جاڭا كونستيتۋتسيا – ساياسي ينستيتۋتتاردى جۇيەلى تۇردە جاڭعىرتۋ جانە قازاقستاننىڭ زاماناۋي ءارى ءتيىمدى باسقارۋ ۇلگىسىنە كوشۋ جولىنداعى تاريحي قادام. بۇل جونىندە سەنات توراعاسى ماۋلەن اشىمباەۆ ايتتى.
كەشە سەناتتا سالتاناتتى جيىن ءوتىپ, وندا جاڭا كونستيتۋتسياعا بايلانىستى رەسپۋبليكالىق رەفەرەندۋمنىڭ قورىتىندىسى تالقىلاندى. پالاتا توراعاسى اتالعان رەفەرەندۋم شىن مانىندە تاريحي وقيعا بولعانىن ايتتى. سونداي-اق ول داۋىس بەرگەن ازاماتتاردىڭ 87 پايىزدان استامى پرەزيدەنت جاريالاعان كونستيتۋتسيالىق رەفورمانى قولداعانىن, سونىڭ ناتيجەسىندە ەلىمىزدىڭ جاڭا اتا زاڭى قابىلدانعانىن اتاپ ءوتتى. بۇل – تاۋەلسىز قازاقستاننىڭ دامۋى جولىنداعى ماڭىزدى قادام.
م.اشىمباەۆ كونستيتۋتسيالىق رەفورما مەملەكەت باسشىسى باستاماشى بولعان اۋقىمدى جاڭعىرتۋلاردىڭ دايەكتى جالعاسى ەكەنىنە توقتالدى. جاڭا كونستيتۋتسيا قازىرگى زامان تالاپتارىنا ساي ەكەنى, مەملەكەتتىلىگىمىزدىڭ عاسىرلار بويى قالىپتاسقان دامۋ تاريحىنىڭ جارقىن كورىنىسى سانالاتىنى دا اڭگىمەگە ارقاۋ بولدى.
«پرەزيدەنت قاسىم-جومارت توقاەۆتىڭ باستاماسىمەن جۇزەگە اسىرىلعان كونستيتۋتسيالىق رەفورما ەل دامۋىنىڭ جاڭا كەزەڭىنە جول اشتى. قابىلدانعان اتا زاڭ ساياسي جۇيەنى ساپالىق تۇرعىدان جاڭا دەڭگەيگە كوتەرۋگە باعىتتالعان. سونداي-اق مەملەكەت پەن قوعام اراسىنداعى ءوزارا سەنىمدى نىعايتۋدىڭ ءتيىمدى تەتىكتەرى ايقىندالىپ, دامۋدىڭ جاڭا پاراديگماسى قالىپتاستى. كونستيتۋتسيادا ازاماتتاردىڭ قۇقىقتارى مەن بوستاندىقتارىن قورعاۋ باسىم مىندەت رەتىندە بەلگىلەنگەنىن ەرەكشە اتاپ وتكەن ءجون. بيلىك تارماقتارى اراسىنداعى تەپە-تەڭدىكتى قامتاماسىز ەتەتىن نورمالار دا قاراستىرىلدى. جالپى, جاڭا كونستيتۋتسيا ەلىمىزدىڭ ۇزاقمەرزىمدى ءارى ناتيجەلى دامۋىنىڭ بەرىك قۇقىقتىق جانە ساياسي نەگىزىن قالادى. بۇل – قازاقستاننىڭ ودان ءارى ءوسىپ-وركەندەۋى ءۇشىن اسا ماڭىزدى قادام», دەدى سەنات توراعاسى.
ءىس-شارادا جاڭا اتا زاڭ ادىلەتتى قازاقستان يدەياسىن تولىق ىسكە اسىرۋدىڭ قۇقىقتىق نەگىزىن بەكىتە تۇسكەنىنە نازار اۋدارىلدى. سونداي-اق ادام قۇقىقتارى مەن بوستاندىقتارىن مەملەكەتتىڭ ەڭ جوعارى قۇندىلىعى رەتىندە ايقىنداۋ وسى رەفورما اياسىنداعى اسا ماڭىزدى تۇجىرىمدامالىق وزگەرىستەردىڭ ءبىرى بولعانى ايتىلدى.
