ەلباسى نۇرسۇلتان نازارباەۆ كونستيتۋتسيالىق كەڭەس توراعاسى يگور روگوۆپەن كونسۋلتاتسيا وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا كەزەكتەن تىس پارلامەنت سايلاۋىن وتكىزۋ ماسەلەسى تالقىلاندى.
مەملەكەت باسشىسى ءماجىلىس دەپۋتاتتارىنىڭ ۇندەۋىن العانىن, وندا اتالعان باستاماعا رەفورمالاردى جانە مەملەكەت بەلگىلەگەن داعدارىسقا قارسى شارالاردى ءتيىمدى جۇزەگە اسىرۋ قاجەتتىگى نەگىز بولعانىن اتاپ ءوتتى.
سونىمەن قاتار, قازاقستان پرەزيدەنتى پارلامەنتتىڭ قوس پالاتاسىنىڭ توراعالارىمەن جانە پرەمەر-مينيسترمەن كونسۋلتاتسيا وتكىزگەنىن ايتتى.
ي.روگوۆ كونستيتۋتسيانىڭ 63-بابىنىڭ 1-تارماعىنا سايكەس, پارلامەنتتى نەمەسە پارلامەنت ءماجىلىسىن قازاقستان پرەزيدەنتى پارلامەنت پالاتالارىنىڭ ءتوراعالارىمەن جانە پرەمەر-مينيسترمەن كونسۋلتاتسيادان كەيىن تاراتا الاتىنىن ايتتى. سونىمەن بىرگە, كونستيتۋتسيالىق كەڭەس ءتوراعاسى كەزەكتەن تىس سايلاۋ پارلامەنت نەمەسە پارلامەنت ءماجىلىسى وكىلەتتىگىن مەرزىمىنەن بۇرىن دوعارعان كۇننەن كەيىن ەكى اي ءىشىندە وتكىزىلەتىنىنە نازار اۋداردى.
ي.روگوۆ ماجىلىسكە كەزەكتەن تىس سايلاۋدى الداعى بارلىق دەڭگەيدەگى ءماسليحاتتار سايلاۋىمەن ءبىر مەزگىلدە وتكىزۋ كونستيتۋتسيا نورمالارىنا تولىق ساي كەلەتىنىن اتاپ ءوتتى.
سۋرەتتەردى تۇسىرگەندەر
س.بوندارەنكو, ب.وتارباەۆ.