الاش تۇلعاسىنا قۇرمەت

2024 جىلعى ءبىلىم ۇياسىنا ءالىمحان ەرمەكوۆ ەسىمى بەرىلدى. مەكتەپتىڭ سىرتقى قابىرعاسىنا الاش قايراتكەرىنىڭ مۇرالى سالىندى, اۆتورى – الماس سىرعاباي. كىرەبەرىسىنە ءا.ەرمەكوۆ ءمۇسىنى ورناتىلدى, اۆتورى – بەلگىلى قولونەرشى, ءمۇسىنشى اسحات ورازعاليەۆ.

مەكتەپتە وتكەن سالتاناتتى ءىس-شاراعا الاشتانۋشى عالىم تۇرسىن جۇرتباي, اقىن, قوعام قايراتكەرى اكىم ىسقاق, ءا.ەرمەكوۆ اۋلەتىنەن فاريدا حاسەنقىزى, ەرمەكوۆتانۋشى جاننا قىدىرالينا, كومپوزيتور كەنتاۋ نازاربەك, باسقا قۇرمەتتى مەيماندار قاتىسىپ, ءوز پىكىرلەرىن ورتاعا سالدى. يگىلىكتى ىسكە اتسالىسقان ازاماتتار ءالىمحان ەرمەكوۆ مەدالىمەن ماراپاتتالدى.

№38 مەكتەپ-ليتسەيدىڭ ديرەكتورى قادىرعازى مۇقانوۆ: «مەكتەپ-ليتسەيدىڭ وسىنداي الاش ارىسىنىڭ ەسىمىن يەلەنۋى ۇلكەن مارتەبە ءارى بىزگە زور جاۋاپكەرشىلىك جۇكتەيدى. «ادال ازامات» ءبىرتۇتاس تاربيە باعدارلاماسى اياسىندا كوپ جۇمىس اتقارىلدى. جاس ۇرپاقتىڭ بويىنا ءالىمحان ابەۋ ۇلىنىڭ اسىل قاسيەتتەرىن ءسىڭىرۋ ماقساتىندا  9-سىنىپقا ارنالعان ء«الىمحانتانۋ كۋرسى» بەكىتىلدى. ول قالا كولەمىندە پايدالانۋعا ۇسىنىلدى. «تۇلعادان – ءتالىم» ايدارىمەن مەكتەپتە الاشتانۋ عىلىمى جولىندا تەر توگىپ جۇرگەن عالىمدارمەن كەزدەسۋلەر ۇيىمداستىرۋ ءىسى قولعا الىندى. عالىمنىڭ ۇرپاقتارىمەن بايلانىس ورناتىلدى. ەلىمىزدىڭ ءار وڭىرىندەگى ءا.ەرمەكوۆتىڭ ەسىمىن يەلەگەن مەكتەپتەر اراسىندا ءوزارا ىنتىماقتاستىق مەموراندۋمىنا قول قويىلدى. كوپتەگەن ىزدەنىس ناتيجەسىندە بۇرىن كىتاپتاردا جاريالانباعان, عىلىمي اينالىمعا تولىق ەنبەگەن فوتوسۋرەتتەرى قولىمىزعا ءتۇستى. سونىڭ ءبارى مەكتەپتەگى مۇراجاي قورىندا», دەدى.

فيلولوگيا عىلىمدارىنىڭ دوكتورى تۇرسىن جۇرتباي: «1987 جىلى ۇقك مۇراعاتىن اقتارىپ وتىرىپ, ءالىمحان ەرمەكوۆتىڭ ىسىنە ۇڭىلگەنىمدە, «كەلەشەكتە ەسىمى ۇلىقتالىپ, تۋعان حالقىنا ەڭبەگى مەن مۇراسى جەتسە ەكەن» دەپ, ۇزاق ويلانىپ قالعانىم ەسىمدە. ءالىمحاننىڭ ءىسى 17 توم, ونىڭ ءبارىن جازۋ مۇمكىن ەمەس. كۇبىرلەپ وقىپ وتىردىم. جاپونيادان الدىرعان كىشكەنتاي ماگنيتوفونىم بولدى, سوعان جازىپ الدىم. بۇگىنگى تاڭدا الاش ارىسىنىڭ ءوز ۇلتىنا ورالىپ, وسىلاي ناسيحاتتالىپ وتىرعانىنا بەك قۋانىشتىمىن. جانقيارلىق ەرلىك جاساپ, ءالىمحان ەرمەكوۆتىڭ ارىمەن, سوزىمەن, ناقتى دالەلدەرىمەن قورعاپ قالعان قازاقستان اۋماعىندا بۇگىنگى تاۋەلسىز مەملەكەتىمىز قالىپتاستى», دەي كەلىپ, وقۋشىلارعا: «سىزدەر ءالىمحان ەرمەكوۆتەي اتىنا زاتى ساي, وجەت, ءبىلىمدى, ءادىل, مادەنيەتتى قايىرىمدى بولىپ وسىڭدەر», دەدى.

سونداي-اق ء«الىمحان الەمى» اتتى جاڭا كىتاپتىڭ تانىستىرىلىمى ءوتتى. وندا الاش ارىسىنىڭ ءومىربايانى, وي-تولعامدارى ەنگەن, قۇندى دەرەكتەر مەن ءار جىلدارداعى فوتوشەجىرەلەر قامتىلعان. بەلگىلى عالىم ت.جۇرتبايدىڭ «تۇرمە ءاپسانالارى» زەرتتەۋ ەڭبەگىندەگى ءا.ەرمەكوۆتى تەرگەۋ ماتەريالدارى بار. وسى باسقوسۋدا جاس جازۋشى ءبىرجان احمەردىڭ «جەر ءۇشىن جانتالاس» تاريحي-دەرەكتى دراماسىنان ءۇزىندى قويىلدى.

ايباتىر سەيتاق,

اقىن, جۋرناليست