استانا. 26 اقپان. كەشە تۇندە چەمپيوندار ليگاسىنىڭ 1/8 فينالدىق كەزدەسۋلەرىنىڭ ءبىرىنشى ويىندارى تولىق اياقتالدى. بۇل تۋرالى Football.ua حابارلادى.
انگليانىڭ لوندونىندا «ارسەنال» فرانتسيانىڭ «موناكوسىن», گەرمانيانىڭ لەۆەركۋزەنىندە «بايەر» يسپاننىڭ «اتلەتيكوسىن» قابىلدادى. بۇلاردىڭ بىرىنشىسىندە اعىلشىندار 1:3 بولىپ جەڭىلسە, ەكىنشىسىندە نەمىستەر 1:0 ەسەبىمەن جەڭىسكە جەتتى.
كۇتپەگەن ناتيجە اعىلشىن استاناسىندا تىركەلدى. ماتچتىڭ باسىندا الاڭ يەلەرى قارسىلاستارىنا دەس بەرە قويمايتىنداي بولىپ كورىنگەن. ارسەن ۆەنگەردىڭ جىگىتتەرى ءانى-مىنە دەگەنشە ەسەپ اشىپ كەتەتىندەي دە بولىپ تۇردى. ولار العاشقى 15 مينۋت بويىنا قارسى جاقتىڭ قاقپا بەتىنە قاراي دوپتى دۇڭكىلدەتىپ ۇرۋمەن بولدى. سودان كەيىن بۇل جاقتىڭ تەتىگىنەن ءبىر ءجىپ ءۇزىلىپ كەتكەندەي ىسەر ەتتى. ەندى «موناكو» شابۋىلعا شىعۋعا كوشتى. بىراق قاۋىپ تونەتىندەي ەشتەڭە بولا قويعان جوق. وسىلايشا ءبىرىنشى تايمنىڭ تۇگەسىلەر شاعى جاقىنداپ كەلە جاتتى. كەنەت وڭ قاپتالدان قاۋىرت جاسالعان شابۋىلدان سوڭ ەكى قادامدى جۇرىستەن كەيىن قوناقتار ەسەپ اشتى دا كەتتى. 38-مينۋتتا قاقپاشى الاڭىنا كىرەبەرىستەگى ورتادان كوندوگبيانىڭ ۇرعان دوبى الدىنداعى قورعاۋشىعا ءتيىپ, باعىتىن ءسال وزگەرتتى دە, تورعا بارىپ گۇمپ ەتتى. گول!
الاڭ يەلەر ەكىنشى تايمنىڭ باسىندا سوسىن جاپپاي العا ۇمتىلۋعا ءماجبۇر بولدى. ءبىر جيرۋدىڭ ءوزى بىرنەشە رەت ءدال سوققى جاساي الماي, سان سوقتى. وسىلاي قورعانىس شەبىن ۇمىتىپ كەتكەن اعىلشىندار تاعى دا سودان وپىق جەدى. بۇل جولى قۇيىنداي قۇيعىتقان قارسى شابۋىلدىڭ شىرعاسىندا مارتيال مەن بەرباتوۆ قارسى قاقپا الدىنا ادەمى كەلدى. بۇلاردىڭ ءبىرىنشىسى ەىكنشىسىن شەشۋشى سوققىعا جىبەردى, ال بولگار فورۆاردى ونى ءمۇلت جىبەرگەن جوق. ءسويتىپ, 53-مينۋتتا ەسەپ 2:0-گە جەتتى.
كوماندالار وسى ەسەپپەن ويىننىڭ سوڭىنا دەيىن باردى. نەگىزگى ۋاقىتقا قوسىلعان ءبىرىنشى مينۋتتا اقىرى اعىلشىندار چەمبەرلەننىڭ گولى ارقىلى ەسەپتى قىسقارتتى. بىراق ارادا 3 مينۋت وتكەندە قوناقتار تاعى دا ەسەپ ايىرىمىن ەكى دوپقا جەتكىزدى (كارراسكو).
ال كەلەسى كەزدەسۋدە چالحانوگلۋدىڭ 57-مينۋتتا سوققان جالعىز دوبى نەمىستەرگە جەڭىس اپەردى.
دامير قوجامقۇل.
دەرەك, سۋرەت: Football.ua.