ۇلتتىق ورتالىق مۋزەيدە «احمەت جۇبانوۆ: ءداۋىر ءۇنى» دەپ اتالعان كورمە اشىلدى. تاعىلىمدى ءىس-شارا كورنەكتى كومپوزيتوردىڭ 120 جىلدىعىنا وراي ۇيىمداستىرىلىپ وتىر.
ءومىرىن حالىق مۋزىكاسىمەن ەگىز ورگەن داڭقتى ديريجەردىڭ شىعارماشىلىقتاعى ەڭ ءبىر جەمىستى جىلدارى الماتىدا ءوتتى. مۋزىكا زەرتتەۋشىسى 1967–1968 جىلدارى عۇمىرىنىڭ سوڭعى كەزەڭدەرىندە تۇرعان پاتەر بۇگىندە شاعىن مۋزەيگە اينالعان. كورمەدە ۇسىنىلعان تۇپنۇسقا ەكسپوناتتار ءدال وسى احمەت جانە عازيزا جۇبانوۆتار مەموريالدى مۋزەي-ءۇيى قورىنان اكەلىنگەن.
دالىرەك ايتقاندا, كورمەدە كورنەكتى تۇلعانىڭ سيرەك فوتوسۋرەتتەرى, ارحيۆتىك قۇجاتتار, قولجازبالار, عىلىمي ەڭبەكتەر مەن جەكە زاتتارىنان تۇراتىن 120-عا جۋىق جادىگەر ۇسىنىلدى. ولاردىڭ قاتارىندا 1950 جىلى شىققان نەمىس باسپا ماشىڭكەسى بار. بۇل ماشىڭكەگە قازاق ارىپتەرى ەنگىزىلگەنىن كورىپ, قايراتكەردىڭ سول كەزەڭنىڭ وزىندە-اق ۇلتقا قىزمەت ەتۋدىڭ وزىق ۇلگىسىن كورسەتكەنىن اڭعاراسىز. سونىمەن قاتار قۇرمانعازى اتىنداعى قازاق ۇلتتىق كونسەرۆاتورياسىندا قىزمەت اتقارعان كەزدە كيگەن ديريجەرلىك فراگى, 1934 جىلى ەمانۋەل جانە بوريس رومانەنكولار جاساعان دومبىراسى, نوتالىق ەڭبەكتەرى كورمە ماڭىزىن ارتتىرا تۇسكەن.
«بىزگە جەتكەن ەستەلىكتەردى سارالاي وتىرىپ, احمەت جۇبانوۆ ومىردە وتە قاراپايىم كىسى بولعانىن بايقايمىز. ءتىرى كەزىندە ءبىر عانا مەرەيتويى اتالىپ ءوتىپتى. ماسەلەن, بۇگىنگى كورمەدە سول 60 جىلدىق مەرەيتويىندا سىيعا تارتىلعان ەكسپوناتتار بار. احمەت جۇبانوۆتىڭ ءوزىنىڭ قولدانىسىندا بولعان قول ساعاتى, ۇيدە پايدالانعان ۇستەل ساعاتى, راديوقابىلداعىشى تۇلعا قولىنىڭ تابى قالعان جادىگەرلەر ساناتىندا. ساعاتتا گراۆيروۆكا جازباسىمەن: «ەستەلىك 60 جىلدىققا ساپارعالي جانە زامزاگۇل» دەگەن جازبا بار. ال قول ساعاتىن اباي اتىنداعى قازاق ۇلتتىق پەداگوگيكالىق ۋنيۆەرسيتەتى (سول تۇستاعى قازپي) سىيعا تارتقان. سونداي-اق باسپا ماشىڭكەسى – 1950 جىلى گەرمانيادا شىققان», دەيدى احمەت جانە عازيزا جۇبانوۆتار مەموريالدى مۋزەي-ءۇيىنىڭ جەتەكشىسى رىسكۇل ساعاتقىزى.
رىسكۇل ساعاتقىزىنىڭ ايتۋىنشا, احمەت جۇبانوۆ قايتىس بولعاننان كەيىن قىزى عازيزا جۇبانوۆا سول پاتەرگە كوشىپ كەلەدى. داڭقتى تۇلعانىڭ ءوزى ونەرگە قوسقان قىزى اكەسىنە ارنالعان مۋزەي اشۋدى پەرزەنتتىك پارىزىنا بالاسا كەرەك. دەگەنمەن ول بۇل ارمانىنا جەتە الماي ومىردەن ەرتە ءوتتى. اراعا ءبىراز جىل سالىپ ءوزىنىڭ كۇيەۋى, ايگىلى رەجيسسەر ءازىربايجان مامبەتوۆ سول عازيزا جۇبانوۆانىڭ ارمانىنىڭ ورىندالۋىنا مۇرىندىق بولعان. ول پاتەرمەن بىرگە جۇبانوۆتار–مامبەتوۆتەر وتباسىنىڭ مۇراعاتىن مەملەكەت تاراپىنا تاپسىرادى. كەيىن احمەت جۇبانوۆتىڭ 100 جىلدىعىنا وراي وسى پاتەر-مۋزەي بولىپ ەسىك اشقان. اۋماعى 116 شارشى مەتردى قۇرايتىن مۋزەي-ءۇيىنىڭ قورىندا كۇنى بۇگىن 4 مىڭعا جۋىق ەكسپونات ساقتالعان. كەيبىر دەرەكتەردە بۇل ۇيدە جۇبانوۆتار اۋلەتىنە دەيىن اكادەميك قانىش ساتباەۆ تۇرعانى ايتىلادى.
الماتى