«ەڭ باستىسى – قوعام كونستيتۋتسيالىق رەفورماعا بەيجاي قاراعان جوق. ازاماتتاردىڭ باسىم كوپشىلىگى ەل دامۋىنىڭ بەرىك نەگىزىنە اينالاتىن جاڭا كونستيتۋتسيانى قولدادى. رەفەرەندۋم ناتيجەلەرى حالىقتىڭ ەل بولاشاعىنا جاۋاپكەرشىلىكپەن قارايتىنىن كورسەتتى. سونداي-اق مەملەكەت باسشىسىنىڭ رەفورمالارىنا ازاماتتاردىڭ سەنىمى جوعارى ەكەنىن تاعى ءبىر مارتە پاش ەتتى. قازىر الدىمىزدا جاڭا كونستيتۋتسيادان تۋىندايتىن اۋقىمدى مىندەتتەر تۇر. باستى ماقسات – پرەزيدەنتىمىزدىڭ باس-تاماسىمەن قولعا الىنعان رەفورمالاردى ساپالى جۇرگىزۋ, جاڭا اتا زاڭدا ايقىندالعان قاعيداتتاردى ناقتى مازمۇنمەن تولىقتىرۋ جانە ءتيىستى زاڭدار قابىلداۋ ارقىلى ادىلەتتى قازاقستان قالىپتاستىرۋ يدەياسىن ىسكە اسىرۋ. بۇل – دەپۋتاتتار ءۇشىن ورتاق مىندەت, ورتاق جاۋاپكەرشىلىك», دەدى م.اشىمباەۆ.
سونىمەن قاتار سەنات توراعاسى پرەزيدەنت جارلىعىمەن قازاقستان رەسپۋبليكاسىنىڭ مەملەكەتتىلىگى مەن ەگەمەندىگىن نىعايتۋ ىسىندەگى ەسەلى ەڭبەگى, بەلسەندى قوعامدىق جانە ءمىنسىز مەملەكەتتىك قىزمەتى, ەلدىڭ الەۋمەتتىك-ەكونوميكالىق, مادەني دامۋىنا, ۇلتارالىق كەلىسىمدى نىعايتۋعا قوسقان ەلەۋلى ۇلەسى ءۇشىن ماراپاتتالعان بىرقاتار سەناتور مەن پالاتا اپپاراتىنىڭ قىزمەتكەرلەرىنە مەملەكەتتىك ناگرادالاردى تاپسىردى.
اتاپ ايتقاندا, سەناتورلار سۇلتانبەك ماكەجانوۆ پەن نۇرتورە ءجۇسىپ ءىىى دارەجەلى «بارىس» وردەنىمەن ناگرادتالدى. پالاتا دەپۋتاتتارى عالياسقار سارىباەۆ پەن ولگا بۋلاۆكيناعا «پاراسات» وردەنى تابىستالدى. سەناتور رۋسلان رۇستەموۆ, سەنات اپپاراتىنىڭ باسشىسى ماكسيم سپوتكاي, اپپارات باسشىسىنىڭ ورىنباسارى اداي بايمۇقانوۆ, ءبولىم باسشىسى باقىتگۇل تولەۋوۆا, ءباسپاسوز قىزمەتى باسشىسىنىڭ ورىنباسارى ەلامان قوڭىر «قۇرمەت» وردەنىمەن ماراپاتتالدى. بۇدان باسقا, اپپاراتتىڭ بىرقاتار قىزمەتكەرىنە «ەرەن ەڭبەگى ءۇشىن» مەدالى مەن پرەزيدەنتتىڭ العىسحاتى تاپسىرىلدى.