يساتاي اۋدانىنداعى ەكى كەن ورنى ارالىعىندا گاز قۇبىرى ءۇشىن قازىلعان جىراعا جەكە يەلىكتەگى مالداردىڭ قۇلاپ, قىرىلعانىنا وراي اۋداندىق اكىمدىك رەسمي مالىمدەمە تاراتتى. وندا تومەندە انىقتالعان دەرەكتەر جاريا ەتىلدى.
«مۇناي كومپانياسىنىڭ تاپسىرىسى بويىنشا ىلەسپە گاز قۇبىرىن سالۋ جۇمىستارى جۇرگىزىلگەن. وسى جۇمىستار ءۇشىن ۇزىندىعى 13 شاقىرىم شۇڭقىر قازىلعان. بۇل جۇمىستى «مونوليت ينۆەست كومپاني» جشس ورىنداعان. جەلتوقسان ايىنىڭ سوڭى مەن قاڭتار ايىنىڭ باستاپقى كۇندەرىندەگى جاۋعان قالىڭ قار مەن بوراسىن شۇقىرلاردى تولتىرىپ بىتەپ تاستاعان. وسى سەبەپتى دالادا جۇرگەن مالدار قاردان بايقالمايتىن شۇقىرلارعا ءتۇسىپ ولگەن. اۋدان اكىمدىگى بۇل وقيعاعا بايلانىستى شۇعىل مامانداردان, قۇقىق قورعاۋ ورگاندارى وكىلدەرىنەن ارنايى توپ قۇرىپ, ماسەلەنى جان-جاقتى قاراۋ جانە ولگەن مالداردىڭ يەلەرىن انىقتاۋ جۇمىستارىن جۇرگىزدى. اكت جاسالدى. ناتيجەسىندە 39 جىلقى, 1 تۇيە مالىنىڭ ولەكسەلەرى تابىلدى. مالدىڭ ءتۇرى, ءتۇسى, تاڭباسىنا قاراي يەلەرى انىقتالدى. 13 قاڭتاردا مەردىگەر مەكەمە – «مونوليت ينۆەست كومپاني» جشس-ءنىڭ باس ديرەكتورى ءبيبىنۇر يۋسۋپوۆامەن اۋدان اكىمدىگىندە كەزدەسۋ وتكىزىلىپ, قالىپتاسقان جاعدايعا بايلانىستى الىناتىن شارالار كەلىسىلدى. كومپانيا مال يەلەرىنە (17 ادام) 5,8 ميلليون تەڭگە وتەماقى تولەۋدى موينىنا الدى», دەلىنگەن يساتاي اۋداندىق اكىمدىگىنىڭ رەسمي ءمالىمدەمەسىندە.
وسىعان بايلانىستى يساتاي اۋدانىنىڭ اكىمى تۇراربەك سۇلتانبەكوۆپەن بىرگە تاپسىرىس بەرۋشى جاق پەن مەردىگەر مەكەمە, قۇقىق قورعاۋ ورگاندارى باسشىلارى وقيعا ورنىنا بارىپ, تۇرعىندارعا ماسەلەنى ءتۇسىندىردى. ماڭداي تەرىمەن تاپقان مالىنان ايىرىلعان تۇرعىندارعا وتەماقىنىڭ تولەنۋى اۋدان اكىمدىگىنىڭ باقىلاۋىنا الىنىپ وتىر.
جولداسبەك شوپەعۇل,
«ەگەمەن قازاقستان».
اتىراۋ وبلىسى.