپتى ءبىر شايبا ايىرماسىنا قىسقارتۋعا مۇمكىندىك تاپتى. 31-مينۋتتا ارتەم الياەۆ ويىنشى باسىمدىعىن پايدالانىپ, كومانداسىنىڭ العاشقى گولىن سوقتى. ال كەزەڭنىڭ سوڭعى مينۋتىندا ماكسيم وسيپوۆ «بارىس» قاقپاشىسى يان لاتسودان ايلاسىن اسىردى.
سوڭعى كەزەڭ تاعى دا ءبىزدىڭ كوماندانىڭ گولىمەن باستالدى. ءۇشىنشى رەت ويىنشى باسىمدىعىن ءساتتى پايدالانعان «بارىس» حوككەيشىلەرى كونستانتين پۋشكارەۆتىڭ كومەگىمەن قارسىلاستار قاقپاسىنا ءتورتىنشى شايبانى ەنگىزدى. تارتىستى كەزدەسۋدىڭ نۇكتەسى 57-مينۋتتا قويىلدى. بوس قاقپانى ءدال كوزدەگەن داستين بويد ءدۋبلدىڭ اۆتورى اتانىپ قانا قويماي, كومانداسىن ايقىن جەڭىسكە جەتكىزدى.
بۇگىندە 51 ويىننان 75 ۇپاي جيعان «بارىس» شىعىس كونفەرەنتسياسىندا 7-ورىندا كەلەدى. كوماندا كەلەسى كەزدەسۋىن 19 قاڭتاردا استانادا مينسكىنىڭ «ديناموسىمەن» وتكىزەدى.
ەلامان قوڭىر,
«ەگەمەن قازاقستان».