21 قاڭتاردا بولاتىن سەنات وتىرىسىندا ءبىر زاڭ جوباسىن قاراۋ جوسپارلاندى, دەپ حابارلادى وسى پالاتانىڭ ءباسپاسوز قىزمەتى.
سەنات توراعاسى قاسىم-جومارت توقاەۆ جانە بيۋرو ءمۇشەلەرى قابىلداعان قاۋلىعا سايكەس, دەپۋتاتتار نازارىنا «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىمدى (ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ جونىندەگى جوبا) راتيفيكاتسيالاۋ تۋرالى» زاڭ جوباسى شىعارىلادى.
سونداي-اق, سەناتورلاردى حالىقارالىق پارلامەنتتىك ۇيىمدارعا جانە سەناتتىڭ شەت مەملەكەتتەردىڭ پارلامەنتتەرىمەن ىنتىماقتاستىق جونىندەگى توپتارىنا جىبەرۋ تۋرالى ماسەلەنى تالقىلاۋ جوسپارلانىپ وتىر.
بيۋرودا جۇمىسقا قابىلداناتىن ءۇش زاڭ جوباسى بويىنشا باس كوميتەتتەر بەلگىلەندى.
قارجى جانە بيۋدجەت كوميتەتىنە «قازاقستان رەسپۋبليكاسى مەن چەح رەسپۋبليكاسى اراسىنداعى تابىس پەن كاپيتالعا سالىناتىن سالىققا قاتىستى قوسارلانعان سالىق سالۋدى بولدىرماۋ جانە سالىق تولەۋدەن جالتارۋعا جول بەرمەۋ تۋرالى كونۆەنتسياعا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى بەلگىلەندى.
«قازاقستان رەسپۋبليكاسى مەن ءۇندىستان رەسپۋبليكاسى اراسىنداعى سوتتالعان ادامداردى بەرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنە بەرىلدى.
الەۋمەتتىك-مادەني دامۋ ءجانە عىلىم كوميتەتى «قازاقستان رەسپۋبليكاسى مەن حالىقارالىق قايتا قۇرۋ جانە دامۋ بانكى (ەنەرگيا تيىمدىلىگىن ارتتىرۋ ءجانە جاستار كورپۋسىن دامىتۋ باعدارلاماسى ءۇشىن ءبىر دونوردىڭ تراست قورى اكىمشىسى رەتىندە ارەكەت ەتۋشى) اراسىنداعى گرانت تۋرالى كەلىسىمدى (جاستار كورپۋسىن دامىتۋ جوباسى) راتيفيكاتسيالاۋ تۋرالى» زاڭ جوباسى بويىنشا باس كوميتەت بولىپ بەلگىلەندى.
بۇل زاڭ جوبالارى بويىنشا ءتيىستى قورىتىندىلار ازىرلەۋ مەرزىمى 2016 جىلعى 29 اقپانعا دەيىن دەپ بەلگىلەندى.