ىشكى ىستەر ءمينيسترى ەرجان سادەنوۆتىڭ تاپسىرماسىمەن الماتى قالاسىندا بولعان رەزونانستىق جول-كولىك وقيعاسى العاشقى ساتتەن باستاپ ەرەكشە باقىلاۋعا الىندى. سونىمەن قاتار قازىرگى ۋاقىتتا قوعامدا ايتىلىپ جاتقان بارلىق ۋاجدەر تەكسەرىلىپ جاتىر, دەپ حابارلايدى Egemen.kz.
ءىىم رەسمي وكىلى شىڭعىس الەكەشەۆتىڭ ايتۋىنشا, اتالعان اپات بويىنشا بۇعان دەيىن قىلمىستىق ءىس قوزعالعان بولاتىن. ZEEKR اۆتوكولىگىنىڭ جۇرگىزۋشىسىنە سوتتىڭ سانكتسياسىمەن قاماققا الۋ شاراسى قابىلداندى. اپات كەزىندە ول جەڭىل دارەجەدەگى الكوگولدىك ماساڭ كۇيدە بولعان.
سونداي-اق ءمينيستردىڭ تاپسىرماسى بويىنشا قىزمەتتىك تەكسەرىس باستالدى. ونىڭ وبەكتيۆتىلىگى مەن تولىقتىعىن قامتاماسىز ەتۋ ءۇشىن الماتى قالاسىنا وزىندىك قاۋىپسىزدىك دەپارتامەنتىنىڭ, اكىمشىلىك پوليتسيا كوميتەتىنىڭ جانە جەكە قۇراممەن جۇمىس دەپارتامەنتىنىڭ باسشىلارى تاجىريبەلى قىزمەتكەرلەرمەن بىرگە جىبەرىلدى.
ال مەملەكەتتىك نومىرلىك بەلگىلەردىڭ زاڭسىز بەرىلۋى مۇمكىن دەگەن ۋاجدەر بويىنشا وزىندىك قاۋىپسىزدىك دەپارتامەنتىمەن قىلمىستىق ءىس قوزعالدى.
«پوليتسيا دەپارتامەنتى باسشىلارىنىڭ ءبىرىنىڭ جۇرگىزۋشىسىنە قاتىستى ارەكەتسىزدىك فاكتىسى بويىنشا دا قىلمىستىق ءىس قوزعالدى. ول ۋاقىتشا ۇستاۋ يزولياتورىنا قامالدى. وسى ايتىلعان قىزمەتتىك تەكسەرىس جانە قىلمىستىق ىستەر اياسىندا بارلىق ءمان-جايلار, ونىڭ ىشىندە مەدياكەڭىستىكتە تارالىپ جاتقان اقپارات جان-جاقتى تەكسەرىلەدى. انىقتالعان كەمشىلىكتەرگە بايلانىستى كادرلىق شەشىمدەر قابىلداندى», دەدى شىڭعىس الەكەشەۆ.
ءمينيستردىڭ بۇيرىعىمەن الماتى قالاسى پوليتسيا دەپارتامەنتى باستىعىنىڭ سىرتقى قىزمەتتەر مەن جول قاۋىپسىزدىگىن قاداعالايتىن ورىنباسارى, سونداي-اق اكىمشىلىك پوليتسيا جانە قوعامدىق قاۋىپسىزدىك باسقارمالارىنىڭ باسشىلارى قىزمەتتەرىنەن بوساتىلدى.
زاڭ بۇزۋشىلىقتار راستالعان جاعدايدا اپات قاتىسۋشىلارى دا, لاۋازىمدى تۇلعالار دا جاۋاپقا تارتىلادى.
«ازاماتتارعا, الەۋمەتتىك جەلى قولدانۋشىلارىنا جانە بۇقارالىق اقپارات قۇرالدارى وكىلدەرىنە ۇندەۋ جاسايمىز: تەكسەرىلمەگەن جانە جالعان اقپاراتتى تاراتۋدان, سونداي-اق اسىعىس قورىتىندى جاساۋدان باس تارتۋعا شاقىرامىز. جالعان اقپارات تاراتقانى ءۇشىن اكىمشىلىك جانە قىلمىستىق جاۋاپكەرشىلىك كوزدەلگەن. زاڭ مەن جول قوزعالىسى ەرەجەلەرىن ورەسكەل بۇزۋ دەرەكتەرى بۇعان دەيىن دە قاتاڭ تۇردە توقتاتىلىپ كەلدى, الداعى ۋاقىتتا دا توقتاتىلاتىن بولادى», دەدى ول.
الماتىدا جول اپاتىنان 3 ادام قازا تاپتى: قىلمىستىق ءىس قوزعالدى